დღე: ნოემბერი 8, 2023

შეერთებული შტატები გააგრძელებს საქართველოსთან ახლო მუშაობას ევროკავშირისკენ მიმავალ გზაზე, – ამის შესახებ საქართველოში აშშ-ის საელჩოს განცხადებაშია ნათქვამი. „გილოცავთ ყველა ქართველს! დღევანდელი რეკომენდაცია არის საქართველოს ევროატლანტიკური ინტეგრაციისკენ გადადგმული უდიდესი ნაბიჯი. შეერთებული შტატები გააგრძელებს საქართველოსთან ახლო მუშაობას ევროკავშირისკენ მიმავალ გზაზე. ჩვენ გვჯერა თქვენი ევროპული მომავლის“, – ნათქვამია საქართველოში აშშ-ის საელჩოს განცხადებაში.  

,,ევროპარლამენტი მიესალმება რეკომენდაციას საქართველოსთვის კანდიდატის სტატუსის მინიჭების თაობაზე,”-  ამის შესახებ ევროპარლამენტის პრეზიდენტი რობერტა მეცოლა საქართველოსთვის კანდიდატის სტატუტის მინიჭებასთან დაკავშირებით ევროკომისიის რეკომენდაციასთან დაკავშირებით წერს. ,,მოხარული ვარ, რომ უკრაინა და მოლდოვა გაწევრიანების მოლაპარაკებების დაწყების გზაზე არიან. ევროპარლამენტი მიესალმება რეკომენდაციას საქართველოსთვის კანდიდატის სტატუსის მინიჭების თაობაზე და ბოსნია ჰერცეგოვინასთან გაწევრიანების მოლაპარაკებების დაწყებას, როგორც კი პირობები დაკმაყოფილდება,”- წერს რობერტა მეცოლა.

ევროკომისიამ საქართველოსთვის კანდიდატის სტატუსის მინიჭებაზე დადებითი რეკომენდაცია გასცა. ამის შესახებ ევროკომისიის პრეზიდენტის, ურსულა ფონ დერ ლაიენისა და გაფართოების საკითხებში ევროკომისარ ოლივერ ვარჰეის ერთობლივ ბრიფინგზე გახდა ცნობილი. „საქართველომ უნდა მიიღოს კანდიდატის სტატუსი, რადგან ნამდვილად იქნა გადადგმული ნაბიჯები. გილოცავთ“, – განაცხადა ურსულა ფონ დერ ლაიენმა. ევროპული საბჭო საქართველოსთვის კანდიდატი ქვეყნის სტატუსის მინიჭების შესახებ საბოლოო გადაწყვეტილებას დეკემბერში მიიღებს.

რუსეთი საზღვარგარეთ მისი აქტივების კონფისკაციას შესაბამისად უპასუხებს, – ამის შესახებ კრემლის პრესსპიკერმა დიმიტრი პესკოვმა განაცხადა. მისი თქმით, აშშ და ევროპა მუდმივად მუშაობენ რუსული აქტივების უკანონოდ ჩამორთმევის მიზნით. ,,ეს გამოიწვევს ძალიან სერიოზულ სასამართლო და იურიდიულ ხარჯებს მათთვის, ვინც ასეთ გადაწყვეტილებებს იღებს და ასეთი გადაწყვეტილებებით ისარგებლებს. ეს იქნება ისეთი ზომები, რომლებიც ყველაზე უკეთ შეეფერება ჩვენს ინტერესებს,- განაცხადა პესკოვმა.

„სიენენის“ კვლევის მიხედვით, აშშ-ის ყოფილი პრეზიდენტი დონალდ ტრამპი მოქმედ პრეზიდენტ ჯო ბაიდენს რეიტინგში უსწრებს. გამოკითხვის თანახმად, ტრამპის რეიტინგი 49%-ს, ბაიდენის კი 45%-ს შეადგენს. კვლევაში მონაწილეთა 28% მიიჩნევს, რომ აშშ-ში საქმე კარგად მიდის. კითხვაზე, აქვს თუ არა ჯო ბაიდენს გამძლეობა და საზრიანობა, პრეზიდენტის მოვალეობა შეასრულოს, დადებითი პასუხი 25-მა პროცენტმა გასცა. კვლევის მიხედვით, 35 წლამდე ამომრჩევლებს შორის 48% მხარს უჭერს დონალდ ტრამპს , ხოლო 47% ჯო ბაიდენს.  

ისრაელის თავდაცვის ძალების განცხადებით, გასულ ღამეს ღაზის სექტორზე განხორციელებული საჰაერო თავდასხმისას”ჰამასის” იარაღის წარმოების აპარატის ერთ-ერთი მთავარი ფიგურა, მუჰსინ აბუ ზინა მოკლეს/ მათივე ცნობით,  მუჰსინ აბუ ზინა “ჰამასის” იარაღის წარმოების ერთ-ერთი ხელმძღვანელი იყო და  სპეციალიზებული იყო სტრატეგიული იარაღისა და რაკეტების წარმოებაში. უწყებაში აღნიშნავე, რომ “ჰამასის” ტანკსაწინააღმდეგო სარაკეტო რაზმზე მიიტანეს იერიში, რის შედეგადაც მისი რამდენიმე წევრი დაიღუპა.

უკრაინის პრეზიდენტი, ვოლოდიმირ ზელენსკი საპრეზიდენტო არჩევნების ჩატარება 2024 წლის გაზაფხულზე გამორიცხავს. მისი თქმით, დარწმუნებულია, რომ ახლა არ არის შესაფერისი დრო არჩევნებისთვის. ,,ახლა, ომის დროს, როდესაც ამდენი გამოწვევაა, აბსოლუტურად უპასუხისმგებლოა არჩევნების თემის საზოგადოებაში მსუბუქად და მხიარულად გადატანა. ჩვენ უნდა გავაცნობიეროთ, რომ ახლა არის თავდაცვის დრო, ბრძოლის დრო, რომელიც განსაზღვრავს სახელმწიფოსა და ხალხის ბედს და არა მანიპულაციების დრო, რასაც უკრაინისგან მხოლოდ რუსეთი ელის. დარწმუნებული ვარ, რომ ახლა არ არის შესაფერისი დრო არჩევნებისთვის”,- განაცხადა ზელენსკიმ.

რუსეთის თავდაცვის მინისტრის, სერგეი შოიგუს განცხადებით, რუსეთი და ჩინეთი სამხედრო ბლოკს არ ქმნიან. მისი თქმით, ჩინეთის ცენტრალური სამხედრო საბჭოს თავმჯდომარის მოადგილესთან შეხვედრაზე ორ ქვეყანას შორის თავდაცვით სფეროში ორმხრივი თანამშრომლობის გაღრმავების საკითხს განიხილავენ. „ზოგიერთი დასავლური აგრესიული სახელმწიფოსგან განსხვავებით, ჩვენ სამხედრო ბლოკს არ ვქმნით. რუსეთისა და ჩინეთის ურთიერთობები არის სტრატეგიული ურთიერთქმედების მაგალითი, რაც ნდობასა და პატივისცემაზე არის დაფუძნებული“, – განაცხადა შოიგუმ.