დღე: იანვარი 13, 2023

„მაგნიტსკის აქტის” თანაავტორის და ფინანსისტის, ბილ ბროუდერის განცხადებით, რუსეთის პრეზიდენტი ვლადიმერ პუტინი პატარა კრიმინალია, რომელიც სასოწარკვეთილად ცდილობს გადარჩეს. მისი თქმით, ”პუტინს მხოლოდ ერთი რამ ადარდებს და ეს ძალაუფლებაში დარჩენაა, რადგან თუ ის ძალაუფლებას დაკარგავს, მაშინ ის ციხეში წავა, ფულს დაკარგავს და მოკვდება.” „დასავლეთი განაგრძობს ფულის ხარჯვას და რუსული გაზისა და ნავთობის შესყიდვას. რუსეთი განაგრძობს ნავთოპროდუქტების უზარმაზარი რაოდენობით გაყიდვას და ამით ძალიან დიდ ფულს იღებს. სანამ ეს არ შემცირდება, ან შეწყდება, იქამდე პუტინს კვლავ ექნება ფული უკრაინელების დასახოცად. ვლადიმირ პუტინმა ეს ომი თავისი ძალაუფლების გასაძლიერებლად დაიწყო. კარგი ომი, ყოველთვის ეხმარება დიქტატორს.…

უკრაინის შეიარაღებულ ძალებში რუსეთის თავდაცვის სამინისტროს მიერ გავრცელებულ ინფორმაციას, სოლედარის დაკავების შესახებ უარყოფენ. უკრაინის შეიარაღებული ძალების აღმოსავლეთის დაჯგუფების სპიკერის, სერგეი ჩერევატის განცხადებით, ბრძოლები ქალაქის შიგნით მიმდინარეობს. „ბრძოლები თავად ქალაქში მიმდინარეობს, ინფორმაცია იმის შესახებ, რომ უკრაინული ძალები გავიდნენ სოლედარიდან, სინამდვილეს არ შეესაბამება. იქ ბრძოლები მიმდინარეობს. დეტალებზე არ ვსაუბრობთ, რომ არ გავასაჯაროვოთ ჩვენი მებრძოლების ტაქტიკური მდგომარეობა. ჩვენს ძალებს მოწინააღმდეგის ძალები აღემატება, რადგან მათ ამ მიმართულებაზე ძალების მაქსიმუმი გადაისროლეს. თუმცა ჩვენი მეომრები ამ დრომდე იბრძვიან თავად ქალაქში“, – განაცხადა ჩერევატიმ. https://mcm.ge/174021/

უკრაინის უმაღლესმა რადამ ვიქტორ მედვედჩუკსა და კიდევ ოთხ სახალხო დეპუტატს – ტარას კოზაკს, ანდრეი დერკაჩს, რენატ კუზმინსა და ანდრეი აქსიონოვს უფლებამოსილება შეუჩერა. მანდატების ჩამორთმევის გადაწყვეტილების საფუძველი ოთხი დეპუტატისთვის უკრაინის მოქალაქეობის შეწყვეტა გახდა. ანდრეი აქსიონოვმა კი,  დეპუტატის მანდატზე ნებაყოფლობით თქვა უარი. შეგახსნებეთ, 10 იანვარს, უკრაინის პრეზიდენტმა ვოლოდიმირ ზელენსკიმ განაცხადა, რომ უკრაინელ დეპუტატებს – ვიქტორ მედვედჩუკს, ტარას კოზაკს, ანდრეი დერკაჩსა და რენატ კუზმინს უკრაინის მოქალაქეობა შეუწყვიტა. მისი თქმით, აღნიშნული პირებისთვის მოქალაქეობის გაუქმების გადაწყვეტილება უკრაინის უსაფრთხოების სამსახურისა და სახელმწიფო საიმიგრაციო სამსახურის მიერ მომზადებული მასალების საფუძველზე მოხდა.  

უკრაინის თავდაცვის მინისტრის, ოლექსი რეზნიკოვის განცხადებით, რუსები  ყოველდღიურად დაახლოებით 500-600 ჯარისკაცს კარგავენ, უკრაინა კი ამ რაოდენობის მეათედს. მისი თქმით, დარწმუნებულია, რომ უკრაინა მიიღებს ტანკებს, საბრძოლო თვითმფრინავებს და შორ მანძილზე მოქმედ იარაღს 300 კმ-ზე მდებარე სამიზნეებზე დასარტყმელად. „ჩემს ქვეყანაში ომი მაქვს. ისინი ურტყამენ ჩემს ქალაქებს, ჩემს საავადმყოფოებს, ჩემს საბავშვო ბაღებს, ჩემს სკოლებს. მათ მოკლეს ბევრი მშვიდობიანი მოქალაქე. ისინი არიან მოძალადეების, მკვლელების და მძარცველების არმია. რა არის ესკალაციის შემდეგი დონე?“ – აღნიშნა რეზნიკოვმა.

უკრაინის პრეზიდენტის, ვოლოდიმირ ზელენსკის განცხადებით, უკრაინის წინააღმდეგ რუსეთის ომში ბელარუსის ჩართვა სტრატეგიული შეცდომა იქნება. მისი თქმით, ბელარუსის ადგილი ცივილიზებული ქვეყნების რუკაზე მომავალში სწორედ უკრაინის ომში ჩართვაზე იქნება დამოკიდებული. „ყოველ შემთხვევაში მეზობლები ვართ. ასეა თუ ისე, ბელარუსი გავლენას მოახდენს ჩვენს რეგიონში გეოპოლიტიკაზე. ეს ქვეყანა ჩვენი და პოლონეთის მეზობელია, ამიტომ ეს მნიშვნელოვანია ჩვენთვის და პოლონეთისთვის. ეს ასევე ეხება უსაფრთხოების გარანტიებს ჩვენს რეგიონში და უსაფრთხოების გარანტიებს მთელ ევროპაში“, – განაცხადა ვოლოდიმირ ზელენსკიმ.

