დღე: ნოემბერი 8, 2023

ჩეჩნეთის ლიდერის, რამზან კადიროვის შვილს, ადამ კადიროვს ყაბარდო-ბალყარეთის უმაღლესი ჯილდო – „ორდენი რესპუბლიკის წინაშე დამსახურებისთვის გადაეცა. კადიროვის განცხადებით, მის შვილს ორდენი ეროვნებათშორისი და კონფესიებს შორის მშვიდობაში შეტანილი წვლილისთვის გადაეცა. მანამდე კი, კადიროვის ს15 წლის შვილს თათრეთის ორდენი „დისლიკი“ და „ორდენი ყარაჩაი-ჩერქეზეთის წინაშე შეტანილი წვლილისთვის“ გადაეცა.  

უკრაინის ინფრასტრუქტურის მინისტრის, სერგეი დერკაჩის ინფორმაციით, პოლონელმა გადამზიდავებმა უკრაინის საზღვარზე ორი გადასასვლელი პუნქტი სრულად დაბლოკეს. საპროტესტო აქციის მონაწილეები ჰუმანიტარულ ტვირთს და სამგზავრო ტრანსპორტს დაბრკოლების გარეშე ატარებენ. საუბარია სასაზღვრო გამშვებ პუნქტ „იაგოდინოსა“ და „რავაზე“, სადაც სატვირთო ტრანსპორტის გადაადგილება შეწყვეტილია. აქციის ორგანიზატორები ითხოვენ, უკრაინელ გადამზიდავებს სპეციალური ნებართვა დაუწესონ ევროკავშირში სამუშაოდ. აღნიშნული სისტემა ომამდე მოქმედებდა, თუმცა 2022 წლის თებერვალში ევროკავშირმა უკრაინის ეკონომიკის მხარდასაჭერად ნებართვები დროებით გააუქმა.  

ისრაელის თავდაცვის მინისტრის, იოავ გალანტის განცხადებით, ისრაელის ჯარები “ქალაქ ღაზის შუაგულში” იმყოფებიან. მისი თქმით, ისრაელის ჯარისკაცებმა შტურმი სახმელეთო, საჰაერო და საზღვაო ძალებს შორის სრული კოორდინაციით განახორციელეს. ისრაელის პრემიერ-მინისტრის განცხადებით, ჯარებმა ალყა შემოარტყეს და მოქმედებენ ქალაქში. ნეთანიაჰუმ ღაზას მოსახლეობას მოუწოდა “გთხოვთ, წახვიდეთ სამხრეთით”. “ჰამასის” მიერ კონტროლირებადი ჯანდაცვის სამინისტროს მონაცემებით ღაზაში 10 300-ზე მეტი ადამიანი დაიღუპა, მათ შორის 4 100-ზე მეტი ბავშვი. ისრაელში 1 400 ადამიანი დაიღუპა, 200-ზე მეტი კი მძევლად აიყვანეს.

ნატო გმობს საქართველოს მოქალაქის მკვლელობას – მოვუწოდებთ რუსეთს, გაიყვანოს ძალები – ამის შესახებ სამხრეთ კავკასიასა და ცენტრალურ აზიაში NATO-ს გენერალური მდივნის სპეციალური წარმომადგენელი, ხავიერ კოლომინა Twitter-ზე წერს. ,,ვგმობთ რუსი მესაზღვრეების მიერ საქართველოს მოქალაქის მკვლელობას და კიდევ ერთი მოქალაქის დაკავებას საქართველოში, კირბალთან ახლოს და მოვუწოდებთ მისი დაუყოვნებლივ გათავისუფლებისკენ. NATO მოუწოდებს რუსეთს, შეწყვიტოს ადამიანის უფლებების დარღვევა და გაიყვანოს თავისი ძალები საქართველოდან,”- წერს კოლომინა.

აშშ-ის პრეზიდენტი ჯო ბაიდენი ისრაელის პრემიერ-მინისტრ ბენიამინ ნეთანიაჰუს ღაზაში ჰუმანიტარულ პაუზას სთხოვს. ბაიდენის განცხადებით, მან ბენიამინ ნეთანიაჰუს ღაზაში ბრძოლების შეჩერების შესახებ სთხოვა. ,,დღეს არ მომეცა მასთან საუბრის საშუალება. მე მას ვთხოვე პაუზა წარსულში – გუშინ”, – თქვა ბაიდენმა. აშშ-ის პრეზიდენტს კითხვა დაუსვეს, შესთავაზა თუ არა  ნეთანიაჰუს სამდღიანი პაუზა, თუმცა ბაიდენმა„პაუზის“ ხანგძლივობათან დაკავშირებით დასმულ კითხვას არ უპასუხა.