დღე: ივნისი 24, 2023

რუსული ფორბსის ინფორმაციით, მოსკოვის მერის სერგეი სობიანინის განცხადებით, მოსკოვში ანტიტერორისტული ოპერაციის რეჟიმის გამოცხადების შემდეგ ყველა დაგეგმილი მასობრივი ღონისძიება გაუქმდა. მისივე განცხადებით, ქალაქში სამოქალაქო სერვისები სრულად ფუნქციონირებს და არც მოძრაობაა შეზღუდული. თუმცა, მაგალითად 24 ივნისს 39 ათას მოსწავლეს გამოსაშვები საღამო ჰქონდა, რომელმაც ერთი კვირით – 1 ივლისამდე გადაიწია. რუსეთის სახელმწიფო სააგენტო TASS-ის ცნობით, ქვეყნის საგანგებო სიტუაციების სამინისტრომ უნივერსიტეტების კურსდამთავრებულებისთვის დიპლომების გადაცემის ცერემონია გადადო. დღეს დილით სობიანინმა ასევე განაცხადა, რომ მოსკოვში მიიღებოდა ” ანტიტერორისტული ზომები”, რომლებიც მიზნად ისახავდა უსაფრთხოების ზომების გაძლიერებას”. ამასთან, მოსკოვის მერმა აღნიშნა, რომ გზებზე დამატებითი კონტროლი დაინერგა.

რუსეთის თავდაცვის სამინისტრო “ვაგნერის” მებრძოლებს მიმართავს. სამინისტრო “ვაგნერის” მებრძოლებს მოუწოდებს უარი თქვან შეიარაღებულ აჯანყებაში მონაწილეობაზე. თავდაცვის სამინისტრო ამტკიცებს, რომ ყველა მებრძოლსა თუ მეთაურს, ვინც მათ მიმართა, საჭირო დახმარება აღმოუჩინეს. “მივმართავთ ვაგნერის თავდასხმის რაზმების მებრძოლებს. თქვენ მოტყუებით ხართ ჩართულების პრიგოჟინის კრიმინალურ ავანტიურაში და შეიარაღებულ აჯანყებაში. რამდენიმე რაზმიდან თქვენმა ბევრმა თანამებრძოლმა თავისი შეცდომა უკვე გააცნობიერა და მუდმივი განლაგების პუნქტებში უსაფრთხოდ დაბრუნებისთვის დახმარება ითხოვა,” – ნათქვამია განცხადებაში.  

“ვაკვირდებით სიტუაციას, რუსეთში მიმდინარე მოვლენებს ჯო ბაიდენიც გაეცნო”, – ამის შესახებ შეერთებული შტატების ეროვნული უშიშროების საბჭოს სპიკერმა, ადამ ჰოჯიმ განაცხადა. ინფორმაციას CNN ავრცელებს. „ჩვენ ვაკვირდებით სიტუაციას და გავმართავთ კონსულტაციებს მოკავშირეებთან და პარტნიორებთან ამ მოვლენებთან დაკავშირებით“, – ნათქვამია ჰოჯის განცხადებაში. ცნობისთვის, რუსეთში ამ დროისთვის დაძაბულობაა. სიტუაცია მას შემდეგ აირია, რაც დაჯგუფება “ვაგნერის” ხელმძღვანელმა ევგენი პრიგოჟინმა რუსული არმია “ვაგნერის” ბანაკებზე სარაკეტო თავდასხმაში დაადანაშაულა

კრემლის პრესსპიკერის ინფორმაციით, პრეზიდენტი პუტინი მოსახლეობას მიმართავს. დიმიტრი პესკოვის განცხადებით, პუტინი სიტყვით “მალე” გამოვა. პესკოვს არ დაუკონკრეტებია რა თემაზე ილაპარაკებს პუტინი, მაგრამ სავარაუდოა, რომ ის დაკავშირებული იქნება კერძო სამხედრო კომპანია “ვაგნერის” ხელმძღვანელ, ევგენი პრიგოჟინთან. პრიგოჟინმა დღეს დილით განაცხადა, რომ როსტოვში შევიდნენ და ყველა სამხედრო ობიექტს აკონტროლებენ.

როსტოვში სამხრეთის სამხედრო ოლქის შტაბთან სამხედრო ბკოლპოსტები აღმართეს – ინფორმაციას ამის შესახებ რუსული სახელმწიფო გამოცემა  ავრცელებს. მედიის ინფორმაციით, ბლოკპოსტებზე სამხედრო მოსამსახურეები და სამართლამდამცავი ორგანოების თანამშრომლები დგანან. შტაბთან მიმდებარე ქუჩებზე სამხედროების პოსტებია აღმართული, პოლიციის მანქანები და ჯავშანტექნიკა დგას. გამოცემის ცნობით, როსტოვის დასავლეთ ნაწილში ავიაციის ხმა ისმის.

რუსეთის მიერ კიევის დაბომბვას მსხვერპლი მოჰყვა – ამის შესახებ ინფორმაციას უკრაინული მედია ავრცელებს. გამოცემის ცნობით, მაღალსართულიან კორპუსში, ნამსხვრევების მოყოლის შედეგად, ორი ადამიანი დაიღუპა, რვა კი დაშავდა. გარდა ამისა, ორი ადამიანი საავადმყოფოში გადაიყვანეს, დანარჩენებს სამედიცინო დახმარება ადგილზევე ჩაუტარდათ. ასევე დაზიანდა 24-სართულიანი შენობის ავტოსადგომზე მდგარი 40-მდე მანქანა. ამასთან, გასულ ღამეს საჰაერო განგაში გამოცხადდა სუმის, პოლტავას, ხარკოვის, დნეპროპეტროვსკის, დონეცკის, ზაპოროჟიეს, ხერსონის, მიკოლაივის და ოდესის რეგიონებში.