დღე: ნოემბერი 21, 2023

უკრაინაში კორუფციის გამო კიბერუსაფრთხოების სფეროს ორი მაღალჩინოსანი თანამდებობიდან გაათავისუფლეს. უკრაინის ეროვნულმა ანტიკორუფციულმა ბიურომ და სპეციალიზებულმა ანტიკორუფციულმა პროკურატურამ უწყების ხელმძღვანელობა 62 მილიონი გრივნის (დაახლოებით, 1, 72 მილიონი დოლარი) ოდენობის სახელმწიფო სახსრების დაუფლებაში დაადანაშაულა. გამოძიებამ დაადგინა, რომ 2020-2022 წლებში კომპანიების ჯგუფის მფლობელმა სპეციალური კომუნიკაციების სახელმწიფო სამსახურის ხელმძღვანელობასთან შეთანხმებით შეიმუშავა ტექნიკისა და პროგრამული უზრუნველყოფის შესაძენად გამოყოფილი ბიუჯეტის სახსრების ჩამორთმევის სქემა. ეს თანხები ირიცხებოდა საზღვარგარეთ კონტროლირებადი კომპანიების ანგარიშებზე ლეგალიზაციისა და ორგანიზებული ჯგუფის წევრებს შორის განაწილების მიზნით.

ჟურნალისტთა დაცვის კომიტეტის ინფორმაციით, ისრაელი-ჰამასის კონფლიქტის გაშუქებისას სულ მცირე 50 ჟურნალისტი დაიღუპა. მსხვერპლს შორის 45 პალესტინელი, 4 ისრაელელი და 1 ლიბანელი ჟურნალისტია. გავრცელებული ინფორმაციით, დაშავებულია 11 ჟურნალისტი, 3 დაკარგულად მიიჩნევა, 18 კი დაკავებულია.

აზერბაიჯანის პრეზიდენტის განცხადებით,  საფრანგეთი სამხრეთ კავკასიის რეგიონში ახალი ომების გაჩაღებისთვის ნიადაგს ამზადებს. მისი თქმით, „ფრანგული კოლონიალიზმის სამარცხვინო მეთოდები“ დღესაც გრძელდება. „საფრანგეთი არღვევს სტაბილურობას არა მხოლოდ თავის ყოფილ და ახლანდელ კოლონიებში, არამედ ჩვენს რეგიონშიც – სამხრეთ კავკასიაში, სადაც მხარს უჭერს სეპარატისტულ ტენდენციებს და სეპარატისტებს. ის ატარებს მილიტარისტულ პოლიტიკას სომხეთის შეიარაღებით, აქეზებს სომხეთში რევანშისტულ ძალებს, ამზადებს ნიადაგს ჩვენს რეგიონში ახალი ომებისთვის“, – განაცხადა ალიევმა.

რუსეთის თავდაცვის მინისტრის, სერგეი შოიგუს განცხადებით, უკრაინამ ნოემბრის დასაწყისიდან 13 000-ზე მეტი ჯარისკაცი დაკარგა. ,,მთლიანობაში, თვის დასაწყისიდან მოწინააღმდეგემ 13 700-ზე მეტი ჯარისკაცი დაკარგა. ამასთან, 1800 ერთეული სხვადასხვა ტიპის იარაღი და სამხედრო ტექნიკა. რუსული არმია აგრძელებს უკრაინის შეიარაღებული ძალების შეტევითი პოტენციალის შემცირებას ყველა მიმართულებით. უკრაინელი ჯარისკაცების დიდი ნაწილი, რომლებიც ჩვენი თავდაცვის გარღვევის მცდელობის უშედეგობას აცნობიერებენ, დანებდნენ”, – განაცხადა შოიგუმ.

