დღე: ნოემბერი 5, 2023

ისრაელი ღაზის სექტორს ბომბავს. ადგილობრივი მედიის ცნობით, სარაკეტო განგაშის ხმა ისმის ღაზის მიმდებარე ქალაქებში. ამ დროისთვის სხვა დამატებითი დეტალები უცნობია.

,,ევროკავშირი უკრაინისთვის წლის ბოლომდე 50 მილიარდი ევროს გამოყოფას გეგმავს”. ამის შესახებ ევროკომისიის პრეზიდენტმა ურსულა ფონ დერ ლაიენმა განაცხადა. ლაიენის განცხადებით, უკრაინას ფინანსური სტაბილურობისთვის მან მოლაპარაკებები სენატორებთან და აშშ-ის წარმომადგენელთა პალატის წევრებთანაც გამართა. ,,მე შევთავაზე ევროპულ საბჭოს უკრაინისთვის 50 მილიარდი ევროს გამოყოფა. ჩვენ ვმუშაობთ, რომ ამასთან დაკავშირებით წლის ბოლომდე შევთანხმდეთ. ჩვენ მათ ავუხსენით, რას ვაკეთებთ და რატომ მიგვაჩნია, რომ მნიშვნელოვანია, უკრაინას ჰქონდეს ფინანსური სტაბილურობა”, – ამბობს ურსულა ფონ დერ ლაიენი.

აშშ-ის სახელმწიფო მდივანი ენტონი ბლინკენი ოკუპირებულ დასავლეთ სანაპიროზე, პალესტინის ხელისუფლების შტაბ-ბინას ეწვია, სადაც პალესტინის პრეზიდენტს, მაჰმუდ აბასს, შეხვდა. ბლინკენის რამალაში ჩასვლა წინასწარ არ დაანონსებულა. აშშ-ის სახელმწიფო მდივანი პარასკევს თელ-ავივში, შაბათს კი ამანში იმყოფებოდა. ის დღის მეორე ნახევარში კი თურქეთში გაემგზავრა.

„აშშ-სთან ურთიერთობები ნულზეა ან ნულის ქვემოთაც”. ამის შესახებ რუსეთის პრეზიდენტის პრესმდივანმა დიმიტრი პესკოვმა განაცხადა. „აშშ-სთან ურთიერთობები ნულზეა ან, მე ვიტყოდი, ნულის ქვემოთაც კი, მაგრამ, რადგან აშშ-საც და ჩვენც გვეკისრება განსაკუთრებული პასუხისმგებლობა გლობალურ და სტრატეგიულ სტაბილურობაზე, ასე თუ ისე, დროთა განმავლობაში ამ საუბრის განახლება მოგვიწევს“, – ამბობს პესკოვი.

რუსებმა უკრაინაში, ხერსონის დნეპროს რაიონში საცხოვრებელ კორპუსი დაბომბეს. ხერსონის რეგიონული სამხედრო ადმინისტრაციის ცნობით, იერიშის შედეგად ერთი მშვიდობიანი მოქალაქე დაშავდა. ,,დაბომბვის შედეგად დაინგრა სახლის მეორე სართული”, – ნათქვამია უწყების განცხადებაში.

დასავლეთ უკრაინაში, ზაპოროჟიეს ოლქში 128-ე ბრიგადის სამხედროების მასობრივი დაღუპვის გამო, სამდღიანი გლოვა გამოცხადდა. შეგახსენებთ, რომ 3 ნოემბერს დილით რუსეთმა ის ადგილი დაბომბა, სადაც სამხედროები დასაჯილდოებლად იყვნენ შეკრებილი. დაიღუპა 20-ზე მეტი სამხედრო, ასევე არიან დაჭრილები. ინფორმაცია 128-ე ბრიგადის ჯარისკაცების დაღუპვის შესახებ ოფიციალურად დაადასტურა უკრაინის შეიარაღებული ძალების სტრატეგიული კომუნიკაციების ცენტრმა. თუმცა უწყება არ ავრცელებს ინფორმაციას, რა ვითარებაში მოხდა ეს და აცხადებს, რომ გამოძიება ჯერ კიდევ მიმდინარეობს.

