დღე: ოქტომბერი 11, 2023

დიდი ბრიტანეთის საგარეო საქმეთა მინისტრი, ჯეიმს კლევერლი ისრაელში ჩავიდა. „როიტერი“ წერს, რომ დიდმა ბრიტანეთმა, დასავლელ მოკავშირეებთან ერთად, მტკიცე მხარდაჭერა გამოუცხადა ისრაელს და „ჰამასის“ თავდასხმები დაგმო. „საგარეო საქმეთა მინისტრი დღეს ისრაელში ჩავიდა, რათა გამოხატოს დიდი ბრიტანეთის ურყევი სოლიდარობა ისრაელელი ხალხის მიმართ „ჰამასის“ ტერორისტული თავდასხმების შემდეგ“, – განაცხადა საგარეო უწყების წარმომადგენელმა.    

უკრაინის პრეზიდენტის, ვოლოდიმირ ზელენსკის განცხადებით, ნატო-ს მხარდაჭერა მნიშვნელოვანია ზამთრის განმავლობაში, განსაკუთრებით კი, ჰაერსაწინააღმდეგო თავდაცვის სფეროში. „არსებობს პრიორიტეტები, საჰაერო თავდაცვითი სისტემები, სხვადასხვა საკითხი. ჩვენ გვჭირდება ისინი ძალიან კონკრეტულ გეოგრაფიულ წერტილებში ჩვენს მიწაზე, რათა შევინარჩუნოთ ენერგოქსელები, ხალხი, მარცვლეულის ტრანზიტი, მარშრუტი აფრიკისთვის, აზიისა და მსოფლიოსთვის. მნიშვნელოვანია შორი რადიუსის რაკეტები და შეიარაღება, სულ ერთია, როგორ ეძახით მას, პრობლემა იმაშია, როგორ იშოვით მას, რადგან საჭიროა ისინი ჩვენი მიწიდან რუსეთის გასაგდებად“, -განაცხადა ზელენსკიმ.

ლიბანიდან ისრაელის მიმართულებით გასროლილი რაკეტების საპასუხოდ ისრაელმა ლიბანის მიმართულებით რაკეტები გაუშვა.​ მანამდე ლიბანიდან ისრაელის მიმართულებით რაკეტა ისროლეს, რომლის სამიზნეც საზღვარზე არსებული ისრაელის შეიარაღებული ძალების პოსტი იყო. ხოლო ლიბანის სახელმწიფო მედია აცხადებს, რომ ორი ტერიტორიაა დაბომბილი. „დაირას მიმდებარე ტერიტორია დაიბომბა მტრის არტილერიის მიერ, ხოლო იარინის მიმდებარე ტერიტორიას ფოსფორის ჭურვები ურტყამს“, – განაცხადა ლიბანის ეროვნულმა საინფორმაციო სააგენტომ. ტერორისტულმა დაჯგუფება „ჰესბოლამ“ თავდასხმაზე პასუხისმგებლობა აიღო.

ისრაელის თავდაცვის ძალების სპიკერის, ჯონათან კონრიკუსის განცხადებით, თავდაცვის ძალებმა ღაზასთან ბარიერი აღადგინეს. მისივე თქმით,  ისრაელის თავდაცვის ძალებმა ღაზის საზღვრებთან ახლოს ჯავშანტექნიკა, საარტილერიო კორპუსი და 300 000 რეზერვისტი გაგზავნა. „ისინი ახლოს არიან ღაზის სექტორთან და ემზადებიან იმ მისიის შესასრულებლად, რომელიც ისრაელის მთავრობამ მოგვცა და ეს არის იმის უზრუნველყოფა, რომ „ჰამასს“ ომის დასასრულს არ ექნება სამხედრო შესაძლებლობები, რომლითაც მათ შეეძლებათ, დაემუქრონ ან მოკლან ისრაელის მშვიდობიანი მოქალაქეები“, – განაცხადა კონრიკუსმა.  

აშშ-ის სამხედრო ტექნიკა ისრაელში ჩავიდა. მედიის ინფორმაციით, პირველი თვითმფრინავი ამერიკული სამხედრო აღჭურვილობით, ცოტა ხნის წინ დაეშვა სამხრეთ ისრაელში, ნევატიმის საავიაციო ბაზაზე. „ომის დროს რეგიონული უსაფრთხოებისა და სტაბილურობის უზრუნველსაყოფად ჩვენს სამხედროებს შორის თანამშრომლობა მნიშვნელოვანია“, – ნათქვამია ისრაელის თავდაცვის ძალების განცხადებაში.