დღე: იანვარი 21, 2024

რუსეთის პრეზიდენტი, ვლადიმერ პუტინი მთელი უკრაინის ოკუპაციას ცდილობს, მას არასდროს სურდა მშვიდობა. ამის შესახებ უკრაინის პრეზიდენტმა, ვოლოდიმირ ზელენსკიმ განაცხადა. გარდა ამისა, მისი თქმით, არ განიხილავს ისეთი სამშვიდობო შეთანხმების ხელმოწერას, რომლის მიხედვითაც დონბასის და ყირიმის დროებით ოკუპირებული ტერიტორიები რუსეთის ფედერაციას გადაეცემა. „თუ ჩვენ გვინდა შევაჩეროთ პუტინი, თუ მსოფლიოს არ სურს, რომ ეს განმეორდეს, იმისთვის, რომ ეს აგრესია რამდენიმე წელიწადში არ განმეორდეს, მაშინ ჯობია ახლავე გავუმკლავდეთ მას“, – განაცხადა ზელენსკიმ.

ახალი წლიდან, უკრაინის დროებით ოკუპირებული ტერიტორიების საავადმყოფოებში სამედიცინო მომსახურების მიღება მხოლოდ რუსული პასპორტის ქონის შემთხვევაშია შესაძლებელი. ამის შესახებ ინფორმაციას “ეროვნული წინააღმდეგობის ცენტრი” ავრცელებს. ,,წლის დასაწყისიდან ოკუპანტები დროებით ოკუპირებულ ტერიტორიებზე მცხოვრებლებს რუსული პასპორტის არქონის გამო მკურნალობაზე უარს ეუბნებიან. გამონაკლისია მხოლოდ სასწრაფო დახმარება კრიტიკულ სიტუაციებში. ამ გზით, ოკუპანტებმა, ლეგალურად, TOT-ის მაცხოვრებლები მშობლიურ მიწაზე “უცხოელებთან” გააიგივეს”, – განაცხადეს აქტივისტებმა. როგორც უკრაინული მედია იტყობინება, მტერმა დროებით ოკუპირებულ ტერიტორიებზე ადგილობრივი მოსახლეობის იძულებითი პასპორტირებისა და კონტროლის ახალი მეთოდი გამოიგონა. ოკუპანტები გეგმავენ ინტერნეტმომხმარებელთა პასპორტით სავალდებულო გადამოწმების შემოღებას. ანუ, ყველა მომხმარებელს უნდა ჰქონდეს რუსეთის ფედერაციის პასპორტი, რათა შეძლოს…

ბელარუსის პრეზიდენტი ალექსანდრ ლუკაშენკო შეშის ჩეხის დროს დაშავდა. ადგილობრივი მედიის ცნობით, 20 იანვარს ლუკაშენკო მანქანათმშენებელ ქარხანა Belgee-ს ესტუმრა, სადაც თქვა, რომ “80 კილოგრამიანი მორი ტერფზე დაეცა”. ,,შეშას ვჩეხავდი და 80 კილოგრამიანი მორი დამეცა ტერფზე. ვიარე, ვიარე – თითქოს არაფერი”, – ამბობს ლუკაშენკო. მიღებული დაზიანების გამო, ლუკაშენკომ მოგილევის ოლქში დაგეგმილ ჰოკეის ამხანაგურ მატჩში მონაწილეობა ვერ მიიღო.

რომის პაპმა ფრანცისკემ ჰაიტიზე გატაცებული ექვსი მონაზვნის გათავისუფლება ითხოვა. „როდესაც მათ გათავისუფლებას ვითხოვ, ვლოცულობ ქვეყანაში სოციალური ჰარმონიისთვის და მოვუწოდებ ყველას, შეწყვიტოს ძალადობა, რომელიც ამ ძვირფას ხალხს ამდენ ტანჯვას აყენებს“, – განაცხადა რომის პაპმა შეგახსენებთ, რომ ჰაიტიში უნივერსიტეტისკენ მიმავალ ავტობუსში მყოფი წმინდა ანას დების კონგრეგაციის ექვსი მონაზონი გაიტაცეს. მათთან ერთად გაიტაცეს ავტობუსში მყოფი სხვა პირებიც, მათ შორის მძღოლიც. ჯერჯერობით უცნობია გატაცებაში ბრალდებულის ვინაობა.

