დღე: მარტი 12, 2024

პოლონელმა ფერმერებმა უკრაინის საზღვართან სატვირთო ავტომობილების მოძრაობა ხუთი მიმართულებით სრულად გადაკეტეს. სახელმწიფო სასაზღვრო სამსახურის წარმომადგენელის, ანდრეი დემჩენკოს განცხადებით, პოლონელ ფერმერებს ამ ეტაპზე სრულად აქვთ ბლოკირებული სატვირთო ავტომობილების მოძრაობა. პუნქტებთან ამ დროისთვის 1 500 სატვირთო ავტომობილია გაჩერებული და ელოდება გზის გახსნას. არსებული ინფორმაციით, სამგზავრო ავტომობილები და ავტობუსები საზღვარს ხუთივე მიმართულებაზე უპრობლემოდ კვეთენ, თუმცა არის შეფერხება. პოლონელი ფერმერები უკვე რამდენიმე თვეა, მართავენ საპროტესტო აქციებს. სხვა პრობლემებს შორის, მათთვის ასევე ყველაზე დიდი პრობლემა უკრაინული იმპორტია.

ბელგოროდში უპილოტო საფრენი აპარატი ქალაქის ადმინისტრაციის შენობას შეეჯახა. ინფორმაციას გუბერნატორი, ვიაჩესლავ გლადკოვი “ტელეგრამზე” ავრცელებს. გლადკოვის თქმით, თავდასხმის შედეგად ორი ადამიანი დაშავდა. ერთ ქალს ჭრილობები აღენიშნება, მეორეს ტვინის შერყევა. შენობაში ჩამსხვრეულია მინები, დაზიანდა ფასადი.

სომხეთმა რუსეთს ერევნის საერთაშორისო აეროპორტიდან მესაზღვრეების გაყვანა ოფიციალურად მოსთხოვა. პუტინის პრესსპიკერის დიმიტრი პესკოვის ცნობით, უწყებრივი წერილი, რომ რუსმა მესაზღვრეებმა ზვარტნოცის აეროპორტში მუშაობა შეაჩერონ, უკვე მიიღეს. ერევნის აეროპორტიდან რუსი მესაზღვრეების გაყვანას 27 თებერვალს სომხეთის პარლამენტის თავმჯდომარემ მოითხოვა, ხოლო მოგვიანებით, უშიშროების საბჭოს მდივანმაც.

პოლონეთის სასაზღვრო დაცვის სამსახურის ცნობით, 9 მარტს ქვეყანაში არ შეუშვეს საქართველოს მოქალაქე, 27 წლის ფეხბურთელი. ის პოლონეთში ქუთაისიდან მიფრინავდა. ,,უცხოელი IT მონაცემთა ბაზაში იყო, როგორც მესამე ქვეყნის მოქალაქე, რომელსაც უარი უნდა ეთქვა შენგენის ზონაში შესვლაზე ან დარჩენაზე და როგორც არასასურველი პირი პოლონეთის რესპუბლიკის ტერიტორიაზე”, – ნათქვამია განცხადებაში. პოლონური მხარე ამბობს, რომ უცხოელის დაგეგმილი გამგზავრება ქუთაისში 12 მარტს შედგება.

ვატიკანი რომის პაპის განცხადებას განმარტავს, რომლითაც ის უკრაინას “თეთრი დროშის გამბედაობის” გამოჩენისკენ მოუწოდებდა. ვატიკანის პრესსპიკერი ამბობს, რომ პაპი ფრანცისკე უკრაინას არა კაპიტულაციისკენ, არამედ მოლაპარაკებებისთვის მზაობის გამოხატვისკენ მოუწოდებდა. ვატიკანის სახელმწიფო მდივანმა კარდინალმა პიეტრო პაროლინიმ კი თქვა, რომ ფრანცისკეს მოწოდება უკრაინაში მიმდინარე უსამართლო ომის დასრულებისკენაა მიმართული და “პირველ რიგში, ცეცხლი აგრესორმა რუსეთმა უნდა შეწყვიტოს.” ცნობისთვის, რომის პაპმა შვეიცარიულ ტელეკომპანიასთან განაცხადა, რომ რუსეთთან ომში მყოფმა უკრაინამ “თეთრი დროშის” გამბედაობა უნდა გამოიჩინოს. მან ასევე აღნიშნა, რომ მოსკოვმა და კიევმა მოლაპარაკებები საერთაშორისო ძალების დახმარებით უნდა წამოიწყონ.

რუსეთის არმიის 15 სამხედრო მოსამსახურეს, მშვიდობიანი მოსახლეობის მიმართ სასტიკი მოპყრობისა და ომის დანაშაულისთვის 12 წლით თავისუფლების აღკვეთა მიესაჯა. ინფორმაციას გენერალური პროკურატურა ავრცელებს. ჩერნიგოვის საოლქო პროკურატურის საჯარო ბრალდების თანახმად, 15 რუსი სამხედრო, ჩერნიგოვის რაიონის სოფელ იაგიდნიში, ომის კანონებისა და წეს-ჩვეულებების დარღვევისთვის, დამნაშავედ ცნეს. ბრალდებულებმა, 2022 წლის მარტის დასაწყისსში, იაგიდნიას სკოლის სარდაფში მოკლეს და იძულებით დააკავეს 368 ადამიანი, მათ შორის 69 არასრულწლოვანი. მათგან 10 მშვიდობიანი მოქალაქე დაკავების, არაადამიანური პირობებისა და აუცილებელი სამედიცინო დახმარების გამო დაიღუპა.

