დღე: იანვარი 14, 2024

ირანში მაჰსა ამინის სიკვდილის გაშუქების გამო დაკავებული ორი ჟურნალისტი გაათავისუფლეს. ინფორმაციას ირანული მედია ავრცელებს. 31 წლის ნილუფარ ჰამედი და 36 წლის ელაჰ მოჰამედი 200 000-დოლარიანი გირაოს სანაცვლოდ და ქვეყნიდან გასვლის უფლების აკრძალვით გაათავისუფლეს. ჟურნალისტი ქალები პატიმრობას ასაჩივრებენ და სასამართლოს გადაწყვეტილების მიღებამდე ციხის გარეთ დარჩებიან. ნილუფარ ჰამედი რეფორმისტულ გაზეთ Shargh-ში მუშაობდა, მან მაჰსა ამინის მამა და ბებია ჩახუტებულები გადაიღო მას შემდეგ, რაც გაიგეს, რომ მათი ქალიშვილი გარდაიცვალა და ინტერნეტში გამოაქვეყნა წარწერით: “გლოვის შავი კაბა ჩვენი ეროვნული დროშა გახდა”. ელაჰ მოჰამედიც რეფორმისტულ გაზეთ Ham-Mihan-ში მუშაობდა, მან ამინის დაკრძალვის შესახებ დაწერა. შეგახსენებთ, რომ…

აშშ-ის ცენტრალურ რაიონებში უხვთოვლობას თან ტემპერატურის მკვეთრი დაცემა და ძლიერი ქარი დაერთო, რამაც ადგილობრივ მოსახლეობას პრობლემები შეუქმნა. ჩიკაგოში უამინდობის გამო ფრენები გადაიდო, მიჩიგანში კი ელექტროგადამცემი ხაზები დაზიანდა, რის გამოც 150 ათასამდე სახლი ელექტროენერგიის გარეშე დარჩა. არსებული ინფორმაციით, ამინდი მკვეთრად გაუარესდა აიოვაში, აიდაჰოსა და იუტაშიც.

ტეხასში, რიო გრანდეს გადაკვეთისას, ქალი და ორი ბავშვი დაიღუპა. ისინი აშშ-ში შესვლას სამხრეთ საზღვრის იმ მონაკვეთიდან ცდილობდნენ, სადაც ტეხასის ეროვნული გვარდიის ჯარისკაცებმა ფედერალურ სასაზღვრო პატრულს მიგრანტების შემოწმებასა და გადარჩენაში ხელი შეუშალეს. შტატის რესპუბლიკელი გუბერნატორის, გრეგ ებოტის ბრძანებით, ეროვნული გვარდიის ჯარისკაცებმა სასაზღვრო პატრულს მიგრანტების გადარჩენის მცდელობის უფლება არ მისცეს. ,,ქალი და ორი ბავშვი ტრაგიკულად დაღუპა Shelby-ის პარკთან, რომელსაც მიმდინარე კვირის დასაწყისიდან ტეხასის შტატი აკონტროლებს“, – განაცხადა აშშ-ის შიდა უსაფრთხოების დეპარტამენტმა.

კოლუმბიაში მეწყრის შედეგად დაღუპულთა რიცხვი 33-მდე გაიზარდა. კოლუმბიის ვიცე-პრეზიდენტმა, ფრანსია მარკესმა, განაცხადა, რომ დაღუპულთა შორის უმეტესობა ბავშვია. შეგახსენებთ, რომ კოლუმბიაში მეწყერი 13 იანვარს ჩამოწვა. ტერიტორიაზე სამძებრო-სამაშველო სამუშაოები ამ დრომდე მინდინარეობს. ვარაუდობენ, რომ რამდენიმე ადამიანი მიწის მასის ქვეშაა მოყოლილი, თუმცა ძლიერი წვიმა სამუშაოებს აფერხებს.

დანიის ახალი მეფე ფრედერიკ X გახდა. დანიის დედოფალმა, მარგრეტე II-მ ტახტი ოფიციალურად დატოვა. მარგრეტე II-მ გადადგომის დოკუმენტს ხელი მოაწერა და გვირგვინი შვილს გადასცა. მას მეფედ კრისტიანსბორგის სასახლის აივნიდან გამოაცხადებენ. დანიას მხოლოდ ახალი მეფე არ ეყოლება, მისი ცოლი, პრინცესა მერი, დანიის დედოფალი-კონსორტი გახდება.

