კატეგორია: სიახლე

აშშ-ის სახელმწიფო მდივანმა, მარკო რუბიომ რუსეთის საგარეო საქმეთა მინისტრთან, სერგეი ლავროვთან საუბრის შემდეგ სოციალურ ქსელში დაწერა, რომ სიკვდილი და ნგრევა უნდა შეწყდეს. მარკო რუბიოს თქმით, აშშ-ი მიესალმება რუსეთსა და უკრაინას შორის სტამბოლში მიღწეულ შეთანხმებას ტყვეების გაცვლის შესახებ. „რუსეთის საგარეო საქმეთა მინისტრთან, სერგეი ლავროვთან სატელეფონო საუბრისას მე კიდევ ერთხელ გავიმეორე აშშ-ის პრეზიდენტის გზავნილი, რომ სიკვდილი და ნგრევა უნდა შეწყდეს. შეერთებულმა შტატებმა წარმოადგინა ძლიერი სამშვიდობო გეგმა და ჩვენ მივესალმებით სტამბოლში მიღწეულ შეთანხმებას სამხედრო ტყვეების გაცვლის შესახებ. ნუ გავუშვებთ ხელიდან ამ უზარმაზარ შესაძლებლობას. ახლაა ამ ომის დასრულების დრო“, –წერს მარკო რუბიო.    

რუსეთის საგარეო საქმეთა სამინისტროს პრესსპიკერმა, მარია ზახაროვამ განაცხადა, რომ სტამბოლში უკრაინის დელეგაციასთან შეხვედრაზე ყველა კონსტრუქციული წინადადება წამოაყენეს. მარია ზახაროვა 16 მაისს სტამბოლში უკრაინისა და რუსეთის დელეგაციების შეხვედრის შესახებ უკრაინის საგარეო საქმეთა მინისტრის, ანდრეი სიბიგას მიერ გაკეთებულ განცხადებას გამოეხმაურა, რომლის თანახმადაც, „ამ ყველაფერს აზრი ჰქონდა, რადგან 1000 უკრაინის მოქალაქე სამშობლოში დაბრუნდება“. „ეს „ათასი ათასზე“ გაცვლა რუსეთის მიერ იყო შეთავაზებული და სახელმწიფოს მეთაურის მიერ უფლებამოსილი დელეგაციის მიერ განხორციელდა, რომელსაც ბოლო 24 საათის განმავლობაში ზელენსკი დასცინოდა“, – განაცხადა მარია ზახაროვამ. მისი თქმით, რუსეთის მიერ ტყვეების „ათასი ათასზე“ ფორმულით გაცვლის წინადადება ლოგიკურია.

ისრაელსა და „ჰამასს“ შორის ცეცხლის შეწყვეტაზე მოლაპარაკებების ახალი რაუნდი დოჰაში მიმდინარეობს. “ჰამასისი“ წარმომადგენელმა თაჰერ ალ-ნონომ განაცხადა, რომ მზადაა გამოიყენოს ყველა საჭირო ძალისხმევა“ შუამავლების დასახმარებლად, რომ მოლაპარაკება წარმატებით დასრულდეს და აღნიშნა, რომ „მაგიდაზე არ დევს კონკრეტული შეთავაზება“. ამასთან, ისრაელის თავდაცვის ძალებში აცხადებენ, რომ ღაზის სექტორში ახალი მასშტაბური სამხედრო ოპერაციის პირველი ეტაპი დაიწყეს. როგორც ისრაელის თავდაცვის ძალებში იუწყებიან, ახალი მასშტაბური სამხედრო ოპერაციის ფარგლებში ღაზის სექტორში სტრატეგიულ ობიექტებს იკავებენ. ისრაელის პრემიერ-მინისტრმა, ბენიამინ ნეთანიაჰუმ 5 მაისს განაცხადა, რომ ისრაელი „ჰამასის“ წინააღმდეგ გაფართოებულ, ინტენსიურ შეტევას გეგმავს.

საფრანგეთის პრეზიდენტი, ემანუელ მაკრონი დარწმუნებულია, რომ აშშ-ის პრეზიდენტი, დონალდ ტრამპი “პუტინის ცინიზმზე რეაგირებას მოახდენს”. “იმის ფონზე, თუ როგორ ცინიკურად იქცევა პრეზიდენტი პუტინი, მჯერა – დარწმუნებულიც კი ვარ, რომ პრეზიდენტი ტრამპი, აშშ-ისადმი ნდობაზე ზრუნვაში, რეაგირებას მოახდენს ამაზე. ის ამერიკელმა ხალხმა აირჩია. ის თანამდებობაზე კეთილშობილური მიზნით მოვიდა – უზრუნველყოს მშვიდობა, და ამბობდა, რომ ამ მიზნისთვის ყველას ჩართავდა. პუტინმა და მისმა არმიამ პატივისცემა არ გამოიჩინეს ცეცხლის შეწყვეტის შესახებ წინადადებებისადმი, რომლებიც, შეგახსენებთ, ამერიკული ინიციატივა იყო” – განაცხადა მაკრონმა.

ირანის სულიერმა ლიდერმა, აიათოლა ალი ხამენეიმ აშშ-ის პრეზიდენტს, დონალდ ტრამპს სიცრუეში დასდო ბრალი. მისი განცახდებით, ტრამპი იტყუება, როდესაც მშვიდობაზე საუბრობს. „პირიქით, შეერთებული შტატები იყენებს თავის ძალაუფლებას 10-ტონიანი ბომბების ისრაელის რეჟიმისთვის გადასაცემად, რათა ღაზაში მცხოვრები ბავშვების თავებზე ჩამოყარონ“, – განაცხადა ირანის სულიერმა ლიდერმა. ალი ხამენეის თქმით, აშშ-ის პრეზიდენტის, დონალდ ტრამპის განცხადებები „პასუხის ღირსი არ არის“. „უდავოდ, კორუფციის, ომისა და კონფლიქტის წყარო ამ რეგიონში არის სიონისტური რეჟიმი – საშიში, მომაკვდინებელი სიმსივნე, რომელიც უნდა აღმოიფხვრას, და აღმოიფხვრება“ – განაცხადა ალი ხამენეიმ.