გერმანიის საგარეო საქმეთა მინისტრი, ანალენა ბერბოკი  ევრომაიდნის 10 წლისთავს ეხმიანება და წერს, რომ მაშინ უკრაინელებმა ევროპისკენ მიმავალი გზა აირჩიეს. ,,10 წლის წინ ამ დღეს, მაიდანზე თქვენ გაიგებდით, თუ როგორ ხმამაღლა სცემდა უკრაინის გული ევროპისთვის, სიმამაცითა და თავისუფლების იმედით სავსე. მაშინ უკრაინელებმა ევროპისკენ მიმავალი გზა აირჩიეს, რომელსაც დღეს ჩვენ ყველანი ერთად გავდივართ,”- წერს ბერბოკი.

ევროკავშირის წევრი ქვეყნები განიხილავენ, შეზღუდონ თუ არა რუსი დიპლომატების მოგზაურობა მას შემდეგ, რაც ჩეხეთის რესპუბლიკამ განაცხადა, რომ პოტენციური ჯაშუშები თავს არიდებდნენ მონიტორინგს შენგენის ზონაში, სადაც არ არის სასაზღვრო შემოწმება. ამის შესახებ ინფორმაციას უკრაინული მედია Financial Times-ზე დაყრდნობით ავრცელებს. უკრაინაში რუსეთის სრულმასშტაბიანი შეჭრის შემდეგ, ევროკავშირის მთავრობებმა ასობით რუსი დიპლომატები გააძევეს, იმის მტკიცებით, რომ ისინი სინამდვილეში დაზვერვის აგენტები იყვნენ. ქვეყნები გასცემენ ვიზებს რუს დიპლომატებზე, რაც მათ აძლევს შენგენის ზონაზე წვდომას და შეუფერხებლად მოგზაურობის უფლებას ევროკავშირის 27 წევრი ქვეყნიდან 24-ში, ასევე შვეიცარიაში, ნორვეგიასა და ისლანდიაში. გასულ კვირას პრაღამ გაავრცელა დოკუმენტი, რომელშიც გამოთქმული იყო იდეები აღნიშნულის თავიდან…

უკრაინის პრეზიდენტი ვოლოდიმირ ზელენსკი უკრაინის შეიარაღებული ძალების სარდლის, ვალერი ზალუჟნის განცადებას ეხმიანება. მისი თქმით,  სამხედროები, რომლებიც პოლიტიკურ საქმიანობას აპირებენ, არ უნდა იყვნენ დაკავებული ომით. „სამხედრომ თუ გადაწყვიტა, დაკავდეს პოლიტიკით, ეს მისი უფლებაა, მაშინ ის უნდა წავიდეს პოლიტიკაში და ის ვეღარ იქნება დაკავებული ომით. თუ თქვენ ომს მართავთ იმის გათვალისიწნებით, რომ ხვალ თქვენ პოლიტიკით ან არჩევნებით დაკავდებით, მაშინ სიტყვებით და წინა ხაზზე თქვენ მოქმედებთ, როგორც პოლიტიკოსი და არა როგორც სამხედრო. მიმაჩნია, რომ ეს დიდი შეცდომაა“, – განაცხადა ზელენსკიმ. ცნობისთვის, ვალერი ზალუჟნის განცხადებით, ფრონტზე სიტუაცია ჩიხში შევიდა და  არცერთ მხარეს არ შეუძლია…

ევროპული საბჭოს პრეზიდენტი შარლ მიშელი კიევში ევრომაიდნის  10 წლისთავზე ჩავიდა. მას კიევის რკინიგზის სადგურის ბაქანზე უკრაინის საგარეო საქმეთა მინისტრის მოადგილე ევგენ პერებიინისი და ევროკავშირის ელჩი უკრაინაში კატარინა მატერნოვა დახვდნენ. ”სასიამოვნოა ისევ კიევში ყოფნა – მეგობრებთან ერთად,” -წერს მიშელი. 

