დღე: იანვარი 16, 2024

ევროკავშირის საგარეო ქმედებათა სამსახური უკრაინაში ევროკავშირის ქვეყნების მიერ იარაღის მიწოდების აუდიტის ჩატარებას გეგმავს. „ფაინენშელ თაიმსის“ ინფორმაციით, აუდიტის შედეგების წარდგენა ევროკავშირის ლიდერების სამიტზე იგეგმება, რომელით პირველ თებერვალს გაიმართება. აღნიშნული გადაწყვეტილება გერმანიის კანცლერის, ოლაფ შოლცის მოთხოვნას მოჰყვა, რომელმაც უკრაინაში ევროკავშირის ქვეყნების მიერ უკრაინისთვის იარაღის მიწოდებების შედარება მოითხოვა. შოლცმა უკრაინისთვის იარაღის მიწოდების მოცულობას, რომელსაც წევრი ქვეყნების უმეტესობა 2024 წლისთვის გეგმავს, ძალიან მცირე უწოდა და მოუწოდა დახმარების გაზრდისა და ამ გეგმების შესახებ გადაწყვეტილების მიღებას ევროკავშირის სამიტამდე. მეტი გამჭვირვალობის ამ მოწოდებას მხარს უჭერენ ბრიუსელის ოფიციალური პირები, რომლებიც თვლიან, რომ ზოგიერთ ქვეყანას შეუძლია მეტი იარაღი მიაწოდოს…

,,თუ პუტინი უკრაინაში გაიმარჯვებს, ის იქ არ გაჩერდება და სხვა ბოროტი აქტორების წახალისება მოხდება,”–ამის შესახებ დიდი ბრიტანეთის პრემიერ-მინისტრმა, რიში სუნაკმა პარლამენტში სიტყვით გამოსვლისას განაცხადა. ,,ჩვენ უკრაინის გვერდით დღეს, ხვალ და რამდენიც საჭირო იქნება, იმდენ ხანს ვიქნებით. თუ პუტინი უკრაინაში გაიმარჯვებს, ის იქ არ გაჩერდება და სხვა ბოროტი აქტორების წახალისება მოხდება. სწორედ ამიტომ, უკრაინის უსაფრთხოება ჩვენს უსაფრთხოებას ნიშნავს,”- განაცხადა სუნაკმა.

უკრაინის საგარეო საქმეთა მინისტრის, დმიტრო კულებას განცხადებით, ყველაზე რთული მოლაპარაკებები მაშინაა, როცა უბრალოდ გინდა, რომ “ოპონენტს ცხვირში უთავაზო.” მისი თქმით, ასეთი შემთხვევა 2-3-ჯერ ჰქონდა. ,,ყველაზე რთული მოლაპარაკებები მაშინ არის, როცა უბრალოდ გრძნობ, რომ გინდა ოპონენტს ცხვირში უთავაზო, მაგრამ ამის გაკეთება არ შეგიძლია. ეს მე 2-3-ჯერ დამემართა და ერთ-ერთი ასეთი შემთხვევა იყო, როდესაც 2022 წლის გაზაფხულზე ანტალიაში ლავროვს შევხვდი,”- განაცხადა კულებამ.

გერმანელმა ფერმერებმა ბერლინის ქუჩები 6 ათასი ტრაქტორით გადაკეტეს. სოფლის მეურნეობის სექტორის თანამშრომელთა მასშტაბური საპროტესტო გამოსვლები უკვე კვირაა გრძელდება. ბერლინის პოლიციის განმარტებით, გერმანიის დედაქალაქში ფერმერთა ასოციაციის ორგანიზებით გამართულ აქციას 8 500 ადამიანი დაესწრო. გერმანელი ფერმერები მთავრობის გეგმის წინააღმდეგ გამოდიან, რომელიც სასოფლო-სამეურნეო სექტორში სუბსიდიების შემცირებას და საგადასახადო შეღავათების გაუქმებას ითვალისწინებს.

