დღე: იანვარი 13, 2024

გერმანიის სამხრეთ-დასავლეთ ნაწილში, ქალაქ კონსტანცში ქიმიურ ქარხანაში კონტეინერიდან ტოქსიკურმა აირმა გაჟონა, რის გამოც 25 ადამიანი საავადმყოფოში მოხვდა. ინციდენტი მოხდა ქარხანაში, რომელიც ხილის დასამუშავებელ ხსნარებს ამზადებს. პოლიციის ინფორმაციით, ჯერჯერობით უცნობი მიზეზის გამო ტემპერატურის ზრდამ ქიმიური რეაქცია გამოიწვია, რის გამოც მაღალტოქსიკურმა აირებმა ქარხნის სარდაფში შენახული კონტეინერიდან გაჟონა. ქარხნის ერთ-ერთმა თანამშრომელმა გაჟონვის ფაქტი მალევე დააფიქსირა და კონტეინერი ქარხნის ფარგლებს გარეთ, დაუსახლებელ ტერიტორიაზე გაიტანა. მიუხედავად ამისა, 25 ადამიანი სასუნთქი გზების ანთებით საავადმყოფოში მოხვდა.

მეტი...

კიევში სოლომიანის რაიონში, სავაჭრო ცენტრ “კოსმოპოლიტში, საბავშვო სივრცეში ხანძარი გაჩნდა. უკრაინული მედიის ცნობით, სავაჭრო ცენტრიდან ხალხის ევაკუაცია მიმდინარეობს. ,,დედაქალაქის სოლომიანის რაიონში, სავაჭრო ცენტრ “კოსმოპოლიტიდან”, სადაც ხანძარი გაჩნდა, ხალხის ევაკუაცია მიმდინარეობს”, – წერს კლიჩკო. შემთხვევის ადგილზე მობილიზებულია შესაბამისი სამსახურები, მსხვერპლისა და დაშავებულების შესახებ ინფორმაცია ჯერჯერობით არ ვრცელდება.

მეტი...

დანია ახალი მონარქის კორონაციისთვის ემზადება. 83 წლის დედოფალი მარგარეტი 52 წლიანი მმართველობის შემდეგ ტახტზე უარს ხვალ იტყვის, რის შემდეგაც სამეფო გვირგვინს მის ვაჟს, პრინც ფრედერიკს გადასცემენ. კორონაციისთვის მზადება კოპენჰაგენში უკვე კულმინაციას აღწევს. ქვეყნის დედაქალაქი ცერემონიისთვის ეროვნულ დროშებით გააფორმეს.

მეტი...

დანია უკრაინას ქალაქ მიკოლაივის აღდგენისთვის 21 მილიონ დოლარს გამოუყოფს. ინფორმაციას უკრაინული მედია ავრცელებს. დახმარების პაკეტი მოიცავს პროექტებს სოფლის მეურნეობის სექტორში, რომელიც მიზნად ისახავს სასოფლო-სამეურნეო მიწების განაღმვას, ასევე მიკოლაივის სახელმწიფო აგრარული უნივერსიტეტის სახანძრო უსაფრთხოებისთვის საერთო საცხოვრებლის რეკონსტრუქციას, რომელიც განხორციელდება ორგანიზაციებთან UNOPS Ukraine და All Ukraine-სთან ერთად.

მეტი...

„ჩვენ არ ვუჭერთ მხარს ტაივანის დამოუკიდებლობას“, – განაცხადა აშშ-ის პრეზიდენტმა ჩატარებულ არჩევნებთან დაკავშირებით. ცნობისთვის, ტაივანის საპრეზიდენტო არჩევნებში მმართველი პარტიის კანდიდატმა უილიამ ლაიმ გაიმარჯვა.

მეტი...

კოლუმბიაში მეწყერი ჩამოწვა, რის შედეგადაც სულ მცირე 18 ადამიანი დაიღუპა, 30-მდე კი დაშავდა. მეწყერმა დაფარა ქალაქების, მედელინისა და კუბდოს დამაკავშირებელი გზატკეცილი. ადგილობრივი მედიის ცნობით, მიმდინარეობს სამძებრო-სამაშველო სამუშაოები. ვარაუდობენ, რომ რამდენიმე ადამიანი მიწის მასის ქვეშაა მოყოლილი, თუმცა ძლიერი წვიმა სამუშაოებს აფერხებს.

მეტი...

