დღე: ივნისი 26, 2023

კერძო სამხედრო კომპანია “ვაგნერის” ხელმძღვანელის ევგენი პრიგოჟინის წინააღმდეგ შეიარაღებული აჯანყების ორგანიზების შესახებ სისხლის სამართლის საქმის გამოძიება არ შეწყვეტილა. ამის შესახებ ინფორმაციას „კომერსანტი“ წერს. ”კომერსანტის” ცნობით, გამოძიება ამ დრომდე მიმდინარეობს. ცნობისთვის, 25 ივნისს, ზოგიერთმა მედიამ და ტელეგრამის არხმა გაავრცელა ინფორმაცია, რომ გენერალურმა პროკურატურამ, რომელმაც მანამდე ცნო FSB-ის გამომძიებლის გადაწყვეტილება აჯანყების საქმის აღძვრის შესახებ კანონიერად და გამართლებულად, გააუქმა აღნიშნული გადაწყვეტილება და, შესაბამისად, პრიგოჟინის სისხლისსამართლებრივი დევნა.

საფრანგეთის პრეზიდენტის, ემანუელ მაკრონის განცხადებით,  „ვაგნერის“ ამბოხი ხაზს უსვამს უთანხმოებას, რომელიც რუსეთის ძალოვან წრეებში არსებობს. მისი თქმით,  მიმდინარე მოვლენებს აქტიურად ადევნებდა თვალს. „სიტუაცია ჯერ კიდევ ვითარდება, მაგრამ ეს გვიჩვენებს უთანხმოებებს, რომლებიც არსებობს რუსეთში, სისუსტეს როგორც მის არმიაში, ასევე დამხმარე ძალებში, როგორიცაა „ვაგნერის“ ჯგუფი“, – განაცხადა მაკრონმა    

მოსკოვსა და მოსკოვის რეგიონში კონტრტერორისტული ოპერაციის რეჟიმი გაუქმდა. ამის შესახებ ინფორმაციას TASS-ი მოსკოვისა და მოსკოვის რეგიონის რუსეთის უშიშროების ფედერალური სამსახურის პრესსამსახურზე დაყრდნობით ავრცელებს. ,,ფედერალური კანონის შესაბამისად, ადამიანების სიცოცხლეს, ჯანმრთელობას, საკუთრებას და სხვა კანონიერად დაცულ ინტერესებს საფრთხის არარსებობის გამო, კონტრტერორისტული ოპერაციის ხელმძღვანელმა, ქ. რუსეთის FSB-მ ქალაქ მოსკოვისა და მოსკოვის რეგიონისთვის მიიღო გადაწყვეტილება, გააუქმოს მოსკოვის ტერიტორია და მოსკოვის რეგიონი CTO-ს სამართლებრივი რეჟიმის 2023 წლის 26 ივნისს 09:00 საათიდან“, – ნათქვამია ანგარიშში. ცნობისთვის, რუსეთის სამ რეგიონში კონტრტერორისტული ოპერაციის რეჟიმი ევგენი პრიგოჟინის ამბოხის გამო დაწესდა.

ლიეტუვის პრეზიდენტის, გიტანას ნაუსედას განცხადებით, ბელარუსის მხრიდან „ვაგნერის“ სამხედრო დაჯგუფების ხელმძღვანელის, ევგენი პრიგოჟინის ”მასპინძლობის” შემთხვევაში, ნატო-ს აღმოსავლეთ ფლანგის გაძლიერება დასჭირდება. აღნიშნულის შესახებ ქვეყნის პრეზიდენტმა სახელმწიფო უშიშროების საბჭოს სხდომის შემდეგ ისაუბრა, სადაც კრემლის წინააღმდეგ „ვაგნერის“ ამბოხი განიხილებოდა. „თუ პრიგოჟინი ან ვაგნერის ჯგუფის ნაწილი ბელარუსიაში აღმოჩნდება გაურკვეველი გეგმებითა და გაურკვეველი განზრახვებით, ეს მხოლოდ იმას ნიშნავს, რომ ჩვენ კიდევ უფრო უნდა გავაძლიეროთ ჩვენი აღმოსავლეთის საზღვრების უსაფრთხოება“, – განაცხადა გიტანას ნაუსედამ. ნაუსედამ დასძინა, რომ ლიეტუვა უფრო მეტ სადაზვერვო შესაძლებლობებს დაუთმობს „ბელარუსის პოლიტიკური და უსაფრთხოების ასპექტების“ შეფასებას. მისი თქმით, მას სჯერა, რომ რუსეთის პრეზიდენტი ვლადიმერ პუტინი მომავალში კიდევ უფრო დიდ გამოწვევებს შეხვდება…

უკრაინაში დაღუპული ქართველი მებრძოლი მიხეილ ყაფლანიშვილი უკრაინის პრეზიდენტმა, ვოლოდიმირ ზელენსკიმ  გამოჩენილი მამაცობისთვის ღირსების ორდენითა და მედლით დააჯილდოვა. ამის შესახებ ინფორმაციას უკრაინაში მებრძოლი ქართველები, სოციალურ ქსელში ავრცელებენ. მათივე ცნობით, მედალს გარდაცვლილის სამხედროს დედას საქართველოში უკრაინის დიპლომატიური წარმომადგენლობა გადასცემს. ცნობისთვის, მიხეილ ყაფლანიშვილი ლუგანსკში 21 ოქტომბერს ემსხვერპლა რუსეთის აგრესიას.

უკრაინის თავდაცვის მინისტრის ალექსეი რეზნიკოვის განცხადებით,  ამჟამინდელ კონტრშეტევა „მოსამზადებელი ოპერაციაა“ და ის წარმატებული იქნება, როდესაც სრულად ამოქმედდება. მისივე თქმით, კონტრშეტევა შემდეგი ნაბიჯია გამარჯვებამდე. „ჩემთვის ეს კონტრშეტევა შემდეგი ნაბიჯია გამარჯვებამდე. ვგრძნობ, რომ ჩვენ მოვიგებთ ამ ომს, რადგან ჩვენ ვიბრძვით ჩვენი ქვეყნისთვის… ეს წელი გარდამტეხი იქნება“, – განაცხადა უკრაინის თავდაცვის მინისტრმა. რეზნიკოვის თქმით, ნატოს ქვეყნების საუკეთესო ინტერესშია უკრაინის გაწევრიანება, რადგან უკრაინამ იცის, როგორ დაამარცხოს და შეაკავოს რუსული შეიარაღებული ძალები.

უკრაინის პრეზიდენტის, ვოლოდიმირ ზელენსკის განცხადებით, რაც უფრო დიდხანს გაგრძელდება რუსული აგრესია, მით უფრო მეტ დეგრადაციას გამოიწვევს თავად რუსეთში. მისი თქმით, რუსული აგრესია თანდათან უბრუნდება მშობლიურ ნავსადგურს. ,,რაც უფრო დიდხანს გაგრძელდება რუსული აგრესია, მით უფრო მეტ დეგრადაციას გამოიწვევს თავად რუსეთში. ასეთი დეგრადაციის ერთ-ერთი გამოვლინებაა ის, რომ რუსული აგრესია თანდათან უბრუნდება მშობლიურ ნავსადგურს. ჩვენ ლიდერებთან საუბარში გავცვალეთ შეფასებები იმის შესახებ, რაც ხდება რუსეთში. ჩვენ ვხედავთ, როგორ ვითარდება სიტუაცია და ვიცით, როგორ მოვიქცეთ”,- განაცხადა ზელენსკიმ.