დღე: ოქტომბერი 29, 2023

ხერსონის რაიონში დაბომბვის შედეგად ხუთი ადამიანი დაშავდა. რუსულმა ძალებმა ბერისლავის, კახოვისა და ხერსონის რაიონებს დაარტყეს. კაზაცკიში დაშავდა 67 წლის ქალი, ივანოვკაში – 60 წლის ქალი და 41 წლის კაცი, ხერსონში – 82 წლის ქალი და 53 წლის მამაკაცი – აცხადებენ შინაგან საქმეთა სამინისტროში. დაბომბვის შედეგად დაზიანდა 20-ზე მეტი სახლი, სკოლა, მაღაზიები, საოფისე ფართები, ადმინისტრაციული შენობები და მანქანები. ადგილზე სპეციალური სამსახურები მუშაობენ.

ლატვიის შინაგან საქმეთა სამინისტრო, სახელმწიფო პოლიცია, სახელმწიფო სასაზღვრო სამსახური და სახელმწიფო სახანძრო-სამაშველო სამსახური უკრაინის სახელმწიფო პოლიციას 12 უპილოტო საფრენ აპარატს უსასყიდლოდ გადასცემს. ამის შესახებ ლატვიის შინაგან საქმეთა მინისტრმა, რიკარდს კოზლოვსკიმ ლიეტუვაში, უკრაინის შინაგან საქმეთა მინისტრთან, იგორ კლიმენკოსთან შეხვედრისას განაცხადა. შეხვედრისას მინისტრებმა უკრაინაში არსებული მდგომარეობა განიხილეს. ასევე ისაუბრეს ომის პირობებში უკრაინის შინაგან საქმეთა ორგანოების გამოცდილებაზე.

ღაზის სექტორის ათასობით მცხოვრები გაეროს პალესტინის ლტოლვილთა სააგენტოს საწყობებსა და სადისტრიბუციო ცენტრებში შეიჭრა. არსებული ინფორმაციით, ცენტრები დაარბიეს და იქ შენახული პროდუქტი და პირველადი მოხმარების საგნები დაიღეს. ,,ეს არის შემაშფოთებელი ნიშანი იმისა, რომ სამი კვირის ომისა და ღაზას მჭიდრო ბლოკადის შემდეგ, სოციალური წესრიგი იწყებს ნგრევას”, – თქვა თომას უაიტმა, UNRWA-ს საქმეთა დირექტორმა ღაზას სექტორში.

ისრაელის თავდაცვის ძალებმა ღაზას ქალაქის საავადმყოფოს ევაკუაციისკენ მოუწოდა. მათი სპიკერის თქმით, ღაზის ქალაქ ალ-კუდსის ჰოსპიტალმა ისრაელის ხელისუფლებისგან ევაკუაციის მოთხოვნით დღეს ორი ზარი მიიღო. სატელეფონო ზარებში საუბარი იყო “ნათელ და პირდაპირ საფრთხეზე, რომ საავადმყოფოს ევაკუაცია დაუყოვნებლივ უნდა მომხდარიყო”, წინააღმდეგ შემთხვევაში, შენობაში მყოფი ყველა ადამიანის სიცოცხლეზე პასუხისმგებლობა მათ დაეკისრებოდათ. არსებული ინფორმაციით, საავადმყოფოში ამჟამად 12 000 ადამიანი აფარებს თავს. ინტენსიური თერაპიის განყოფილებაში ძირითადად ბოლო საჰაერო თავდასხმების დროს დაშავებული ბავშვები იმყოფებიან. მათი უმეტესობა შეერთებულია ჟანგბადის აპარატზე.

,,მალტის სამიტზე უკრაინის მშვიდობის ფორმულის ათიდან ხუთ პუნქტზე მიმდინარეობს მუშაობა”. ამის შესახებ უკრაინის პრეზიდენტმა ვოლოდიმირ ზელენსკიმ განაცხადა. მისივე თქმით, ეს პუნქტებია „რადიაციული და ბირთვული უსაფრთხოება“, „სასურსათო უსაფრთხოება“, „ენერგეტიკული უსაფრთხოება“, „ყველა პატიმრისა და დეპორტირებული პირის გათავისუფლება“ და „უკრაინის ტერიტორიული მთლიანობისა და მსოფლიო წესრიგის აღდგენა“. ,,ფორმულის თითოეული პუნქტისთვის შეიქმნა სახელმწიფოთა ჯგუფები, რომლებიც ორიენტირებულია მათ განხორციელებაზე. გლობალური უმრავლესობა თანდათან ერთიანდება მშვიდობის ფორმულაში ასახული საერთო და სამართლიანი ხედვის ირგვლივ. მსოფლიოს ერთიანობა არის ის, რაც ნამდვილად საჭიროა აგრესორების დასამარცხებლად”, – განაცხადა ზელენსკიმ.

