დღე: თებერვალი 12, 2023

პაკისტანელმა მოქალაქემ, რომლის ვინაობაც უცნობია, თურქეთში მომხდარი მიწისძვრის გამო, დაზარალებულთა დასახმარებლად 30 მილიონი დოლარი გაიღო. მამაკაცი ამერიკის შეერთებულ შტატებში თურქეთის საელჩოში გამოცხადდა და დონაცია განახორციელა. მისი ვინაობა ინკოგნიტოა. ინფორმაციას პაკისტანის პრემიერ-მინისტრი ავრცელებს. „გაოცებული ვარ უცნობი პაკისტანელის მაგალითით, რომელიც ამერიკაში თურქეთის საელჩოში მივიდა და 30 მილიონი დოლარის დონაცია განახორციელა“, – აცხადებს პრემიერი.  

უკრაინის პრეზიდენტის ოფისის ხელმძღვანელი მიხაილო პოდოლიაკი უკრაინის მოქალაქე მიხეილ სააკაშვილთან დაკავშირებით განცხადებას აკეთებს. როგორც პოდოლიაკი აცხადებს, საქართველო აგრძელებს ექსპრეზიდენტ სააკაშვილის მკვლელობას. “რუსული (საბჭოთა კავშირი 2) ბანაკი ასეთი მიმზიდველია? მნიშვნელოვანია „სასიკვდილო საჩუქრის“ მიცემა პუტინისთვის, რომელიც მაინც წააგებს? თუ ისეთი ქვეყნის რეპუტაციის ქონა, რომ ჰქონდეს, რომელმაც პრეზიდენტი აწამა. საქართველო აგრძელებს ექსპრეზიდენტ სააკაშვილის მკვლელობას. უდავოა, რომ ეს აუქმებს საქართველოს ევროპულ პერსპექტივებს?” – აცხადებს პოდოლიაკი.  

უკრაინული მხარის ინფორმაციით, რუსეთს შავ ზღვაში დომინირების უფლება ჩამორთმებული აქვს. აღნიშნულ ინფორმაციას უკრაინის თავდაცვის მინისტრის ოლექსი რეზნიკოვი ავრცელებს. „რუსეთის ფედერაციას შავ ზღვაში დომინირება ჩამოვართვით. კერძოდ, ჩვენი უკრაინული „ნეპტუნების“ წარმატებით გამოყენების შემდეგ, როდესაც კრეისერი „მასკვა“ ცნობილ მისამართზე ჩაიძირა“, – განაცხადა რეზნიკოვმა. მინისტრის ინფორმაციით, „Harpoon“-ის ტიპის ხომალდსაწინააღმდეგო რაკეტები ამჟამად უკრაინის არმიას ემსახურება, რუსულ მხარეს კი ოდესასთან ზღვიდან მიახლოების შესაძლებლობა არ აქვს.  

თურქეთსა და სირიაში, მიწისძვრის შედეგად დაღუპული ადამიანების რაოდენობა, ამ ეტაპზე, 24 000-ზე მეტია. ნანგრევებში ადამიანებს ისევ ეძებენ. მსხვერპლთა რაოდენობა საათობრივად იზრდება. დაღუპულებისთვის თურქეთში საერთო სამარხების გათხრა დაიწყეს. ვინაიდან სასაფლაოებზე ადგილები არ არის, რამდენიმე იმამმა ქალაქში საერთო სასაფლაოების გახსნის შესახებ განაცხადა. „ხალხის 40%, ვინც ამ შენობებში ცხოვრობდა, შესაძლოა, გარდაცვლილი იყოს. ორშაბათიდან დამარხული ცხედრების თვლა შევწყვიტე. სასაფლაო გავაფართოვეთ. ნანგრევების ქვეშ ხალხი ჯერ კიდევ რჩება. გამოყვანის შემდეგ მათაც დავმარხავთ. მოქალაქეების დახმარებით ცხედრებს გვიან ღამითაც ვმარხავთ”, – აცხადებს ერთ-ერთი იმამი.