დღე: ნოემბერი 4, 2023

Archer-ის ტიპის 8 საარტილერიო დანადგარი უკრაინაშია. ინფორმაციას შვედეთის თავდაცვის სამინისტრო ავრცელებს. ,,დღეს უკრაინა აღნიშნავს სარაკეტო ჯარებისა და არტილერიის დღეს. ძალიან კარგი დღეა ოფიციალურად გამოვაცხადო, რომ დაპირებულ შვედურ Archer საარტილერიო იარაღს ახლა ახალი მფლობელი ჰყავს – უკრაინის შეიარაღებული ძალები”, – განაცხადა შვედეთის თავდაცვის მინისტრმა, პოლ იონსონმა. ცნობისთვის, Archer-ი მსოფლიოში ერთ-ერთი მოწინავე საარტილერიო სისტემაა, რომელსაც ჭურვების გასროლა 50 კილომეტრის მანძილზე შეუძლია. შვედეთის მთავრობამ გადაწყვეტილება, Archer-ის ტიპის საარტილერიო დანადგარების უკრაინისთვის გადაცემის შესახებ, მიმდინარე წლის იანვარში მიიღო.

დროებით ოკუპირებულ ყირიმში საჰაერო განგაში და აფეთქებები იყო. რუსული მედია ყირიმის ხიდზე და ქერჩის გემთმშენებელ ქარხანაზე თავდასხმის შესახებ იუწყება. საჰაერო განგაშის გამოცხადების შემდეგ, ოკუპანტებმა გადაკეტეს ყირიმის ხიდი. რუსეთის მარიონეტული რეჟიმის წარმომადგენელი, აქსიონოვი აცხადებს, რომ ქერჩის გემთმშენებლობის ქარხნის მიდამოებში რაკეტების ფრაგმენტები ჩამოვარდა. მსხვერპლი არ არის.

უკრაინის ეროვნული უსაფრთხოებისა და თავდაცვის საბჭოს მდივანმა, ოლექსი დანილოვმა განაცხადა, რომ უკრაინის თავდაცვის ძალები ოკუპანტებს ყოველდღე დიდ ზარალს აყენებენ. მან ასევე აღნიშნა, რომ უკრაინა არ აპირებს დანებებას და ის გააგრძელებს ბრძოლას რუსი დამპყრობლების წინააღმდეგ. დანილოვის თქმით, დროებით ოკუპირებულ ყირიმში რუსეთი ისეთ წარუმატებლობას განიცდის, როგორიც აქამდე არ უნახავთ. ,,რაც შეეხება ყირიმის ნახევარკუნძულს და რუსეთის ფედერაციის შავი ზღვის ფლოტს, მერწმუნეთ, ასეთი დამარცხება რუსებს ცხოვრებაში არ უნახავთ”, – თქვა დანილოვმა უკრაინის რადიოს ეთერში.

რუსმა ოკუპანტებმა ზაპოროჟიეს ოლქის სოფელ ზარიჩნეზე სარაკეტო იერიში მიიტანეს. თავდასხმის შედეგად დაშავდა 9 ადამიანი. ,,მტრის თავდასხმის შედეგად დაშავდა 9 ადგილობრივი – 4 მამაკაცი და 5 ქალი. ყველა მათგანს სასწრაფოდ გაუწიეს საჭირო სამედიცინო დახმარება,” – განაცხადა ზაპოროჟიეს სამხედრო ადმინისტრაციის ხელმძღვანელმა იური მალაშკომ. მისივე თქმით, მთლიანობაში რუსეთმა გასულ დღეს ზაპოროჟიეს ოლქის 26 ქალაქსა და სოფელზე  126-ჯერ მიიტანა იერიში.

ნიდერლანდების თავდაცვის მინისტრმა, კაისა ოლონგრენმა განაცხადა, რომ უკრაინას 500 მილიონი ევროს ღირებულების სამხედრო დახმარების პაკეტს გადასცემენ. ოლონგრენი უკრაინაში 2-დღიანი ვიზიტით იმყოფებოდა. ,,უკრაინელებს ბრძოლის გასაგრძელებლად მხარდაჭერა სჭირდებათ. ამ შემთხვევაში, საუბარია საბრძოლო მასალაზე. ამ კუთხით, ჩვენ შევძელით უკრაინისთვის ახალი დახმარების პაკეტი შეგვეთავაზებინა,” – განაცხადა ნიდერლანდების თავდაცვის მინისტრმა. ახალი სამხედრო დახმარება უკრაინაში მომავალ წელს გაიგზავნება.

აშშ-ის სახელმწიფო მდივანი ენტონი ბლინკენი იორდანიაში იმყოფება. ის საუდის არაბეთის, კატარის, არაბთა გაერთიანებული საამიროების, ეგვიპტის საგარეო საქმეთა მინისტრებს და პალესტინის წარმომადგენლებს შეხვდება. ბლინკენი გეგმავს იორდანიის მეფესთან შეხვედრასაც. ,,ჩვენ განვიხილავთ არაბულ პოზიციას, რომელიც მოითხოვს ცეცხლის შეწყვეტას, ღაზისთვის ჰუმანიტარული დახმარების მიწოდებას და სიტუაციის გაუარესების შეჩერებას, რადგან იგი რეგიონის უსაფრთხოებას უქმნის საფრთხეს,” – ნათქვამია იორდანიის საგარეო საქმეთა სამინისტროს მიერ გავრცელებულ განცხადებაში. შეგახსენებთ, რომ გუშინ ენტონი ბლინკენი ისრაელში იმყოფებოდა. “ჰამასის” ისრაელზე თავდასხმის შემდეგ, ის ქვეყანაში მესამედ ჩავიდა.

