დღე: ივლისი 27, 2023

სოჭიდან წამოსულმა საკრუიზო ლაინერმა Astoria Grande, ბათუმის პორტი ხმაურისა და პროტესტის ფონზე დატოვა. აქციის მონაწილეებმა საქართველოსა და უკრაინის ჰიმნები შეასრულეს. ბათუმის პორტში შეკრებილი იყვნენ როგორც რიგითი მოქალაქეები, ასევე ოპოზიციური პარტიების წარმომადგენლები. ისინი სოჭიდან წამოსული საკრუიზო ლაინერის ბათუმის პორტში შემოსვლას აპროტესტებდნენ. აქციაზე პროტესტი და ხმაური მოყვა ლაინერიდან რუსი ტურისტების ჩამოსვლას და გემიდან რუსეთის დროშის გამოფენას. ამასთან, ლაინერის ერთ-ერთმა მგზავრმა აქციის მონაწილეებს შეურაცხმყოფელი ჟესტებით მიმართა. ბათუმის პარალელურად აქცია გაიმართა თბილისშიც, საქართველოს პარლამენტის შენობის წინ.

უკრაინის უმაღლესმა რადამ ქვეყანაში საომარი მდგომარეობა და საყოველთაო მობილიზაცია 90 დღით გაახანგრძლივა. პრეზიდენტმა ზელენსკიმ უკრაინის რადას საომარი მდგომარეობისა და საყოველთაო მობილიზაციის გახანგრძლივების ორი კანონპროექტი გუშინ, 26 ივლისს წარუდგინა. ,,უკრაინის პრეზიდენტის ბრძანებულების „უკრაინაში საომარი მდგომარეობის გაგრძელების შესახებ“ , მხარი დაუჭირა 347-მა სახალხო დეპუტატმა. საომარი მდგომარეობა ქვეყანაში ოფიციალურად 16 ნოემბრის 05:30 საათამდე გაგრძელდება. რადამ მიიღო კანონი “უკრაინის პრეზიდენტის ბრძანებულების დამტკიცების შესახებ “საერთო მობილიზაციის ვადის გაგრძელების შესახებაც” გადაწყვეტილებას მხარი დაუჭირა 334-მა სახალხო დეპუტატმა. საერთო მობილიზაციაც 90 დღით გაგრძელდა.  

საქართველოს ახალგაზრდა იურისტთა ასოციაცია ბათუმში სოჭიდან საკრუიზო გემით რუსი ოკუპანტების შემოსვლას ეხმაურება. მათი თქმით, ქვეყანაში კრუიზით ჩამოსულ რუსებს ოკუპაციის კანონი დარღვეული ჰქონდათ. საია შინაგან საქმეთა სამინისტროს მოუწოდებს, რეაგირება მოახდინოს კანონმდებლობის დადგენილი მოთხოვნების დამრღვევ პირთა გამოსავლენად და მათ მიმართ გამოიყენოს სისხლის სამართლის კოდექსით გათვალისწინებული მექანიზმები. “საია ეხმიანება მედიით გავრცელებულ ინფორმაციას, რომლის თანახმად 26 ივლისს, ბათუმის ნავსადგურში რუსეთის ფედერაციიდან შემოსული საკრუიზო გემით იმ პირების შემოსვლის შესახებ, რომლებსაც შესაძლოა, დარღვეული ჰქონდეთ „ოკუპირებული ტერიტორიების შესახებ“ საქართველოს კანონი. რუსეთის სამხედრო აგრესიის შედეგად ოკუპირებულ საქართველოს ტერიტორიებზე მოქმედებს განსაკუთრებული სამართლებრივი რეჟიმი, რომელიც განსაზღვრავს უცხო ქვეყნის მოქალაქეების ან მოქალქეობის…

თბილისში, პარლამენტთან მიმდინარე აქციაზე, სადაც მოქალაქეები, სამოქალაქო აქტივისტები და პოლიტიკური პარტიების წარმომადგენლები ბათუმში სოჭიდან საკრუიზო გემით რუსი ოკუპანტების შემოსვლას აპროტესტებენ, რუსეთის დროშა დაწვეს. არა გარუსების პოლიტიკას! საქართველოს მთავრობას არ გაუვა გაარუსოს საქართველო და ქართველი ხალხი! – დაწერეს აქციის ორგანიზატორებმა. აქციები თბილისსა და ბათუმში საკრუიზო ლაინერ “ასტორია გრანდეს” შემოსვლის გამო ჩაინიშნა. ქვეყანაში გემით 800-ზე მეტი რუსი ტურისტი შემოვიდა, რომლებიც არ აღიარებენ კრემლის მიერ საქართველოს ტერიტორიების ოკუპაციას და ამტკიცებენ, რომ “აფხაზეთი საქართველოსგან გაათავისუფლეს”.