ავღანეთში, ბადახშანის მთებში, კერძო რუსული თვითმფრინავი ჩამოვარდა. ბორტზე 6 ადამიანი იმყოფებოდა – 2 მგზავრი და ეკიპაჟის 4 წევრი. როგორია მათი მდგომარეობა, უცნობია. თვითმფრინავი რადარებდან 20 იანვრის ღამეს გაქრა. ამ ეტაპზე მიმდინარეობს მისი სამძებრო სამუშაოები. ,,თვითმფრინავი ეკუთვნის შპს “ატლეტიკ ჯგუფს” და კერძო პირს. ხომალდი ასრულებდა ჩარტერულ რეისს გაია (ინდოეთი) – ტაშკენტი (უზბეკეთი) – ჟუკოვსკი (რუსეთი) მარშრუტზე,” – ნათქვამია რუსეთის საჰაერო ტრანსპორტის ფედერალური სააგენტოს პრესსამსახურის მიერ გავრცელებულ განცხადებაში. როგორც რუსული სააგენტო TASS წერს, წინასწარი მონაცემებით, ავარიის მიზეზი ძრავის გაუმართაობა გახდა.

ისრაელის თავდაცვის ძალები აცხადებს, რომ ღაზის სექტორის სამხრეთ ნაწილში, ქალაქ ხან იუნისში აღმოაჩინეს გვირაბი, სადაც “ჰამასს” მძევლები ჰყავდა. ,,ისრაელის თავდაცვის ძალების ჯარისკაცები შევიდნენ გვირაბში, სადაც მათ ტერორისტები შეხვდათ… ბრძოლა ტერორისტების ლიკვიდაციით დასრულდა. გვირაბში განთავსებული იყო ასაფეთქებელი ნივთიერებები”, – განაცხადა IDF-ის სპიკერმა, დანიელ ჰაგარმა. როგორც ჰაგარმა აღნიშნა, გვირაბში მათ მძევლები არ დახვდათ, თუმცა როგორც ირკვევა “ჰამასს” დაახლოებით 20 მძევალი არაამიანურ პირობებში ჰყავდა.

ბავარიაში, ერთ-ერთ გასართობ პარკში ხანძარი გაჩნდა. ცეცხლი რამდენიმე ხის შენობას გაუჩნდა. ხანძრის გამომწვევი მიზეზი ჯერჯერობით უცნობია, შემთვევის შედეგად არავინ დაშავებულა. გავრცელებული ინფორმაციით, პარკის გვერდით მდებარე სასტუმროდან მაცხოვრებლები უსაფრთხო ადგილას გადაიყვანეს. პარკის ტერიტორია დაახლოებით 200 ათასი კვადრატული მეტრია. პოლიციამ ზარალი მილიონ ევროდ შეაფასა.

სოხუმში დაიწვა ცენტრალური საგამოფენო დარბაზი, სადაც აფხაზეთის ეროვნული გალერეის ფონდი ინახება. გავრცელებული ინფორმაციით, ხანძარი შენობის მეორე სართულზე ღამის 4 საათზე გაჩნდა. ცეცხლის ჩაქრობაში 11 სახანძრო-სამაშველო ბრიგადა მონაწილეობდა, თუმცა ის მთელ შენობაზე მაინც გავრცელდა და ,,ოქროს ფონდი” მთლიანად დაიწვა. განადგურებულია 4000 ნამუშევარი. მათი გადარჩენა, სავარაუდოდ, შენობაში მაღალი დაკვამლიანების გამო ვერ მოხერხდა.

