დღე: თებერვალი 4, 2023

დიმიტრი მედვედევის განცხადებას, რომ თუ კიევი ყირიმს შეუტევს, მთელი უკრაინა დაიწვება, უკრაინის პრეზიდენტის წარმომადგენელი პასუხობს. როგორც უკრაინის პრეზიდენტის ოფისის ხელმძღვანელის მრჩეველი – მიხაილო პოდოლიაკი აცხადებს, ყირიმი უკრაინაა და მისი გათავისუფლება შეუძლია უკრაინას. „საერთაშორისო სამართალი მკაფიოა. უკრაინას შეუძლია თავისი ტერიტორიების გათავისუფლება ნებისმიერი ინსტრუმენტების გამოყენებით. ყირიმი უკრაინაა. ამიტომ, რუსეთის ოფიციალური პირების მუქარა „შურისძიების დარტყმების“ შესახებ, არის მხოლოდ მასობრივი მკვლელობების ჩადენის განზრახვის დაფიქსირება და დაშინების მცდელობა რუსეთის ტრადიციულ სტილში. ყოველთვის უგულებელყავით მედვედევი“, – აცხადებს პოდოლიაკი. „მთელი უკრაინა, რომელიც კიევის მმართველობის ქვეშ დარჩება, დაიწვება“ – მედვედევის მუქარა

კრემლიდან ისევ იმუქრებიან. რუსეთის უშიშროების საბჭოს თავმჯდომარის მოადგილის, დიმიტრი მედვედევი აცხადებს, რომ  თუ უკრაინა ყირიმს თავს დაესხმება, მთელი უკრაინა დაიწვება. „ასეთ შემთხვევაში მოლაპარაკებები არ იქნება, იქნება მხოლოდ საპასუხო დარტყმები.  მთელი უკრაინა, რომელიც კიევის მმართველობის ქვეშ დარჩება, დაიწვება“ – აცხადებს მედვედევი. მისი თქმით, რუსეთი მზად არის, საფრთხის ბუნებიდან გამომდინარე, გამოიყენოს ყველა სახის იარაღი ბირთვული შეკავების საფუძვლების ჩათვლით.  

პატიმრობაში მყოფი მიხეილ სააკაშვილი კლინიკაში დედამ მოინახულა. როგორც გიული ალასანიამ ჟურნალისტებს განუცხადა, სააკაშვილს სიცხე აქვს და მდგომარეობა არ უმჯობესდება. „სიცხე აქვს 37.7. ადამიანს 5 თვის განმავლობაში სულ სიცხე აქვს. გუშინ გაჟღერდა, რომ თურმე რაღაც სპეცდიეტა აქვს. როგორც ჩანს, სპეცდიეტის გამო აქვს ეს სიცხეები. ტვინი რომ აქვს დაზიანებული, ესეც სპეცდიეტის შედეგია, როგორც ჩანს. რომ ათრიეს და მალები, მარცხენა მკლავი რომ აქვს ჩამტვრეული, ესეც თვითდაზიანებით ხდება თურმე. იქიდან გამოვდივარ აბსოლუტურად დანგრეული. ჩემს თვალწინ ქრება, ადამიანი დნება, მიდის და მე ამის მოწმე ვარ“, – აღნიშნა ალასანიამ ჟურნალისტებთან.

აშშ-ის გენერალური პროკურორის, მერიკ გერლენდის განაცხადებით, სანქცირებული რუსი ოლიგარქის აქტივები უკრაინის აღდგენას მოხმარდება. აღნიშნული განცხადება  უკრაინის გენერალურ პროკურორთან, ანდრეი კოსტინთან შეხვედრის შემდეგ გაკეთდა. „პირველად ისტორიაში, ავტორიზაციას ვაძლევ,  ჩამორთმეული რუსული აქტივების უკრაინაში გამოყენებას. აღნიშნული აქტივების ჩამორთმევა მოხდა მას შემდეგ, რაც აპრილში რუს ოლიგარქს, კონსტანტინ მალოფეევს სანქციებისგან თავის არიდებაში წავუყენე ბრალი“, – განაცხადა აშშ-ის გენერალურმა პროკურორმა. მისივე განმარტებით, რუსი სამხედრო დამნაშავეები აშშ-ში თავშესაფარს ვერ ნახავენ.  

ამერიკული არასამთავრობო ორგანიზაცია „Freedom House“ პატიმრობაში მყოფი მიხეილ სააკაშვილის ჯანმრთელობის მდგომარეობასთან დაკავშირებით განცხადებას ავრცელებს. „შეშფოთებული ვართ პატიმრობაში მყოფი საქართველოს ყოფილი პრეზიდენტის, მიხეილ სააკაშვილის შესახებ ბოლოდროინდელი ცნობებით და ფოტოებით. საქართველოს მთავრობა პასუხისმგებელია სააკაშვილის ჯანმრთელობის მდგომარეობასა და კეთილდღეობაზე, ვიდრე ის პატიმრობაში იმყოფება. მოვუწოდებთ მათ უზრუნველყონ დაუყოვნებლივი და სრული სამედიცინო დახმარება”, – აღნიშნულია ორგანიზაციის განცხადებაში.  