,,ისრაელმა ღაზის სექტორში წითელი ხაზები გადაკვეთა”. ამის შესახებ ირანის პრეზიდენტმა, იბრაჰიმ რაისიმ განაცხადა. ,,ვაშინგტონი გვთხოვს, არაფერი გავაკეთოთ, მაგრამ ისინი ისრაელის ფართო მხარდაჭერას განაგრძობენ. აშშ-მ გაუგზავნა შეტყობინებები წინააღმდეგობის ღერძს, მაგრამ მიიღო მკაფიო პასუხი ბრძოლის ველზე”, – ამბობს რაისი.

ისრაელი ღაზის მშვიდობიან მოსახლეობას ჩრდილოეთ ნაწილიდან სამხრეთში გადასვლისკენ მოუწოდებს. გაფრთხილებას ისრაელის თავდაცვის ძალები აქვეყნებს. მათი ცნობით, სამხედოები ტერორისტულ დაჯგუფება “ჰამასთან” ომის “შემდეგ ეტაპზე” გადადიან და “ოპერაციებს აფართოებენ”. “ჩრდილოეთ ღაზის მშვიდობიანი მოსახლეობა დროებით ღაზის სამხრეთით უნდა გადავიდეს. შედარებით უსაფრთხო ზონაში, სადაც მათ შეუძლიათ მიიღონ წყალი, საკვები და მედიკამენტები”, – ამბობს IDF-ის სპიკერი. მისივე თქმით, ორშაბათს “ღაზის მიმართულებით ჰუმანიტარული დახმარება, ეგვიპტისა და შეერთებული შტატების ხელმძღვანელობით, გაფართოვდება”.

​უკრაინის გენშტაბი რუსი ოკუპანტების სამხედრო დანაკარგების შესახებ ინფორმაციას აქვეყნებს. მონაცემები 2022 წლის 24 თებერვლიდან დღემდე, 29 ოქტომბრამდე არსებულ ინფორმაციას მოიცავს. უწყების ცნობით, მხოლოდ ბოლო 24 საათის განმავლობაში, თავდაცვის ძალებმა გაანადგურეს დაახლოებით 660 სამხედრო, 8 ტანკი და 9 ჯავშანტექნიკა. რუსეთის შეიარაღებული ძალების საერთო დანაკარგები კი ასეთია: ჯარისკაცი – დაახლოებით 299 080; ტანკი – 5 175; ჯავშანტექნიკა – 9 758; საარტილერიო სისტემა – 7 188; სარაკეტო სისტემა – 834; საზენიტო საბრძოლო სისტემა – 558; თვითმფრინავები – 320; ვერტმფრენი – 324; ოპერატიულ-ტაქტიკური უპილოტო საფრენი აპარატი – 5 399; საკრუიზო რაკეტები – 1 544;…

,,ვისაც აქვს სტრესული მდგომარეობა, ვურჩევდი, გაემგზავროს სამშობლოში. ეს პროცესი არ დასრულდება 2-3 თვეში”. ამის შესახებ ისრაელში საქართველოს ელჩი, ლაშა ჟვანია საუბრობს. „გაიხსნა სკოლები, საბავშვო ბაღები, ძირითადად ის შენობები, სადაც დაცულია თავშესაფარი და შეიძლება, შეიყვანო ბავშვები საჰაერო განგაშის დროს. ბუნებრივია, საჰაერო განგაშები არ წყდება, კვლავ დაძაბული ვითარებაა. ამ ყველაფერს თან ახლავს ფსიქოლოგიური სტრესიც, უკვე სამი კვირაა ამ მდგომარეობაში ვართ. ვისაც აქვს გარკვეული სტრესული მდგომარეობა, ვურჩევდი, რომ გაემგზავროს სამშობლოში და მშვიდ გარემოში იყოს, ვიდრე იყოს გაძლებაზე ამ სტრესში, რადგან ეს პროცესი არ დასრულდება ორ და სამ თვეში. ესაა საკმაოდ ხანგრძლივი საომარი მოქმედებები.…

გასული დღის განმავლობაში ღაზის სექტორში გამანადგურებელმა თვითმფრინავებმა ,,ჰამასის” 450-მდე ობიექტი დაბომბეს. IDF-ში აცხადებენ, რომ სამიზნეები ,,ჰამასის” სამეთაურო ცენტრებსა და სადამკვირვებლო პუნქტებს მოიცავდა. თავდაცვის ძალებში ამბობენ, რომ ისრაელის სახმელეთო ჯარებმა დაარტყეს “ჰამასის” ტერორისტულ უჯრედებსა და რაზმებს, რომლებიც სარაკეტო თავდასხმებს ამზადებდნენ. ასევე, მიმართეს თვითმფრინავებს ტერორისტული ჯგუფის კუთვნილი სხვა ადგილების დასამიზნებლად.