სლოვაკეთი რუსეთსა და ბელორუსთან კულტურის სფეროში თანამშრომლობის განაახლებს გეგმავს. აღნიშნული გადაწყვეტილება უწყების ხელმძღვანელმა, მარტინა შიმკოვიჩოვამ, მიიღო. ,,მსოფლიოში ათობით სამხედრო კონფლიქტია და, ჩვენი აზრით, ამის გამო ხელოვანები და კულტურა არ უნდა დაზარალდნენ,” – განაცხადა შინკოვიჩმა. შეგახსენებთ, რომ სლოვაკეთმა კულტურის სფეროში თანამშრომლობა რუსეთთან და ბელარუსთან უკრაინაში ომის დაწყების შემდეგ, 2022 წლის მარტში შეაჩერა. მაშინ სლოვაკეთის კულტურის მინისტრი ნატალია მილანოვა იყო. კულტურის სამინისტროსა და მის თანამშრომლებს ამ დრომდე ეკრძალებოდათ აგრესორი ქვეყნების კულტურის სამინისტროებთან ნებისმიერი სახის ურთიერთობა. თანამშრომლობა შესაძლებელი იყო მხოლოდ ცალკეულ მოქალაქეებთან, რომელთაც კავშირი არ ჰქონდათ რუსულ და ბელარუსულ ხელისუფლებასთან და მხარს არ…

გერმანიის ბუნდესტაგმა მიიღო კანონი, რომელიც ამკაცრებს ზომებს იმ უცხოელების დეპორტაციისთვის, რომლებსაც არ აქვთ გერმანიაში დარჩენის სამართლებრივი საფუძველი. „დოიჩე ველეს” ცნობით, ახალი კანონის მიზანია უზრუნველყოს, რომ მიგრანტებმა, რომლებსაც უარი ეთქვათ ლტოლვილის სტატუსზე, დატოვონ გერმანია და დაბრუნდნენ თავიანთ ქვეყნებში. ის ასევე ითვალისწინებს უფრო მკაცრ ჯარიმებს ადამიანების კონტრაბანდაში მონაწილე პირებისთვის. ერთ-ერთი ყველაზე მნიშვნელოვანი ცვლილება არის დეპორტაციის მოლოდინში არალეგალი ემიგრანტების დაკავების მაქსიმალური ვადის 10-დან 28 დღემდე გახანგრძლივება. გარდა ამისა, პოლიციას მიენიჭა უფლება, დეპორტაციას დაქვემდებარებული უცხოელები არა მხოლოდ ლტოლვილთა საერთო საცხოვრებლების იმ შენობებში ეძებოს, სადაც ისინი ცხოვრობენ, არამედ სხვაგანაც. ეს ქმედებები ღამის საათებშიც დაიშვება, თავად…

თელ-ავივში ათასობით დემონსტრანტმა საპროტესტო აქციები გამართა. მძევლებისა და უგზო-უკვლოდ დაკარგულების ოჯახების ფორუმის მიერ ორგანიზებული აქციების მონაწილეები მოითხოვდნენ ღაზაში ბრძოლების შეწყვეტას და “ჰამასთან” მძევლების დაბრუნების მიზნით, შეთანხმების მიღწევას. ასევე, თელ-ავივსა და იერუსალიმში საპროტესტო აქციები პრემიერ-მინისტრ ბენიამინ ნეთანიაჰუს გადადგომის მოთხოვნითაც გაიმართა. კესარიაში, ნეთანიაჰუს კერძო რეზიდენციის წინ შეკრებილი მომიტინგეები სკანდირებდნენ ,,შეთანხმება, ახლავე!“ ცნობისთვის, „ჰამასი“ ნებისმიერი შეთანხმების წინაპირობად ცეცხლის შეწყვეტას მოითხოვს.

რუსეთში, ლენინგრადის ოლქის უსტ-ლუგას პორტში კომპანია Novatek-ის ტერმინალს ცეცხლი გაუჩნდა. ინფორმაციას რეგიონის გუბერნატორი, ალექსანდრე დროზდენკო „ტელეგრამის“ არხზე ავრცელებს. „უსტ-ლუგას პორტში, კომპანია Novatek-ის ტერმინალში გაჩენილი ხანძრის შედეგად არავინ დაშავებულა ან დაღუპულა“, – წერს ის. რუსული მედიის ცნობით, კინგისეპის რაიონში „მაღალი მზადყოფნის რეჟიმი“ გამოცხადდა. ასევე, განხორციელდა ტერმინალის თანამშრომლების ევაკუაცია. ხანძრის გამომწვევი მიზეზი ჯერჯერობით უცნობია.