რუსეთი, ჩინეთი და ირანი ერთობლივ საზღვაო წვრთნებს “საზღვაო უსაფრთხოების სარტყელი – 2024″ ჩაატარებენ. ინფორმაციას რუსეთის თავდაცვის სამინისტრო ავრცელებს. ,,სწავლების პრაქტიკული ნაწილი არაბეთის ზღვის, ომანის ყურის ნაწილებში ჩატარდება,” – აცხადებენ სამინისტროში და აღნიშნავენ, რომ მანევრების მთავარი მიზანი საზღვაო ეკონომიკური საქმიანობის უსაფრთხოების შემუშავებაა. დამკვირვებლის სტატუსით წვრთნებში მონაწილეობას ასევე მიიღებენ პაკისტანის, ყაზახეთის, აზერბაიჯანის, ომანის, ინდოეთისა და სამხრეთ აფრიკის საზღვაო ძალების წარმომადგენლები.

ვაშინგტონში, თხილამურებით სრიალის დროს 600 ფუტის (183 მ) სიმაღლიდან ჩამოვარდნის შედეგად ერთი ადამიანი დაიღუპა. ინფორმაციას BBC ავრცელებს და წერს, რომ 20 წლის მედისონ სოლტსბურგმა დაცემის დროს “სასიკვდილო ტრავმული დაზიანებები” მიიღო. შემთხვევის დროს კიდევ ორი პირი დაშავდა. აშშ-ის სატყეო სამსახურის განაცხადებით, ვაშინგტონის მთას და მის მიმდებარე ტერიტორიებს აქვს ძალიან ციცაბო სათხილამურო ალპინისტური რელიეფი და ექვემდებარება მუდმივად ცვალებადი მთის საფრთხეებს. მათი თქმით, მოყინულმა ზედაპირებმა სახიფათო პირობები შექმნა.

აშშ-ის სახელმწიფო დეპარტამენტის 2025 წლის ბიუჯეტის პროექტის მიხედვით, საქართველოს საგარეო დახმარება 80 მილიონი დოლარით არის გათვალისწინებული, რაც 8 მილიონით ნაკლებია 2024 წლის მოცულობასთან შედარებით. ბიუჯეტის პროექტი კონგრესს განსახილველად გუშინ გაეგზავნა. ,,საქართველო (80.0 მილიონი აშშ დოლარი): მოთხოვნა საქართველოსთვის ხელს შეუწყობს ქვეყნის დემოკრატიულ და ეკონომიკურ განვითარებას, ხელს შეუწყობს ევროატლანტიკურ ინტეგრაციას და გაზრდის მდგრადობას მავნე გავლენის წინააღმდეგ. დაფინანსება ხელს შეუწყობს ინსტიტუციური კონტროლისა და ბალანსის გაძლიერებასა და კანონის უზენაესობას; საქართველოს სამოქალაქო საზოგადოების მიერ დემოკრატიული და ეკონომიკური განვითარების წინსვლის მცდელობების მხარდაჭერას; გააუმჯობესებს ხელმისაწვდომობას დამოუკიდებელ, სანდო და დაბალანსებულ მედიაზე; ხელს შეუწყობს პოლიტიკურ პლურალიზმს; მხარს დაუჭერს შერიგების…

უკრაინის საგარეო საქმეთა სამინისტრომ, რომის პაპის წინააღმდეგობრივი განცხადებების გამო, ვატიკანის წარმომადგენელი დაიბარა. ვატიკანის წარმომადგენელს, ვისვალდას კულბოკასს უთხრეს, რომ “უკრაინაში იმედგაცრუებულნი არიან” პაპის სიტყვების გამო, განსაკუთრებით კი “თეთრი დროშის” აღმართვასთან დაკავშირებით. უკრაინაში ვატიკანის ელჩს კიდევ ერთხელ შეახსენეს “მშვიდობის ფორმულა” და უკრაინის სურვილი სურვილი, მიაღწიოს მშვიდობას, რომელიც სამართლიანი და გაერო-ს წესდების პრინციპებზე დაფუძნებული უნდა იყოს. შეგახსენებთ, რომ რომის პაპმა შვეიცარიულ გამოცემასთანინტერვიუში განაცხადა: “მე ვფიქრობ, რომ ყველაზე ძლიერი არის ის, ვინც სიტუაციას უყურებს, ფიქრობს ხალხზე, “თეთრი დროშის” აღმართვის გამბედაობა აქვს და აწარმოებს მოლაპარაკებებს. სიტყვა “მოლაპარაკებები” ვაჟკაცური სიტყვაა. როცა ხედავ, რომ დამარცხებული ხარ, რომ…

შვეიცარიაში, მატერნჰორნის მთის მახლობლად დაკარგული ექვსი მოთხილამურიდან ხუთი დაღუპული იპოვეს. ექსტრემალური ამინდის პირობების გამო მეექვსე მოთხილამურის სამძებრო სამუშაოები შეფერხებულია. ,,ჩვენი პრიორიტეტი არის მეექვსე ადამიანის პოვნა. სანამ იმედი გვაქვს, ჩვენ ყველაფერს გავაკეთებთ, მაგრამ ჩვენ უნდა ვიყოთ რეალისტები იმ პირობების მიმართ, რაც მან გაიარა ბოლო 48 საათის განმავლობაში,” – განაცხადა პოლიციამ. მათივე თქმით, ექვსი მოთხილამურიდან 5 ერთ ოჯახს ეკუთვნოდა. ჯერჯერობით უცნობია, ნაპოვნი 5 დაღუპულიდან ყველა ერთი ოჯახის წევრი იყო თუ არა. ცნობისთვის, მოთხილამურეები Tête Blanche მთის გარშემო, შაბათს, მატერჰორნის მთასთან, ზერმატ-აროლას ბილიკზე დაიკარგნენ.