ევროკომისიის პრეზიდენტი ურსულა ფონ დერ ლაიენი კიევში ჩავიდა. არსებული ინფორმაციით, რადაში მისი სიტყვით გამოსვლა იგეგმება. ,,ველოდებით მის გამოსვლას პარლამენტში,” – წერს დეპუტატი იაროსლავ ჟელეზნიაკი Telegram-ზე. ცნობისთვის, ევროკომისიის პრეზიდენტის უკრაინაში შესაძლო ვიზიტის შესახებ ინფორმაცია გასულ კვირას გავრცელდა.

უკრაინის პრეზიდენტი ვოლოდიმირ ზელენსკი ისრაელს მომავალ კვირას ეწვევა. „ასეთი ვიზიტი მნიშვნელოვანი გზავნილი იქნება“, – ამბობს ისრაელის განათლების მინისტრი იოავ კიში. ადგილობრივი მედიის ცნობით, უკრაინის პრეზიდენტი თელ-ავივში ორშაბათს, ან სამშაბათს ჩავა.

ნიდერლანდები უკრაინას 500 მილიონი ევროს ღირებულების სამხედრო დახმარების პაკეტს გადასცემს. ამის შესახებ ნიდერლანდების თავდაცვის მინისტრმა კაისა ოლონგრენმა უკრაინაში ვიზიტის დროს განაცხადა. ,,უკრაინელებს სჭირდებათ მხარდაჭერა ბრძოლის გასაგრძელებლად. ამ შემთხვევაში საუბარია საბრძოლო მასალაზე. ამ კუთხით ჩვენ შევძელით უკრაინას შევთავაზოთ დახმარების ახალი პაკეტი”, – თქვა ოლონგრენმა. მისივე თქმით, დახმარება უკრაინაში მომავალი წლის შუა რიცხვებამდე გაიგზავნება. დახმარების პაკეტიდან დაახლოებით 260 მილიონი ევრო საარტილერიო ჭურვებზე დაიხარჯება, ხოლო 240 მილიონი ევრო ტანკებისთვის საბრძოლო მასალაზე.

პალესტინის პრეზიდენტის, მაჰმუდ აბასის ვიზიტი მოსკოვში გადადო. როგორც რუსეთის საგარეო საქმეთა მინისტრის მოადგილემ, მიხაილ ბოგდანოვმა განმარტა, ვიზიტი პალესტინის მოთხოვნით გადაიდო. მაჰმუდ აბასი რუსეთში 15 ნოემბერს უნდა ჩასულიყო. ბოგდანოვის თქმით, პალესტინამ ვიზიტის გადადების მიზეზად, რეგიონში არსებული მდგომარეობა და ომი დაასახელა.

უკრაინის პრეზიდენტმა შეიარაღებული ძალების სპეციალური ოპერაციების ძალების (SSO) მეთაური შეცვალა. ვიქტორ ხორენკოს ნაცვლად, თანამდებობაზე პოლკოვნიკი სერგეი ლუპანჩუკი დაინიშნა. ,,დარწმუნებული ვარ, რომ მისი ხელმძღვანელობით იქნება ბევრი მიღწევა და ბევრი გამარჯვება. და ჩვენ ყოველდღიურად ვუახლოვდებით გამარჯვებას“, – განაცხადა ზელენსკიმ. ცნობისთვის, ხორენკო სპეციალური ოპერაციების ძალების მეთაურის პოსტზე 2022 წლის 25 ივლისს დაინიშნა.

ღაზის სექტორში ,,ჰამასის” მიერ გატაცებული მძევლების მოსაძებნად დრონებს იყენებენ. როგორც პენტაგონის წარმომადგენელმა, გენერალმა პატ რაიდერმა განაცხადა, ფრენები 7 ოქტომბრის თავდასხმის შემდეგ დაიწყო. ,,მძევლების გამოყვანის მცდელობების მხარდასაჭერად, აშშ ღაზის თავზე უიარაღო უპილოტო საფრენი აპარატების ფრენებს ახორციელებს. ასევე, აწვდის რჩევებსა და დახმარებას ჩვენს ისრაელელ პარტნიორებს, როდესაც ისინი მძევლების გამოყვანის მცდელობებზე მუშაობენ”, – განაცხადა რაიდერმა. მანამდე სხვადასხვა გამოცემა წყაროებზე დაყრდნობით წერდა, რომ ღაზის სექტორის თავზე ამერიკული სადაზვერვო დრონები დაფრინავენ. საუბარი იყო MQ-9 Reapers-ის ტიპის უპილოტო საფრენ აპარატებზე.