ისლანდიაში, ვულკანიდან ამოფრქვეულმა ლავამ ქალაქ გრინდავიკმდე მიაღწია. ქალაქიდან 4 000 ადამაინის ევაკუაცია განხორციელდა. ადგილობრივი მედიის ცნობით, ლავამ ერთ-ერთ საცხოვრებელ სახლამდე მიაღწია, რის გამოც სახლის ნახევარი დაიწვა. ლავა სახლებიდან სულ რაღაც 50 მეტრშია. სამოქალაქო თავდაცვის ხელმძღვანელმა ვიადირ რეინისონმა თქვა, რომ ლავა ქალაქის წყალმომარაგებასა და ელექტროენერგიაში მიედინება. მსხვერპლისა და დაშავებულების შესახებ ინფორმაცია ჯერჯერობით არ ვრცელდება.

იაპონიაში მიწისძვრის შედეგად დაღუპულთა რაოდენობა 220-მდე გაიზარდა, დაშავებულთა რაოდენობა 1 000-ს აჭარბებს. უგზო-უკვლოდ დაკარგულად მიიჩნევა 20 ადამიანი. ნანგრევებში ადამიანებს ისევ ეძებენ. შეგახსენებთ, რომ პირველ იანვარს ნოტოს ნახევარკუნძულზე მიწისძვრების სერია მოხდა. ყველაზე ძლიერმა, 7,6 მაგნიტუდის სიმძლავრის მიწისძვრამ, ერთ მეტრზე მეტი სიმაღლის ცუნამის ტალღები გამოიწვია.

ისლანდიის სამხრეთ-დასავლეთით ვულკანი ამოიფრქვა. ამოფრქვევა მეთევზეთა ქალაქ გრინდავიკის ჩრდილოეთით, ადგილობრივი დროით დილის 8 საათზე დაიწყო. ვულკანის ამოფრქვევას წინ მიწისძვრების სერია უძღოდა. ისლანდიის მეტეოროლოგიური ადმინისტრაციის ინფორმაციით, კვირას, ადგილობრივი დროით დილის 3 საათზე, გრინდავიკის მახლობლად, სულ მცირე 200 მიწისძვრა მოხდა. ცნობისთვის, ისლანდიაში ვულკანი დეკემბერშიც ამოიფრქვა. ეს კი უკვე მეხუთე ამოფრქვევა რეიკიანესის ნახევარკუნძულზე, 2021 წლის შემდეგ.

,,მსოფლიო მესამე მსოფლიო ომთან ასე ახლოს ჯერ არ ყოფილა”. ამის შესახებ ამერიკის ყოფილმა პრეზიდენტმა ამომრჩევლებთან შეხვედრისას განაცხადა. მისი თქმით, ჯოზეფ ბაიდენის პრეზიდენტობის პერიოდში შეერთებული შტატები სუსტ და არაეფექტიან სახელმწიფოდ იქცა, რომელსაც ანგარიშს აღარ უწევენ. პრეზიდენტად არჩევის შემთხვევაში ტრამპი ამომრჩევლებს მესამე მსოფლიო ომის შეჩერებას დაჰპირდა.

საქართველოში ამერიკის შეერთებული შტატების საელჩო ქვეყანას სახელმწიფო დროშის დღეს ულოცავს. საელჩომ განცხადება სოციალურ ქსელში გამოაქვეყნა. „ვულოცავთ ჩვენს ქართველ პარტნიორებსა და მეგობრებს საქართველოს ეროვნული დროშის დღეს“, – აღნიშნულია განცხადებაში.

,,მოუსმინეთ უკრაინას და მიიღეთ გადამწყვეტი ზომები”. ამის შესახებ დმიტრო კულებამ ფრანგ კოლეგასთან, სტეფან სეჟორნესთან ერთობლივ ბრიფინგზე განაცხადა. „ამ საკითხში ყველაზე ნაკლები პრეტენზია მაქვს საფრანგეთთან, მაგრამ მინდა ვისარგებლო შემთხვევით და მოვუწოდო შვიდეულის ჯგუფის ყველა ქვეყანას და ევროკავშირს, მოუსმინონ უკრაინას და მიიღონ გადამწყვეტი ზომები, რათა შეაჩერონ ამ კომპონენტების მიწოდება რუსეთისთვის“, – აღნიშნა კულებამ. მისი თქმით, რუსეთის ფედერაცია სარეცხი მანქანების, მიკროტალღური ღუმელებისა და სხვა საყოფაცხოვრებო ტექნიკის ნაწილებს იყენებს რაკეტებისთვის, რათა შემდეგ მოკლას უკრაინელები. ,,ჩვენ რეგულარულად ვაწვდით ჩვენს პარტნიორებს იმ კომპონენტების სიებს, რომლებსაც ვპოულობთ ჩამოგდებულ რუსულ რაკეტებში. ხაზს ვუსვამ, რომ ჩვენ არაერთხელ მოვუწოდეთ მათ…

14 იანვარს საქართველოში სახელმწიფო დროშის დღე აღინიშნება. სახელმწიფო დროშის დღესთან დაკავშირებით, შინაგან საქმეთა სამინისტროს სხვადასხვა დანაყოფში დროშის აღმართვის ცერემონია გაიმართა.