რუსეთის აგარეო საქმეთა მინისტრმა, სერგეი ლავროვმა და აშშ-ის სახელმწიფო მდივანმა მარკო რუბიომ სატელეფონო საუბრისას სტამბოლში გამართული შეხვედრის შედეგები განიხილეს. ინფორმაციას რუსული მედია ავრცელებს. „17 მაისს, ამერიკული მხარის ინიციატივით, რუსეთის ფედერაციის საგარეო საქმეთა მინისტრ, სერგეი ლავროვსა და აშშ-ის სახელმწიფო, მდივან მარკო რუბიოს შორის სატელეფონო საუბარი გაიმართა. მხარეებმა სტამბოლში გუშინ გამართული რუსეთ-უკრაინის მოლაპარაკებების შედეგებთან დაკავშირებით მოსაზრებები გაცვალეს“ – ნათქვამია რუსეთის საგარეო უწყების განცხადებაში. რუსეთის საგარეო უწყების ცნობით, აშშ-ის სახელმწიფო მდივანი, მარკო რუბიო რუსეთსა და უკრაინას შორის სამხედრო ტყვეების გაცვლის შესახებ მიღწეულ შეთანხმებას მიესალმა.

რუსეთთან ტყვეების „1000/1000-ზე ფორმულით“ გაცვლა, სავარაუდოდ, მომდევნო კვირაში შედგება. ინფორმაციას ამის შესახებ, უკრაინის დაზვერვის მთავარი სამმართველოს ხელმძღვანელი კირილ ბუდანოვი  ავრცელებს. „იმედი მაქვს, ეს მომავალ კვირაში მოხდება. თქვენ ხომ გესმით, იქნება გაცვლა, ასე რომ ვთქვათ, ვისი წამოყვანაც შეგვეძლება, იმას წამოვიყვანთ“ – განაცხადა კირილ ბუდანოვმა. სტამბოლში გამართული მოლაპარაკებები დროს რუსეთი და უკრაინა „1000/1000-ზე ფორმულით“ ტყვეების გაცვლაზე შეთანხმდნენ. მოლაპარაკებების დროს ასევე განიხილეს რუსეთისა და უკრაინის პრეზიდენტების შეხვედრის შესაძლებლობაც.

რუსეთის პრეზიდენტი ვლადიმერ პუტინი პირველ რუსულ-არაბულ სამიტს 15 ოქტომბერს უმასპინძლებს. ინფორმაციას რუსული მედია ავრცელებს. პუტინმა არაბული ქვეყნების ლიდერები და არაბული ქვეყნების ლიგის გენერალური მდივანი მიიწვია. „დარწმუნებული ვარ, რომ ეს შეხვედრა წვლილს შეიტანს ჩვენს ქვეყნებს შორის ურთიერთსასარგებლო, მრავალმხრივი თანამშრომლობის შემდგომ გაძლიერებაში. ასევე დაეხმარება გზების ძიებაში, რათა ურუნველვყოთ მშვიდობა, უსაფრთხოება და სტაბილურობა ახლო აღმოსავლეთსა და ჩრდილოეთ აფრიკაში“– ნათქვამია პუტინის სახელით გავრცელებულ მოსაწვევ ტექსტში.

დიდი ბრიტანეთის საგარეო საქმეთა მინისტრმა, დევიდ ლემიმ განაცხადა, რომ რუსეთმა კიდევ ერთხელ შექმნა გაუგებრობა. „კიდევ ერთხელ ვხედავთ გაუგებრობის შექმნას რუსეთის მხრიდან და უარს იმაზე, რომ სერიოზულად მიუდგნენ უკრაინაში მდგრადი მშვიდობის დამყარებას, რაც ახლა აუცილებელია. კიდევ ერთხელ, რუსეთი არ არის სერიოზული. როდის უნდა ვუთხრათ პუტინს, რომ საკმარისია“– აღნიშნა ლემიმ. დევიდ ლემიმ ინდოეთსა და პაკისტანს შორის არსებულ კონფლიქტზე ისაუბრა და აღნიშნა, რომ ბრიტანეთი და აშშ ერთად მუშაობენ ორ მხარეს შორის ცეცხლის შეწყვეტის უზრუნველსაყოფად.

ირანის პრეზიდენტმა, მასუდ ფეზეშქიანმა განაცხადა, რომ ირანი არ დაიხევს უკან თავისი ლეგიტიმური უფლებებისგან. მისივე თქმით, დონალდ ტრამპი, ერთი მხრივ, მშვიდობაზე საუბრობს და, მეორე მხრივ, ყველაზე მოწინავე მასობრივი განადგურების ინსტრუმენტებით ემუქრებათ. „რომელს უნდა დავუჯეროთ? ერთი მხრივ, ტრამპი საუბრობს მშვიდობაზე და, მეორე მხრივ, გვემუქრება ყველაზე მოწინავე მასობრივი განადგურების ინსტრუმენტებით. ჩვენ უარს ვამბობთ თავი დავუხაროთ ჩაგვრას. ამბობენ, რომ ჩვენ ვართ რეგიონში არასტაბილურობის წყარო“, – აღნიშნა ფეზეშქიანმა.