საფრანგეთის ახალი საგარეო საქმეთა მინისტრი, სტეფან სეჟორნე, პირველი ოფიციალური ვიზიტით კიევში ჩავიდა. საფრანგეთის საგარეო საქმეთა სამინისტროს ინფორმაციით, სეჟორნე კიევში ჩავიდა, რათა დიპლომატიური ძალისხმევა გააგრძელოს და საფრანგეთის ერთგულება კიდევ ერთხელ დაადასტუროს ,,თითქმის 2 წელია, უკრაინა ფრონტის ხაზზე თავისი სუვერენიტეტის დასაცავად და ევროპის უსაფრთხოების უზრუნველსაყოფად იბრძვის. საფრანგეთის დახმარება გრძელვადიანია. ეს არის ის, რის სათქმელადაც კიევში, ჩემი პირველი მოგზაურობით, ჩამოვედი,” – ამბობს სეჟორნე. უკრაინული მედია კი აღნიშნავს, რომ თავდაპირველად საგარეო საქმეთა სამინისტროს ყოფილი ხელმძღვანელის, კატრინ კოლონას ვიზიტი იგეგმებოდა. თუმცა, მთავრობაში საკადრო გადანაცვლებებმა გეგმები შეცვალა.

მეტი...

,,გასულ 24 საათში, რუსმა ოკუპანტებმა ხერსონის ოლქი 71-ჯერ დაბომბეს”. ინფორმაციას ხერსონის ოლქის ხელმძღვანელი, ალექსანდრე პროკუდინი ავრცელებს. თავდასხმების შედეგად დაიღუპა 2 მშვიდობიანი მოქალაქე. ,,გასული დღის განმავლობაში მტერმა 71 ჭურვი ისროლა, ნაღმმტყორცნებიდან, არტილერიიდან, MLRS-დან, ტანკებიდან, BpLA-დან, ხოლო ავიაციიდან 424 ჭურვი,” – აცხადებს პროკუდინი. მისი თქმით, რუსი სამხედროების სამიზნე საცხოვრებელი კვარტალი და სასწავლო დაწესებულების ტერიტორია იყო.

მეტი...

ნიუ-იორკის უზენაესმა სასამართლომ აშშ-ს ყოფილი პრეზიდენტს, დონალდ ტრამპს, New York Times-ისა და 2 გამომძიებელი ჟურნალისტისთვის  400 000-მდე აშშ დოლარის გადახდა დააკისრა. მოსამართლე რობერტ რიდის გადაწყვეტილებით, ტრამპმა გამოცემასა და ჟურნალისტებს მათ წინააღმდეგ შეტანილი წარუმატებელი სარჩელის სასამართლო ხარჯების ასანაზღაურებლად უნდა გადაუხადოს. ,,დღევანდელი გადაწყვეტილება აჩვენებს, რომ შტატის ახლად მიღებულ ანტი-SLAPP წესდება პრესის თავისუფლების დასაცავად ძლიერი ძალა შეიძლება იყოს. ეს სასამართლოს გზავნილია მათთვის, ვისაც ჟურნალისტების გასაჩუმებლად სასამართლო სისტემის ბოროტად გამოყენება უნდათ,” – განაცხადა New York Times-ის სპიკერმა, დანიელ როუდს ჰამ. ცნობისთვის, 2021 წელს ტრამპმა New York Times-ის, მისი სამი ჟურნალისტისა და საკუთარი ძმისშვილის, მერი…

მეტი...

რუსეთის სახელმწიფო დუმა განიხილავს ახალ კანონპროექტს, რომელიც ნასამართლებ უცხო ქვეყნის მოქალაქეებს, თავდაცვის სამინისტროსთან თანამშრომლობის საშუალებას მისცემს. ინიციატივა ტულის ოლქის პარლამენტს ეკუთვნის. ავტორების თქმით, კანონი ხელს შეუწყობს “სპეციალური სამხედრო ოპერაციის” წარმატებით გაგრძელებას. ,,იმის გათვალისწინებით, რომ დღევანდელი კანონებით უცხო ქვეყნის მოქალაქეს რუსეთის შეიარაღებულ ძალებში მსახურობის უფლება აქვს, მიზანშეწონილია ამ კანონის მიღებაც,” – ვკითხულობთ მიმართვაში. ექსპერტების აზრით, ახალ კანონპროექტს ერთადერთი დანიშნულება აქვს, რუსეთს სურს ისე შეავსოს საკუთარი შეიარაღებული ძალების რიგები, რომ საყოველთაო მობილიზება არ გამოაცხადოს და რუსეთის მოქალაქეების უკმაყოფილება არ გაამწვავოს.

მეტი...