რუსეთში 38 ფიზიკურ პირსა და 16 იურიდიულ პირს კანადის საგარეო საქმეთა სამინისტრომ სანქციები დაუწესა. მათ კავშირი აღმოაჩნდათ  რუსულ დეზინფორმაციასა და პროპაგანდასთან. სანქციების ქვეშ მოექცა სახელმწიფო მედიაჰოლდინგი „რასია სეგოდნია“, რომელსაც დმიტრი კისილიოვი და მარგარიტა სიმონიანი ხელმძღვანელობენ; სანქციები შეეხო ტელეწამყვანებსა და ჟურნალისტებს, ასევე კრემლის მხარდამჭერ მომღერლებს, მათ შორის არიან ოლეგ გაზმანოვს, ნიკოლაი ბასკოვს, ლარისა დოლინას, დიმა ბილანს, ირინა ალეგროვას, იუმორისტ მიხაილ გალუსტიანსა და სხვებს. „რუსულ დეზინფორმაციულ ოპერაციებში ჩართული არიან ცნობილი ადამიანები და ე.წ. საინფორმაციო ორგანიზაციები, რომლებიც ახმოვანებენ კრემლის არგუმენტებს და მცდელობებს, გაამართლონ უკრაინაში სისასტიკეები“, – აღნიშნულია კანადის საგარეო უწყების განცხადებაში.  

„ვისაუბრეთ ევროკავშირის სანქციების მეათე პაკეტის მომზადებაზე. გვაქვს შეთავაზებები ამ პაკეტთან დაკავშირებით, რომლებიც ჩვენს პარტნიორებს გადავეცით“ – აღნიშნა ვოლოდიმირ ზელენსკიმ ვიდეომიმართვაში უკრაინა-ევროკავშირის სამიტის შედეგების შეფასებისას. პრეზიდენტის თქმით, განსაკუთრებით რთული ვითარებაა დონეცკის მიმართულებით. „ფრონტზე სიტუაცია ძალიან მძიმე რჩება, განსაკუთრებით დონეცკის მიმართულებით. მადლობას ვუხდი ყველა ჩვენს მეომარს, რომლებიც უძლებენ დამპყრობლების სასტიკ ზეწოლას, რომლებიც მკაფიოდ და სრულად ასრულებენ ჩვენი პოზიციების დაცვის ამოცანებს და ასეთ მძიმე პირობებშიც უკრაინას კარგ ამბებს უგზავნიან. მადლობა ყველას, ვინც იბრძვის უკრაინისთვის, ვინ გვეხმარება ოკუპანტებისგან თავდაცვაში“, – განაცხადა პრეზიდენტმა ზელენსკიმ ვიდეომიმართვაში.

უკრაინის პრეზიდენტის განცხადებით, შესაძლოა, უკრაინამ  ევროკავშირში გაწევრიანებაზე მოლაპარაკებები მიმდინარე წელს დაიწყოს. როგორც ვოლოდიმირ ზელენსკი განმარტავს, უკრაინა მიზნისკენ კარგი ტემპებით მიდის. „უკრაინა მიდის თავისი მიზნისკენ. ჩვენ შევინარჩუნეთ უკრაინული თავისუფლება. ჩვენ ვიცავთ უკრაინის ღირებულებებს და მივაღწევთ ჩვენი სახელმწიფოს ევროპულ მიზნებს. ვსაუბრობდით და ვსაუბრობთ უკვე როგორც ევროპული საზოგადოების მონაწილეები. ვმუშაობთ, რომ ეს იურიდიულად დავაფიქსიროთ. რაზე ვისაუბრეთ დღეს – ევროკავშირში უკრაინის წევრობის შესახებ მოლაპარაკებების დაწყება მიმდინარე წელს არის შესაძლებელი. პარტნიორებისთვის გასაგებია,  რომ მიმდინარე წელს,  ისევე, როგორც გასულ წელს, აუცილებელია ჩვენი სახელმწიფო თავდაცვითი მხარდაჭერის და რუსეთზე ზეწოლის გაძლიერება, მათ შორის სასანქციო ზეწოლის“ – აცხადებს პრეზიდენტი.

უკრაინა პენტაგონისგან GLSDB-ის ჭირვებს გადასცემს. როგორც პენტაგონის პრესსპიკერი პატრიკ რაიდერი აცხადებს, თავად უკრაინამ უნდა გადაწყვიტოს, როგორ გამოიყენებს GLSDB ჭურვებს. „ახალი დახმარების პაკეტის ფარგლებში ჩვენ უკრაინას მივაწვდით GLSDB ჭურვებს. ეს მათ შესაძლებლობას მისცემს,  შორ მანძილზე იმოქმედონ და  განახორციელონ ოპერაციები თავიანთი ქვეყნის დასაცავად, დაიბრუნონ სუვერენული ტერიტორიები, რომელიც რუსეთის მიერაა ოკუპირებული. ჩვენ მათთან ვმუშაობთ, რათა მივცეთ შესაძლებლობა, რომ ბრძოლის ველზე ეფექტურები იყვნენ“,“ – აცხადებს პატრიკ რაიდერი.