,,ევროპა უკრაინის გვერდით დგას. მაშინ, ახლა და მომავალში – უკრაინა ჩვენს ევროპულ ოჯახს ეკუთვნის,”- ამის შესახებ ევროკავშირის უმაღლესი წარმომადგენელი, ჯოზეფ ბორელი ევრომაიდნის 10 წლისთავთან დაკავშირებით წერს. ,,მაიდანის აჯანყებამ ჩვენი საერთო ისტორია მონიშნა. უკრაინელები მაშინაც ისე იცავდნენ თავიანთ ევროპულ არჩევანს, როგორც ახლა. თავისუფლებისთვის, დამოუკიდებლობისა და დემოკრატიისთვის. ევროპა უკრაინის გვერდით დგას. მაშინ, ახლა და მომავალში – უკრაინა ჩვენს ევროპულ ოჯახს ეკუთვნის,”- წერს ბორელი.

უკრაინის ეროვნული უსაფრთხოებისა და თავდაცვის საბჭოს მდივნის, ოლექსი დანილოვის განცხადებით, არჩევნების შემდეგ პუტინი რუსეთში ტოტალურ მობილიზაციას დაიწყებს. ,,მარტის საპრეზიდენტო არჩევნების შემდეგ, რუსეთში ავტორიტარული რეჟიმი საბოლოოდ “დაცემენტდება” და კრემლი თავის სამხედრო პოტენციალს გამოიყენებს, საზოგადოებრივი აზრის გათვალისწინების გარეშე. უკრაინას და მსოფლიოს ამისთვის მოსამზადებლად ოთხი თვე აქვს. რუსეთის სტრატეგიული მიზნები აბსოლუტურად ეწინააღმდეგება უკრაინულს. ეს არის უკრაინის სახელმწიფოს ნგრევა და უკრაინული ეთნიკური ჯგუფის შთანთქმა “რუსული სამყაროს” ფარგლებში. კრემლი ამ მიზნის დათმობას არ აპირებს და ხანგრძლივი ომისთვის ემზადება”, – განაცხადა დანილოვმა.

,,უკრაინის მომავალი ევროკავშირშია. მომავალი, რომლისთვისაც მაიდანი იბრძოდა, საბოლოოდ დაიწყო,”- ამის შესახებ ევროკომისიის პრეზიდენტი, ურსულა ფონ დერ ლეიენი ევრომაიდნის 10 წლისთავთან დაკავშირებით წერს. მისი თქმით, ევრომაიდნის ზამთრის ცივმა ღამეებმა სამუდამოდ შეცვალა ევროპა. ,,ღირსების, სიამაყის, თავისუფლებისკენ სწრაფვის ათი წელი. ევრომაიდნის ზამთრის ცივმა ღამეებმა სამუდამოდ შეცვალა ევროპა. მთელი ერი გამოვიდა ქუჩაში და ლაპარაკობდა ერთი ხმით. თქვენ თქვით: უკრაინა ეკუთვნის ევროპას და ჩვენი მომავალი გვეკუთვნის ჩვენ. უკრაინელი ხალხი ევროკავშირის დროშაში გახვეული შეეწინააღმდეგა სნაიპერებსა და სპეცრაზმს. თქვენ გადაწყვიტეთ, რომ თქვენ ყოფილიყავით საკუთარი მომავლის მმართველები. დღეს ეს უფრო ნათელია, ვიდრე ოდესმე. უკრაინის მომავალი ევროკავშირშია. მომავალი, რომლისთვისაც…

მოლდოვის პრეზიდენტი მაია სანდუ კიევში ჩავიდა. მაია სანდუ უკრაინის პრეზიდენტ ვოლოდიმირ ზელენსკის შეხვდება. მოლაპარაკებების მთავარი თემა უკრაინისა და მოლდოვის ევროკავშირში გაწევრიანების შემდგომი ნაბიჯების განხილვა,  რეგიონული უსაფრთხოების გაძლიერება და ევროკავშირის მუდმივი მხარდაჭერაა იმ რეფორმებში, რომლებსაც ორი ქვეყანა ატარებს.