ჩინეთში, ქვანახშირის მაღაროში მომხდარი აფეთქების შედეგად, სულ მცირე, 10 ადამიანი დაიღუპა. უგზო-უკვლოდ დაკარგულად მიიჩნევა 6. სამძებრო-სამაშველო სამუშაოები ამ დრომდე გრძელდება. შემთხვევა გუშინ, 12 იანვარს, პინგდინშანში, ადგილობრივი დაახლოებით 12:55 საათზე მოხდა. აფეთქების დროს ქვანახშირის მაღაროში 45 ადამიანი იმყოფებოდა.

მეტი...

რუსეთის იუსტიციის სამინისტრომ მწერალი ბორის აკუნინი (გრიგორი ჩხარტიშვილი) “უცხოელ აგენტად” გამოაცხადა. „ის ეწინააღმდეგებოდა უკრაინაში სპეცოპერაციას, ავრცელებდა ცრუ ინფორმაციას, რომელიც მიზნად ისახავდა რუსეთის ფედერაციის, ისევე როგორც რუსეთის ფედერაციის შეიარაღებული ძალების ნეგატიური იმიჯის შექმნას. მან მონაწილეობა მიიღო უკრაინის შეიარაღებული ძალების მხარდასაჭერ ღონისძიებებში. მონაწილეობდა უცხოელი აგენტების შეტყობინებების შექმნასა და გავრცელებაში“, – აცხადებს იუსტიცია. ცნობისთვის, რუსეთის ფინანსური მონიტორინგის ფედერალურმა სამსახურმა აკუნინი “ტერორისტებისა და ექსტრემისტების” რეესტრში შეიყვანა. მოსკოვის თეატრმა კი მის ნაწარმოებებზე შექმნილი სპექტაკლები გააუქმა. მწერალმა რუსეთი ჯერ კიდევ 2014 წელს, ყირიმის ანექსიისა და დონბასის ომის დაწყების შემდეგ დატოვა.

მეტი...

იაპონიაში მიწისძვრის შედეგად დაღუპულთა რაოდენობა 215-მდე გაიზარდა. 37 ადამიანი კი ამ დრომდე დაკარგულად მიიჩნევა. ნანგრევებში ადამიანებს ისევ ეძებენ მაგრამ, სამძებრო სამუშაოებს დიდთოვლობა აფერხებს. შეგახსენებთ, რომ პირველ იანვარს ნოტოს ნახევარკუნძულზე მიწისძვრების სერია მოხდა. ყველაზე ძლიერმა, 7,6 მაგნიტუდის სიმძლავრის მიწისძვრამ, ერთ მეტრზე მეტი სიმაღლის ცუნამის ტალღები გამოიწვია.

მეტი...

აშშ-მა “ჰუსიტების” წინააღმდეგ დამატებითი საჰაერო იერიშები განახორციელა. აშშ-ის ცენტრალური სარდლობის ცნობით, დღეს განხორციელებული დარტყმების მიზანს “ჰუსიტების” სარადარო სისტემების განადგურება წარმოადგენდა, რათა მათ წითელ ზღვაში მოძრავ კომერციულ გემებზე შეტევების განხორციელება ვეღარ შეძლონ. შეგახსენებთ, რომ გუშინ, 12 დეკემბერს, აშშ-ისა და დიდი ბრიტანეთის საჰაერო ძალებმა იემენში, “ჰუსიტების” წინააღმდეგ საჰაერო დარტყმები განახორციელეს. ამერიკულმა ავიამზიდებმა და ბრიტანულმა ავიაციამ, ფაქტობრივად, ერთდროულად, “ჰუსიტების” ბაზებზე წერტილოვანი თავდასხმები განახორციელეს. აფეთქებების შედეგად, მეამბოხეების სამხედრო ინფრასტრუქტურის უდიდესი ნაწილია განადგურებული.

მეტი...

უკრაინის მთელ ტერიტორიაზე საჰაერო განგაში გამოცხადდა. რუსი ოკუპანტების სარაკეტო იერიშები ამ დრომდე გრძელდება და საჰაერო თავდაცვა მთელი ქვეყნის მასშტაბით მუშაობს. ,,უკრაინამ დედაქალაქისკენ მიმართული ჰიპერბგერითი რაკეტა “კინჟალი” მოიგერია,” – წერს უკრაინის საჰაერო ძალები Telegram-ზე. უკრაინული მედიის ინფორმაციით, დღეს დილით აფეთქებების ხმა დნეპროპეტროვსკისა და კიროვოგრადის ოლქებშიც ისმოდა. დაშავებულებისა და მსხვერპლის შესახებ ინფორმაცია ჯერჯერობით არ გავრცელებულა.

მეტი...