ბერლინში სატვირთო მანქანების მძღოლებმა საპროტესტო აქცია გამართეს. ბრანდერბურგის კარიბჭესთან მათ 500-მდე სატვირთო დააყენეს. აქციის მონაწილეებმა საგზაო გადასახადის გაზრდა გააპროტესტეს. შეგახსენებთ, რომ გერმანიის პარლამენტმა საწვავზე მომუშავე სატვირთო მანქანებისთვის გადასახადი გასული წლის ოქტომბერში გაზარდა, ელექტრო და წყალბადზე მომუშავე მანქანებს, კი საკანონმდებლო ცვლილება არ შეეხო.

გასული დღის განმავლობაში უკრაინელებსა და რუს ოკუპანტებს შორის 80 საბრძოლო შეტაკება მოხდა. ოკუპანტები ყველაზე აქტიურად კუპიანსკის მიმართულებით უტევდნენ. ინფორმაციას უკრაინის გენშტაბი ავრცელებს. ,,გასული დღის განმავლობაში 80 საბრძოლო შეტაკება მოხდა. მთლიანობაში, მტერმა განახორციელა 3 სარაკეტო და 4 საჰაერო დარტყმა. ასევე, განახორციელა 58 შეტევა სარაკეტო სისტემებიდან ჩვენი ჯარების პოზიციებსა და დასახლებულ პუნქტებზე. რუსული ტერაქტების შედეგად, დაიღუპნენ და დაშავდნენ მშვიდობიანი მოქალაქეები. განადგურდა და დაზიანდა 40-ზე მეტი საცხოვრებელი კორპუსი და სხვა სამოქალაქო ინფრასტრუქტურა”, – ნათქვამია გენშტაბის დილის ანგარიშში.

ერაყში მდებარე აშშ-ის საავიაციო ბაზას თავს დაესხნენ. საავიაციო ბაზა აინ-სა-ასადზე სარაკეტო დარტყმის შედეგად რამდენიმე ამერიკელი ჯარისკაცი დაშავდა. სამხედროებმა უმნიშვნელო დაზიანებები მიიღეს და მათ სიცოცხლეს საფრთხე არ ემუქრება. გავრცელებული ინფორმაციით, ბაზის მიმართულებით, რომელსაც აშშ-ის მეთაურობით მოქმედი კოალიციური ძალები იყენებენ, 10-მდე რაკეტა გაისროლეს. ცნობისთვის, ერაყში ამერიკულ საავიაციო ბაზაზე თავდასხმა იმ ფონზე მოხდა, როდესაც სირიის დედაქალაქზე დარტყმის შედეგად ირანის რევოლუციის გუშაგთა კორპუსის 5 წევრი მოკლეს. ირანმა მომხდარში ისრაელი დაადანაშაულა და შურისძიებით დაიმუქრა.

იტალიაში, ქურდობის მცდელობისთვის საქართველოს 3 და ლიეტუვის ერთი მოქალაქე დააკავეს. ადგილობრივი მედიის ცნობით, ისინი საცხოვრებელი კორპუსის პირველ სართულზე მდებარე ბინაში შესვლას ცდილობდნენ, თუმცა მეპატრონე სახლში დახვდათ. გავრცელებული ინფორმაციით, მათ გაქცევა სცადეს, თუმცა სამართალდამცავებმა ადგილზევე დააკავეს. დაკავების დროს კი პოლიციას წინააღმდეგობა გაუწიეს. დაკავებულების ჩხრეკისას ქურდობისთვის საჭირო ხელსაწყოები ამოიღეს. საქმეზე გამოძიება გრძელდება.