დღე: ოქტომბერი 13, 2023

„ახლა არ არის ნეიტრალიტეტის,  ცრუ ეკვივალენტურობისა ან უპატიებელის გამართლების დრო“, – ამის შესახებ  თელ-ავივში, აშშ-ის თავდაცვის მდივანმა ისრაელელ კოლეგასთან შეხვედრის შემდეგ გამართულ ერთობლივ ბრიფინგზე განაცხადა. მან ”ჰამასი” ტერორისტულ ორგანიზაციას ISIS-ის შეადარა. „ტერორიზმი გაუმართლებელია და ეს განსაკუთრებით ეხება ჰამასის ამ მძვინვარებას“ – განაცხადა ლოიდ ოსტინმა. მისივე თქმით, არავინ უნდა შეეცადოს ახლო აღმოსავლეთში განვითარებული მოვლენების თავის სასარგებლოდ გამოიყენოს, „ნებისმიერი ქვეყნისთვის, ნებისმიერი ჯგუფისთვის ან ვინმესთვის, ვინც ცდილობს ისარგებლოს ამ სისასტიკით, ჩვენ მხოლოდ ერთი სიტყვა გვაქვს: არ გააკეთოთ ეს“, – განაცხადა ოსტინმა.

დღეს რუსეთის ძალები, დნეპროპეტროვსკის ოლქის ქალაქ ნიკოპოლს 2-ჯერ დაესხნენ თავს. თავდასხმის შედეგად 2 მაშველი დაშავდა. საგანგებო სიტუაციების სამსახურის ინფორმაციით, დაზიანდა სახანძრო-სამაშველო მანქანაც. ,,ნიკოპოლის მაშველებმა შუადღისას მიიღეს შეტყობინება დაბომბვით გამოწვეული ხანძრის შესახებ. გაჩერებაზე მიკროავტობუსს ცეცხლი გაუჩნდა. მაშველებმა მისი ჩაქრობა დაიწყეს. ამ დროს რუსებმა ისევ გაისროლეს. შედეგად ორი მაშველი დაიჭრა,” – ნათქვამია განცხადებაში.

პეკინში ისრაელელ დიპლომატს თავს დაესხნენ. ისრაელის საგარეო საქმეთა სამინისტროს ინფორმაციით, პეკინში ისრაელის საელჩოს თანამშრომელი საავადმყოფოში გადაიყვანეს და მისი მდგომარეობა სტაბილურია. უწყების ცნობით, შემთხვევაზე გამოძიება მიმდინარეობს.

ევროკომისიის პრეზიდენტი, ურსულა ფონ დერ ლაიენი და ევროპარლამენტის პრეზიდენტი, რობერტა მეცოლა ისრაელში ჩავიდნენ. ,,აქ ვართ, რათა გამოვხატოთ სოლიდარობა მას შემდეგ, რაც ისრაელი თაობების განმავლობაში ყველაზე საშინელი ტერორისტული თავდასხმის წინაშე აღმოჩნდა. ტერორი ვერ გაიმარჯვებს. მნიშვნელოვანია, როგორ ვუპასუხებთ. ჩვენ შეგვიძლია და უნდა შევაჩეროთ “ჰამასი”, გავაკეთოთ ყველაფერი, რაც შეგვიძლია ჰუმანიტარული შედეგების შესამსუბუქებლად,” – წერს მეცოლა.

ქალების მიმართ სექსისტური და ძალადობრივი განცხადებების გამო, უკრაინის პოლიციამ ალექსეი არესტოვიჩის წინააღმდეგ გამოძიება დაიწყო. დახურულ „ფსიქოლოგიურ სემინარებზე“ არესტოვიჩმა პრეზიდენტის აპარატის ყოფილი მრჩეველ ქალებს არსებები უწოდა, რომლებიც “ჯერ უნდა მოტ*ნა, შეურაცხყოფა მიაყენო და გაუჩერებლად დაახრჩო.” ქალებმა კი კაცებს “როგორც კერპებს, ისე უნდა უყურონ.” 25 სექტემბერს კი რადას დეპუტატმა პოლიციაში განცხადება შეიტანა არესტოვიჩის მიერ გავრცელებული ვიდეოს გამო. ოფიციალური ინფორმაციით, ახლა პოლიცია გამოძიებას ჩაატარებს. გარდა ამისა, საქმე გადაეგზავნა კიევის საქალაქო პროკურატურას. სოვსუნმა ხაზგასმით აღნიშნა, რომ ეს საქმე მუდმივ საზოგადოებრივ კონტროლს მოითხოვს. „თუ საქმე ლოგიკურ დასასრულამდე მიიყვანს, ეს იქნება უკრაინისთვის მნიშვნელოვანი პრეცედენტი, იმის დასტური,…

აშშ-ის თავდაცვის მდივანი ლოიდ ოსტინი თელ ავივში ჩავიდა. ლოიდ ოსტინი მთავრობის ლიდერებთან შეხვედრას და აშშ-ის იარაღი და უსაფრთხოების დახმარების ნახვას გეგმავს, რომელიც ვაშინგტონმა მიაწოდა ისრაელს. მედიის ინფორმაციით,  მოსალოდნელია, რომ ოსტინი შეხვდება ისრაელის პრემიერ-მინისტრ ბენიამინ ნეთანიაჰუს, თავდაცვის მინისტრ იოავ გალანტს.  

უნგრეთი არ დაუშვებს ტერორისტული ორგანიზაციების მხარდამჭერი აქციების ჩატარებას, – ამის შესახებ უნგრეთის პრემიერ-მინისტრმა, ვიქტორ ორბანმა განაცხადა. მისი თქმით, უნგრეთი „ტერორისტული ორგანიზაციების“ მხარდამჭერი აქციების ჩატარებას, რადგან მისი თქმით, უნგრეთის ყველა მოქალაქემ უნდა იგრძნოს თავი უსაფრთხოდ. „აქციის ჩატარების მცდელობები იყო უნგრეთშიც, მაგრამ ჩვენ არ დავუშვებთ ტერორისტული ორგანიზაციების მხარდამჭერ აქციებს, რადგან ეს უნგრეთის მოქალაქეებისთვის ტერორისტული საფრთხე იქნება. ჩვენ არ შეგვიძლია, დავუშვათ, რომ ერთმა უნგრელმა მაინც, განურჩევლად მათი რწმენისა თუ წარმოშობისა, თავი დაუცველად იგრძნოს“, – განაცხადა ორბანმა. „შემაძრწუნებელია, რომ მთელ ევროპაში იმართება ტერორისტების მხარდამჭერი აქციები“, – განაცხადა ორბანმა.

ევროკომისიის და ევროპარლამენტის პრეზიდენტები, ურსულა ფონ დერ ლაიენი და რობერტა მეცოლა პარასკევს ისრაელში ჩავლენ. ურსულა ფონ დერ ლაიენი და რობერტა მეცოლა ისრაელის ოფიციალურ პირებს შეხვდებიან და სოლიდარობას გამოუცხადებენ “ჰამასის” თავდასხმების მსხვერპლებს.