დღე: ივლისი 16, 2023

კიევის მერმა, ვიტალი კლიჩკომ, ჟურნალისტის კითხვაზე, სურს თუ არა კლიჩკოს უკრაინის პრეზიდენტობა ასეთი პასუხი გასცა: ”ბევრს აქვს შთაბეჭდილება, რომ პრეზიდენტობა პრივილეგიაა, ეს დიდი შეცდომაა. პრეზიდენტობა დიდი პასუხისმგებლობაა, ძალიან მძიმე ტვირთია. ვაკეთებ ჩემს საქმეს, რადგან მგონია, რომ უკრაინა უნდა იყოს დემოკრატიული, განვითარებული ქვეყანა. თუ ჩემი ცოდნა, ენერგია და გამოცდილებაა საჭირო, რომ უკრაინა ევროპული გახდეს, ამისთვის ყველაფერს გავაკეთებ და ვაკეთებ კიდეც”, – განაცხადა კლიჩკომ. მისივე თქმით, ახლა რაღაც თანამდებობაზე საუბარი სისულელეა, რადგან ყველას ერთი გეგმა აქვს – ”ომში გამარჯვება” , ხოლო როცა საპრეზიდენტო არჩევნები იქნება, პრეზიდენტობაზე შემდეგ ისაუბრებს.

ჩინეთის საზღვაო ფლოტილა რუსეთის საზღვაო და საჰაერო ძალებთან ერთად იაპონიის ზღვაში წვრთნების გასამართად გაემგზავრა. წვრთნები კოდური სახელწოდებით ,,ჩრდილოეთი/ინტერაქცია-2023“, ჩინეთსა და რუსეთს შორის გაძლიერებულ სამხედრო თანამშრომლობაზე მიანიშნებს. როგორც ჩინეთის თავდაცვის სამინისტროში განაცხადეს, წვრთნების მიზანი “სტრატეგიული წყლის გზების უსაფრთხოების დაცვაა”.  

უკრაინის გენერალური პროკურორის, ენდრეი კოსტინის ინფორმაციით, უკრაინაში რუსეთის 50-ზე მეტი მოქალაქე სამხედრო დამნაშავედაა აღიარებული. გამამტყუნებელი განაჩენი სასამართლოების მიერაა (უმეტესობა დაუსწრებლად) გამოტანილი. ამავე ბრალდებაზე 219 პირთან დაკავშირებით გამოძიება დასრულებულია და მათი საქმეები უკვე სასამართლოებშია გადაცემული. უკრაინის გენერალურმა პროკურორმა ასევე აღნიშნა, რომ დადგენილია რუსეთის 368 სამხედროს ვინაობაც, რომლებიც ეჭვმიტანილის სტატუსს ატარებენ.  

უკრაინის მთელ ტერიტორიაზე საჰაერო განგაში გამოცხადდა. ინფორმაციას უკრაინის საჰაერო ძალების Telegram არხი ავრცელებს. საჰაერო განგაში მოზდოკის აეროდრომიდან რუსული Ту-22м3-ის აფრენას უკავშირდება. ამ დროისთვის დამატებითი დეტალები უცნობია.

ისრაელში, სასამართლო რეფორმის მოწინააღმდეგეების პროტესტი 28-ე კვირაა მიმდინარეობს. ათიათასობით ადამიანი თელ ავივის ქუჩებში შეიკრიბა. მომიტინგეებმა აქციაზე, პრემიერ ნეთანიაჰუს რეზიდენციის წინ ჩირაღდნები აანთეს. დემონსტრაციები მოეწყო სანაპირო ქალაქებში – ჰერცლიასა და ნეთანიაში. პროტესტს შეუერთდა ისრაელის სამედიცინო ასოციაცია, რომელშიც ისრაელის ექიმების 90%-ია გაერთიანებული. შეგახსენებთ, რომ მასობრივი საპროტესტო აქციები ისრაელში მას შემდეგ დაიწყო, რაც იანვარში, თანამდებობის დაკავებიდან რამდენიმე დღეში, ბენიამინ ნეთანიაჰუს მთავრობამ სასამართლო რეფორმის პროექტი წარადგინა. პარლამენტმა გასული კვირის დასაწყისში მხარი დაუჭირა სასამართლო რეფორმის ძირითად ნაწილებს, თუმცა კანონპროექტმა დასამტკიცებლად კიდევ ორი კენჭისყრა უნდა გაიაროს. როგორც კანონპროექტის მოწინააღმდეგეები აცხადებენ, სასამართლო რეფორმა ძალაუფლების დანაწილების პრინციპს შეასუსტებს.

რუსეთის დაქირავებულ მებრძოლთა დაჯგუფება „ვაგნერი“ ბელარუსში შევიდა, ინფორმაციას ბელარუსის მხარე ადასტურებს. კერძოდ,  „ბელარუსკი ჰაიუნის“ ინფორმაციით, კოლონა, რომელიც ბელარუსის მიმართულებით გადაადგილდებოდა საკმაოდ დიდი იყო და მის შემადგენლობაში ტექნიკა და შეიარაღება შედიოდა. გავრცელებული ინფორმაციით, ბელარუსის მიმართულებით დაძრული კოლონა მოიცავდა 60-მდე ავტომანქანას, “პიკაპებს”, სატვირთო მანქანებს, მიკროავტობუსებს და სხვა შეიარაღებას. ასევე, მათთვის, ბელარუსულმა მხარემ საველე პირობებიც მოაწყო, სადაც დაახლოებით  15 ათასი ადამიანი ეტევა. პარალელურად გავრცელდა კადრები,  „ვაგნერის“ მებრძოლები  როგორ ამზადებენ ბელარუსის სამხედროებს. დამატებითი ინფორმაცია, რისთვის ემზადებიან ისინი, არ გავრცელებულა.