რუსეთის პრეზიდენტის, ვლადიმერ პუტინის განცხადებით, „ახალ, მრავალპოლარულ მსოფლიოში“ აფრიკა რუსეთის ერთ-ერთი საკვანძო პარტნიორი გახდება. CNN-ის ცნობით, აღნიშნული განცხადება პუტინმა რუსეთ-აფრიკის სამიტის გახსნის ცერემონიალზე გააკეთა, რომელიც სანქტ-პეტერბურგში ტარდება. მედიის ცნობით, დღის წესრიგის მთავარი თემა, სავარაუდოდ, მარცვლეულის შეთანხმებიდან რუსეთის გასვლა იქნება. „ასეთი მაღალი დონის სამიტები იშვიათია პუტინისთვის, რომელიც უკრაინის წინააღმდეგ ომის გამო დიპლომატიურ იზოლაციაში აღმოჩნდა. სანქტ-პეტერბურგის სამიტს მხოლოდ და მხოლოდ 17 აფრიკული ქვეყნის ლიდერი ესწრება, სამხრეთ აფრიკის პრეზიდენტის, სირილ რამაფოსას ჩათვლით, როდესაც წინა სამიტზე, რომელიც 2019 წელს ჩატარდა, ლიდერების რაოდენობა ორჯერ მეტი იყო“, – წერს CNN.

რუსეთის შინაგან საქმეთა სამინისტრომ სისხლის სამართლის საერთაშორისო სასამართლოს (ICC) მოსამართლე ტომოკო აკანეზე ძებნა გამოაცხადა. ამის შესახებ ინფორმაციას სამთავრობო მედია Ria ავრცელებს. ტომოკო აკანე ჰააგის სასამართლოს იმ პალატის წევრია, რომელმაც 2023 წლის მარტში რუსეთის პრეზიდენტ ვლადიმერ პუტინის დაპატიმრების ორდერი გასცა. არსებული ინფორმაციით, იაპონელი მოსამართლე “რუსეთის სისხლის სამართლის კოდექსის შესაბამისად” იძებნება, თუმცა მუხლი დაკონკრეტებული არ არის. შეგახსენებთ, რომ ჰააგის სისხლის სამართლის საერთაშორისო სასამართლომ უკრაინელი ბავშვების გატაცებისა და უკანონო დეპორტაციისთვის, ვლადიმერ პუტინის დაკავების ორდერი 17 მარტს გამოსცა. ორდერი ასევე გაიცა ბავშვთა საკითხებში რუსეთის ომბუდსმენის მარია ლვოვა-ბელოვას დაკავებაზეც. მოსკოვი ICC-ის იურისდიქციას არ აღიარებს.

შეერთებული შტატები უკრაინაში რუსეთის ომის დანაშაულებთან დაკავშირებით სისხლის სამართლის საერთაშორისო სასამართლოს გამოძიებასთან ითანამშრომლებს, – ეს გადაწყვეტილება თეთრი სახლის ლიდერმა ჯო ბაიდენმა უკვე მიიღო. ინფორმაციას ამის შესახებ CNN ავრცელებს. მედიის ცნობით, გადაწყვეტილება რამდენიმეთვიანი შიდა დებატების შემდეგ მიიღეს და ეს იქნება პირველი შემთხვევა, როდესაც აშშ სისხლის სამართლის სასამართლოსთვის მტკიცებულებების გაზიარებას დათანხმდა. რა ინფორმაციას გაუზიარებს აშშ სასამართლოს, საბოლოოდ დამოკიდებული იქნება იმაზე, თუ რას მოითხოვს სისხლის სამართლის საერთაშორისო სასამართლოს პროკურორი გამოძიებისთვის. შეგახსენებთ, რომ აშშ რომის სტატუტის ხელმომწერი ქვეყანა არ არის და მის ტერიტორიაზე ჰააგის სასამართლოს იურისდიქცია არ ვრცელდება.

უკრაინის პრეზიდენტი მორიგ ვიდეომიმართვას ავრცელებს, სადაც ოკუპირებულ ყურიმზე საუბრობს და ოკუპანტებს სახლში დაბრუნებისკენ მოუწოდებს. „ყირიმის დეოკუპაციური ნაბიჯების სიას ვამზადებთ. კომპლექსურების, უსაფრთხოების, ეკონომიკურის, სოციალურის. საკმაოდ სწრაფად შეგვიძლია ყირიმის უკრაინის სახელმწიფო ქსოვილში რეინტეგრირება. ოკუპანტებს ურჩევნიათ, დაფიქრდნენ, დაბრუნდნენ რუსეთში, სანამ ყირიმის ხიდი ჯერ კიდევ ასე თუ ისე მუშაობს. ყირიმი, როგორც მთელი უკრაინა, თავისუფალი იქნება. თავისუფალი მთელი რუსული ბოროტებისგან. რუსული რაკეტებით დაწყებული და ყოველი რუსი ოკუპანტით დამთავრებული. რუსეთი ამ ომს წააგებს და ვერცერთი რაკეტა მას ვერ გადაარჩენს,” – განაცხადა პრეზიდენტმა ზელენსკიმ ვიდეომიმართვაში.

რუსეთის თავდაცვის მინისტრი, ოფიციალური ვიზიტის ფარგლებში ჩრდილოეთ კორეაში იმყოფება. სერგეი შოიგუ ფხენიანში ჩრდილოეთ კორეის ლიდერს – კიმ ჩენ ინს შეხვდა და უაფრთხოების საკითხებზე იმსჯელეს. როგორც რუსული მედიის მიერ გავრცელებულ ინფორმაციაში ვკითხულობთ, მხარეებმა თავდაცვისა და უსაფრთხოების სფეროში ორმხრივი ინტერესის საკითხები განიხილეს. რუსეთის დელეგაცია ჩრდილო კორეაში კორეის ომში საომარი მოქმედებების დასრულების 70 წლისთავის აღსანიშნავად მიმდინარე ღონისძიებებში მონაწილეობს.