13 იანვარს ხერსონის ოლქში რუსეთის აგრესიის შედეგად კიდევ 6 მშვიდობიანი მოქალაქე დაშავდა. ხერსონის რეგიონული სამხედრო ადმინისტრაციის თქმით, გასული დღის განმავლობაში მტერმა 103 ჭურვი გაუშვა ნაღმმტყორცნებიდან, არტილერიიდან, ტანკებიდან, უპილოტო საფრენი აპარატებიდან და სხვა საბრძოლო საშუალებებიდან. რუსი ოკუპანტების სამიზნეს რეგიონის დასახლებული პუნქტები, საცხოვრებელი კვარტლები და პორტის ინფრასტრუქტურა წარმოადგენდა.

რუსმა ოკუპანტებმა, ომის დაწყებიდან დღემდე, უკრაინაში ტოქსიკური ქიმიკატების შემცველი საბრძოლო მასალის გამოყენებით 626 თავდასხმა განახორციელეს. უკრაინის გენერალური შტაბის თქმით, რუსების მიერ ქიმიური ნივთიერებების გამოყენების დინამიკა იზრდება და თავდაცვის ძალები ყოველდღიურად 10-მდე ასეთ შემთხვევას აფიქსირებენ. ,,ყველაზე ხშირად, მტერი იყენებს ყუმბარებს, როგორიცაა K-51, RGR. მათ ყრიან უპილოტო საფრენი აპარატებიდან. თუმცა, გამოიყენება გამაღიზიანებელი ნივთიერების შემცველი თვითნაკეთი ასაფეთქებელი მოწყობილობებიც. ასევე, საარტილერიო შეტევები ხორციელდება ქიმიურად საშიში ნივთიერებების შემცველი ჭურვებით. 2023 წლის 14 დეკემბერს აღმოაჩინეს ახალი ტიპის სპეციალური გაზის ყუმბარა РГ-ВО, რომელიც შეიცავს ქიმიურ ნივთიერებას CS-ს,” – ამბობს გენშტაბი. მათივე თქმით, სახიფათო ქიმიკატების გამოყენების 36 შემთხვევა…

,,თუ ჩემი რესპუბლიკელი კოლეგები უკრაინას არ დააფინანსებენ, ბევრის გადახდა მოუწევთ,”- განაცხადა ბაიდენმა და იმედი გამოთქვა, რომ კონგრესში საბოლოოდ მიიღებენ პაკეტს, რომელიც უზრუნველყოფს როგორც უკრაინის დახმარებას, ასევე გააძლიერებს ამერიკის საზღვარს მექსიკასთან. ,,ვფიქრობ, საზღვარზე მნიშვნელოვანი ცვლილებები უნდა განვახორციელოთ. დიდი ხანია, ამისთვის ვიბრძვი. მზად ვარ, მნიშვნელოვანი ცვლილებები განვახორციელო საზღვარზე. მოლაპარაკებები ბოლო ხუთი კვირის განმავლობაში მიმდინარეობს. იმედი მაქვს, რომ ამას მივაღწევთ”, – აღნიშნა ბაიდენმა.

იაპონიაში, სამხრეთ-დასავლეთით მდებარე კუნძულ სუვანოსეჯიმაზე, ოტაკეს მთაზე, ვულკანი ამოიფრქვა. იაპონიის მეტეოროლოგიური სააგენტოს ცნობით, ვულკანი 14 იანვარს ამოიფრქვა. სააგენტომ ვულკანის გამო, განგაშის მე-3 დონე გამოაცხადა. მან მთამსვლელებსა და სხვა მოქალაქეებს უსაფრთხოების ზომების მიღებისკენ მოუწოდა. დაშავებულების ანდა მსხვერპლის შესახებ ინფორმაცია არ ვრცელდება.

დღეს დილით, ქალაქ კიევსა და უკრაინის რამდენიმე რეგიონში საჰაერო განგაში იყო, რომელიც დაახლოებით 30 წუთს გაგრძელდა. როგორც უკრაინის საჰაერო ძალებმა განაცხადეს, არსებობდა ბალისტიკური რაკეტების გამოყენების საფრთხე. მათ ასევე აღნიშნეს, რომ სამხრეთ-აღმოსავლეთის მიმართულებით მოწინააღმდეგის ტაქტიკური ავიაციის აქტიურობა შეინიშნებოდა.