ხარკოვის ოლქის რეგიონულმა სამხედრო ადმინისტრაციამ 26 სოფლის ევაკუაცია გამოაცხადა. რეგიონული სამხედრო ადმინისტრაციის ხელმძღვანელის, ოლეგ სინეგუბოვის  თქმით, არაუსაფრთხო სიტუაციიდან გამომდინარე, საჭიროა ხალხის ევაკუაცია კუპიანსკის რაიონის კონტრაშევსკაიასა და კურილოვსკაიას თემებიდან. თემებიდან ადგილობრივი მოსახლეობის გაყვანა, რუსული არმიის სახიფათო შეტევების გამო გახდა საჭირო. აღნიშნულ თემებში 3043 ადამიანი ცხოვრობს, რომელთაგან 279 ბავშვია. ადგილობრივი ხელისუფლება პირობას დებს, რომ ყველა ევაკუირებული დაკმაყოფილდება საცხოვრებლით.

ერაყის ქურთისტანში, ერბილის აეროპორტის მახლობლად სამი უპილოტო საფრენი აპარატი ჩამოაგდეს. ადგილობრივი მედიის ინფორმაციით, დანაღმული უპილოტო აპარატების სამიზნე ერბილის აეროპორტში განთავსებული საერთაშორისო კოალიციის სამხედრო ბაზა იყო. ერაყის ქურთისტანის ანტიტერორისტული სამსახურის განცხადებაში არ არის ნათქვამი, იყო თუ არა მსხვერპლი ან ინფრასტრუქტურის დაზიანება თავდასხმის შედეგად. აღნიშნული ინციდენტი მას შემდეგ მოხდა, რაც ერბილი ირანის რევოლუციის გუშაგთა კორპუსმა ბალისტიკური რაკეტებით დაბომბა. ირანში თქვეს, რომ თავდასხმის სამიზნე ისრაელის დაზვერვის შტაბი იყო.

უკრაინის პრეზიდენტი ვოლოდიმირ ზელენსკი დავოსში ნატო-ს გენერალურ მდივანს, იენს სტოლტენბერგს შეხვდა. უკრაინის პრეზიდენტის  ინფორმაციით, იენს სტოლტენბერგთან მან განიხილა ბრძოლის ველზე არსებული სიტუაცია. მისივე ცნობით, განიხილეს უკრაინის თავდაცვითი საჭიროებები, მათ შორის, საჰაერო თავდაცვის გაძლიერება, ასევე ვაშინგტონში დაგეგმილი ნატო-ს სამიტისთვის მზადება და უკრაინისთვის უსაფრთხოების გარანტიებთან დაკავშირებით პარტნიორებთან მიმდინარე სამუშაო.  

უკრაინის პრეზიდენტის, ვოლოდიმირ ზელენსკის განცხადებით, უკრაინას შვეიცარიის მხარდაჭერის იმედი აქვს გლობალურ მუშაობაში, რათა სანქციების გვერდის ავლის ყველა სქემა დაბლოკოს. ,,უკრაინას შვეიცარიის მხარდაჭერის იმედი აქვს გლობალურ მუშაობაში, რათა სანქციების გვერდის ავლის ყველა სქემა დაბლოკოს. ამჟამად, ჩვენ ვხედავთ, რომ რუსული რაკეტები, რომლებიც ატერორებენ ჩვენს ქალაქებს, სხვა იარაღი, რომელსაც ისინი იყენებენ და მათი სამხედრო ინდუსტრიის მუშაობა ეფუძნება ბუნდოვან კავშირებს მსოფლიოს წამყვან ქვეყნებთან. თითოეულ რუსულ რაკეტას აქვს ათობით კომპონენტი, რომელიც შექმნილის სხვა ქვეყნების, მათ შორის ევროპის კომპანიების მიერ. ასეთი ელექტრონული კომპონენტების გარეშე, რუსული ტერორი გაცილებით ნაკლები იქნებოდა რაკეტების უფრო რთული წარმოების გამო. ექსპორტის ასეთ…