უკრაინის უსაფრთხოების სამსახურმა რუსეთის პატრიარქს ბრალი დაუსწრებლად წარუდგინა. რუსეთის პატრიარქს უკრაინაში რუსეთის სრულ მასშტაბიანი შეჭრის გამართლებაში ადანაშაულებენ. უკრაინის უსაფრთხოების სამსახურის განმარტებით, პატრიარქი კირილი რუსეთის უმაღლეს სამხედრო და პოლიტიკურ ხელმძღვანელობასთან დაკავშირებული პირია და ერთ-ერთი პირველია, ვინც საჯაროდ დაუჭირა მხარი უკრაინის წინააღმდეგ ომს.

დღეს რუსეთის არმია რამდენჯერმე დაესხა თავს ხერსონს. დაღუპულია ერთი და დაშავებულია რამდენიმე მშვიდობიანი მოქალაქე. ხერსონის გარდა, ოკუპანტებმა ფრთოსანი და ბალისტიკური რაკეტებით იერიში მიიტანეს დნეპროპეტროვსკისა და პოლტავას რაიონებზე. უკრაინის საჰაერო ძალების საზენიტო-სარაკეტო დანაყოფებმა დნეპროპეტროვსკში მტრის სამი „ისკანდერ-K“ გაანადგურა. უცნობია, რამდენი რაკეტა გაუშვეს დამპყრობლებმა. მსხვერპლისა და დაღუპულის შესახებ ინფორმაცია არ გავრცელებულა. რაც შეეხება პოლტავას, რაკეტის ნამსხვრევებმა მიროროდის რაიონში რამდენიმე საცხოვრებელი კორპუსი დააზიანა. რეგიონული სამხედრო ადმინისტრაციის ხელმძღვანელის, ფილიპ პრონინის თქმით, დაიღუპა ერთი ქალი და დაშავდა რამდენიმე ადამიანი, მათ შორის, ორი ბავშვია.

უკრაინის შეიარაღებული ძალების 128-ე ცალკეული ბრიგადის სარდლობამ, უკრაინის არტილერიის დღესთან დაკავშირებით, დაჯილდოების ცერემონიის მოწყობა გადაწყვიტა სოფელ ზაპოროჟიეში. სწორედ ამ დროს მოხდა რუსული სარაკეტო თავდასხმა, რასაც ათობით ოფიცერი და მშვიდობიანი მოქალაქე ემსხვერპლა.

თელ-ავივის ხელოვნების მუზეუმთან, ათასობით ადამიანი შეიკრიბა „ჰამასის“ მიერ 7 ოქტომბრის თავდასხმის შემდეგ მძევლად აყვანილი 242 ადამიანის ოჯახების სოლიდარობის მიზნით. „ჩვენ გვესმის ამ შეკრების მნიშვნელობა, რადგან ხვალ „ჰამასის“ მიერ ისრაელზე თავდასხმის 30-ე დღეა”, – განაცხადა თელ- ავივის მერმა, რონ ჰულდაიმ მიტინგის დაწყებისას და აღნიშნა, რომ 4 ნოემბერი ისრაელის ყოფილი პრემიერმინისტრის, იცხაკ რაბინის მკვლელობის თარიღიცაა. მისი თქმით, რაბინმა იცოდა რთული გადაწყვეტილებების მიღება და ახლა ნეთანიაჰუმ უნდა გააკეთოს ეს და დააბრუნოს ყველა მძევალი. ასევე, გამოსვლებია პრემიერ ნეთანიაჰუს გადადგომის მოთხოვნითაც. დემონსტრანტები იერუსალიმში, მის სახლთან შეიკრიბნენ.