რუსეთის პრეზიდენტმა, ვლადიმერ პუტინმა  ინდუსტრიისა და ვაჭრობის მინისტრი საჯაროდ გააკრიტიკა, სამხედრო და სამოქალაქო თვითმფრინავების შეკვეთების შესრულებისას ძალიან ნელა მოქმედების გამო. “ძალიან დიდი დრო სჭირდება! ძალიან დიდი დრო. არ გვესმის რა ვითარებაში ვართ?” – განაცხადა პუტინმა. პუტინმა მინისტრს 2023 წელს სამხედრო და სამოქალაქო თვითმფრინავების კონტრაქტების არარსებობის გამო უსაყვედურა და მოუწოდა კომპანიებს დააჩქარონ პროცესი, რათა შეასრულონ შეკვეთები. ,,თქვენ ამბობთ, რომ ყველაფერი მზადაა, მაგრამ არ არის კონტრაქტები, ამას გეუბნებით. მოდი, შეხვედრის შემდეგ ვისაუბროთ… მე ვიცი, რომ არცერთი კონტრაქტი არ არის გაფორმებული. საწარმოების დირექტორებმა მითხრეს. თავს ისულელებ?”- განაცხადა პუტინმა.

უკრაინის ომბუდსმენის, დმიტრი ლუბინეცის განცხადებით, 23 უკრაინელი, რომელიც დაღუპულად მიიჩნეოდა, ცოცხალი აღმოჩნდა. ამის შესახებ დმიტრი ლუბინეცი „ტელეგრამში“ წერს. „რუსეთის ადამიანის უფლებათა რწმუნებულთან ტატიანა მოსკალკოვასთან მოლაპარაკებების მესამე რაუნდი შედგა. პირველ რიგში, განვიხილეთ სამოქალაქო პირთა დაცვასთან დაკავშირებული საკითხების ფართო სპექტრი. არის შემთხვევები, როდესაც ჩვენი მოქალაქეები და გმირები, რომლებიც დაღუპულებად ითვლებოდნენ, რუსულმა მხარემ დაადასტურა, რომ ცოცხლები არიან – ჩვენი 23 ბიჭი. ეს უდიდესი პოზიტივია“, – წერს ლუბინეცი. უკრაინისა და რუსეთის ომბუდსმენების შეხვედრა ანკარაში გაიმართა.

„ეს არის ომის რთული ეტაპი, მაგრამ უკრაინა უდავოდ გაიმარჯვებს“, –  ამის შესახებ უკრაინის თავდაცვის მინისტრის მოადგილემ, ანა მალიარმა განაცხადა. მისი თქმით, უკრაინელი ჯარისკაცები „მამაცურად ცდილობენ თავდაცვის ხაზის შენარჩუნებას“. „სოლედარში ღამე ცხელი იყო, ბრძოლები გაგრძელდა. მტერმა თითქმის ყველა ძირითადი ძალა დონეცკის მიმართულებით გადაისროლა და შეტევის მაღალ ინტენსივობას ინარჩუნებს,“ – აღნიშნა უკრაინის თავდაცვის მინისტრის მოადგილემ.

,,რუსეთსა და უკრაინას შორის მოლაპარაკებები, განახლების შემთხვევაში, დიდი ალბათობით პირდაპირი იქნება, მედიატორების გარეშე, რაც საუკეთესო ვარიანტია,” – ამის შესახებ რუსეთის საგარეო საქმეთა სამინისტროს დსთ-ს მეორე დეპარტამენტის დირექტორმა ალექსეი პოლონჩუკმა განაცხადა. მისი თქმით,  უკრაინულ მხარესთან შარშანდელი მოლაპარაკებები პირდაპირი იყო. „თუ და როდესაც ეს კონტაქტები განახლდება, ისინი, დიდი ალბათობით, პირდაპირიც იქნება და ეს იქნება საუკეთესო ვარიანტი, რადგან გამოცდილებამ აჩვენა, რომ დასავლელი შუამავლები ხშირად ახორციელებენ საკუთარ მიზნებს და ცდილობენ მოლაპარაკებებზე გავლენა მოახდინონ და მოქმედებენ არა კონფლიქტის მოგვარებისთვის, არამედ საკუთარი პოლიტიკური და ეკონომიკური ინტერესებიდან გამომდინარე“, – განაცხადა პოლონჩუკმა.

უკრაინის გენშტაბი რუსი ოკუპანტების სამხედრო დანაკარგის შესახებ განახლებულ ინფორმაციას ავრცელებს. მონაცემები მოიცავს 24 თებერვლიდან 13 იანვრამდე პერიოდს. გენშტაბის ცნობით, ოკუპანტების სამხედრო დანაკარგი ასეთია:​ ჯარისკაცი – დაახლოებით 114 130; ​ტანკი – 3 098; ჯავშანტექნიკა – 6 167;საარტილერიო სისტემა – 2 086; სარაკეტო სისტემა – 437; საზენიტო საბრძოლო სისტემა – 218; თვითმფრინავები – 286; ვერტმფრენი – 276; ოპერატიულ-ტაქტიკური უპილოტო საფრენი აპარატი – 1 865; საკრუიზო რაკეტები – 723; საავტომობილო ტექნიკა და საწვავის ავზები – 4 833; გემი/ნავი/კატარღა – 17;​ სპეციალური აღჭურვილობა – 184.