აშშ-ის სახელმწიფო მდივანი, ენტონი ბლინკენი, იორდანიაში სამუშაო ვიზიტის შემდეგ, თურქეთში მიემგზავრება, თუმცა, ჯერჯერობით უცნობია, ვის შეხვდება. იორდანიაში მან ისრაელი-ჰამასის ომთან დაკავშირებით შეხვედრები გამართა ახლო აღმოსავლეთის ლიდერებთან, რომლებმაც ცეცხლის შეწყვეტა მოითხოვეს. თუმცა, ბლინკენმა განაცხადა, რომ აშშ “ჰუმანიტარული პაუზების” მომხრეა, მაგრამ ღაზის სექტორში ცეცხლის შეწყვეტის წინააღმდეგი. აღსანიშნავია, რომ ბლინკენის ვიზიტამდე, თურქეთში პალესტინის მხარდამჭერი აქციები გაიმართა. ერთ-ერთ მათგანში თურქეთის პრეზიდენტი, რეჯეფ თაიფ ერდოღანიც, მონაწილეობდა. აქციაზე სიტყვით გამოსვლისას ერდოღანმა ისრაელს ოკუპანტი უწოდა, რის შემდეგაც ისრაელმა დიპლომატების გაწვევის გადაწყვეტილება მიიღო.

ბრიტანეთისა და ავსტრალიის ყოფილი პრემიერმინისტრები, ბორის ჯონსონი და სკოტ მორისონი, სოლიდარობის ნიშნად ისრაელში ჩავიდნენ. გავრცელებული ინფორმაციით, ისინი მოინახულებენ სამხრეთ თემებს, რომლებსაც 7 ოქტომბერს “ჰამასი” თავს დაესხა. შეგახსენებთ, რომ 7 ოქტომბერს, ღაზას სექტორიდან ისრაელზე მოულოდნელი სარაკეტო და სახმელეთო თავდასხმა წამოიწყეს. თავდასხმაზე პასუხისმგებლობა ტერორისტულმა დაჯგუფება “ჰამასმა” აიღო და მას ოპერაცია “ალ-აკსას შტორმი” უწოდა. სარაკეტო იერიშის საპასუხოდ ისრაელის თავდაცვის სამინისტრომ საომარი მდგომარეობა და ოპერაცია “რკინის ხმლების” დაწყება გამოაცხადა.

გასული დღის განმავლობაში რუსმა ოკუპანტებმა სუმის ოლქის 6 დასახლება დაბომბეს. დაფიქსირდა 46 აფეთქება. ინფორმაციას სუმის რეგიონის სამხედრო ადმინისტრაცია ავრცელებს. ცეცხლის ქვეშ მოექცა კრასნოპილსკის, იუნაკოვსკის, ზნობ-ნოვგოროდსკის, დრუჟბივსკის, სერედინო-ბუდსკის, ესმანსკის თემები. მსხვერპლის და დაშავებულების შესახებ ინფორმაცია არ გავრცელებულა.

გასული დღის განმავლობაში უკრაინელ თავდაცვის ძალებსა და რუს ოკუპანტებს შორის 82 საბრძოლო შეტაკება მოხდა. ინფორმაციას უკრაინის გენშტაბი ავრცელებს. ,,მთლიანობაში, მტერმა 7 სარაკეტო და 24 საჰაერო დარტყმა, ასევე, 64 შეტევა განახორციელა სარაკეტო სისტემებიდან უკრაინის ჯარების პოზიციებსა და დასახლებულ პუნქტებზე. ოკუპანტებმა თავდასხმები განახორციელეს დონეცკის ოლქის ბოჰდანივკას რაიონშიც, თუმცა, უშედეგოდ. უკრაინის თავდაცვის ძალები აგრძელებენ თავდასხმის ოპერაციებს დონეცკის ოლქის ბახმუტის სამხრეთით, აყენებენ მტერს დანაკარგებს ცოცხალი ძალითა და აღჭურვილობით, იმაგრებენ მიღწეულ საზღვრებს”, – ვკითხულობთ გენშტაბის ანგარიშში.