დღე: სექტემბერი 9, 2023

შატილის მიმართულებით გადაადგილება თავისუფალია. ამის შესახებ ინფორმაციას საქართველოს რეგიონული განვითარებისა და ინფრასტრუქტურის სამინისტროს, საავტომობილო გზების დეპარტამენტი ავრცელებს. „ჩატარებული გაწმენდითი სამუშაოების შედეგად, შიდასახელმწიფოებრივი მნიშვნელობის ჟინვალი-ბარისახო-შატილის საავტომობილო გზის 90-ე და 79-ე კმ-ებზე ავტოტრანსპორტის მოძრაობა თავისუფალია“, – აღნიშნულია უწყების ინფორმაციაში.

ძლიერმა წვიმამ და წყალმოვარდნებმა სოფელ ჭაქვინჯში ერთ-ერთი ოჯახის საკარმიდამო დამეწყრა. ტერიტორიიდან ოჯახის ევაკუაცია გახდა საჭირო. მეწყერმა პრობლემა შეუქმნა უბანთან დამაკავშირებელ გზასაც. ასევე, პრობლემებია ქალაქ ზუგდიდშიც. ქუჩები დაიტბორა და საკანალიზაციო ჭებიდან ფეკალური მასა გადმოვიდა. დატბორილია საცხოვრებელი სახლების პირველი სართულებიც.

გურიის რეგიონში, სტიქიის ზონაში სამაშველო ღონისძიებები გრძელდება. საგანგებო სიტუაციების მართვის სამსახურის მეხანძრე-მაშველების მიერ ოზურგეთის და ლანჩხუთის მუნიციპალიტეტის სოფლებიდან 122 ადამიანის ევაკუაცია განხორციელდა, მათ შორის არასრულწლოვანების. ისინი უსაფრთხო ადგილას არიან გადაყვანილები. არსებული ინფორმაციით, მეხანძრე-მაშველებმა სოფლებში მცხოვრებ მოსახლეობას პირველადი მოხმარების ნივთები, მედიკამენტები და პროდუქტები ჩაუტანეს. გურიის რეგიონში ამ დროისათვის მობილიზებულია როგორც ცოცხალი ძალა, ასევე მძიმე ტექნიკა და მცურავი საშუალებები. სტიქიის ზონაში მონიტორინგი სპეციალური დრონებით მიმდინარეობს.

ეროვნული არქივის კინოცენტრში გაჩენილი ხანძრის შედეგად ისტორიული კინოფირებია განადგურებული. ამის შესახებ ინფორმაციას საბჭოთა წარსულის კვლევის ლაბორატორია ავრცელებს. მათივე ცნობით, ჯერ დაზუსტებით არაა დადგენილი, რა პერიოდის და მოცულობის ზარალზეა საუბარი. ,,8 სექტემბერს, ეროვნული არქივის კინოსაცავში გაჩენილმა ხანძარმა ისტორიული კინოფირები გაანადგურა. მიუხედავად იმისა, რომ ჯერ დაზუსტებით არაა დადგენილი რა პერიოდის და რა მოცულობის მასალა დაიღუპა აუნაზღაურებლად, მომხდარი ტრაგედია კიდევ ერთხელ წარმოაჩენს მეხსიერებისადმი სახელმწიფოს ზერელე, ხშირად კი დესტრუქციულ მიდგომას, რომელიც მაქსიმალურად ზღუდავს არქივებზე წვდომას. წლების განმავლობაში, არქივებზე წვდომის ხელოვნური შეზღუდვების ზრდისა და მკვლევართათვის სისტემატიური ხელის შეშლის ფონზე, ძნელია ნდობით მოვეკიდოთ მტკიცებას იმის შესახებ,…

ხულოში, სოფელ ბაკოში სახლი დაიწვა. სახლში რვასულიანი ოჯახი ცხოვრობდა. ხანძრის შედეგად არავინ დაშავებულა. სოფელ თხილვანაში ხულოს მერის რწმუნებულის, მამუკა ქამაშიძის თქმით, ოჯახი ქირით გაიყვანეს, ზარალის დათვლის შემდეგ კი, დაზარალებულ ოჯახს ხულოს მერია 20 ათას ლარს გადასცემს.

ზუგდიდში, უხვი ნალექის შედეგად ქალაქის ქუჩები, საცხოვრებელი სახლების პირველი სართულები და ეზოები დაიტბორა. დაზიანდა ავეჯი, საოჯახო ტექნიკა და ნივთები. ქალაქში სატრანსპორტო საშუალებები შეფერხებით გადაადგილდებიან. არსებული ინფორმაციით, განსაკუთრებით, მძიმე ვითარებაა მესხიას, გამსახურდიას, ქუთაისის და თავისუფლების ქუჩებზე. რამდენიმე უბანში სახლების პირველი სართულებიდან წყლის ამოტუმბვის სამუშაოები მიმდინარეობს.

გურიის რეგიონში, სტიქიის ზონაში, შინაგან საქმეთა სამინისტროს საგანგებო სიტუაციების მართვის სამსახურის მეხანძრე-მაშველები, საგანგებო რეჟიმში განაგრძობენ მუშაობას. თემურ მღებრიშვილის თქმით, მაშველების მიერ უსაფრთხო ადგილზე გადაყვანილია 62 მოქალაქე. სამაშველო ღონისძიებები მთელი ღამის განმავლობაში გრძელდებოდა და ამ ეტაპზეც აქტიურად მიმდინარეობს. ,,მაშველების მიერ უსაფრთხო ადგილზე გადაყვანილია 62 მოქალაქე, როგორც ნავების დახმარებით, ისე ფეხით და ავტოსატრანსპორტო საშუალებით. ამ წუთებშიც მიმდინარეობს მსგავსი ღონისძიებები. მობილიზებულია, შინაგან საქმეთა სამინისტროს დანაყოფები. მობილიზება გაკეთებულია, როგორც მძიმე ტექნიკის, ასევე მეხანძრე-მაშველების მიმართულებით. ვერტმფრენის საჭიროება თუ კი დადგება მზად ყოფნაში ვართ”, – განაცხადა მღებრიშვილმა.

საავტომობილო გზების დეპარტამენტის ინფორმაციით, ჩატარებული გაწმენდითი სამუშაოების შედეგად, საერთაშორისო მნიშვნელობის სამტრედია-ლანჩხუთი-გრიგოლეთის საავტომობილო გზის მე-40 და 56-ე კმ-ებზე ყველა სახის ავტოტრანსპორტის მოძრაობა აღდგენილია. გურიაში მომხდარი სტიქიის გამო, საავტომობილო მაგისტრალზე მოძრაობა შეზღუდული იყო. ავტოტრანსპორტი სენაკი-ფოთი-სარფის საავტომობილო გზით გადაადგილდებოდა.

წალენჯიხის მუნიციპალიტეტში, ქალაქ ჯვარში, მდინარე მაგანას მიმდებარედ მცხოვრები მოსახლეობა მდინარის ნაკადის შემცირებას ხეობაში წყლის შესაძლო დაგუბებას უკავშირებს. ,,ამ ეტაპზე მოხდა ხეობის აეროგადაღების კამერით დათვალიერება, თუმცა ხოკოს ხეობის ზედა ნაწილის დათვალიერება დაღამების გამო ვერ მოხერხდა, შესაბამისად ხვალიდან ტერიტორიის შესწავლაში სპეციალისტები ჩაერთვებიან”, – აცხადებს წალენჯიხის მერია. ადგილზე მიღებული გადაწყვეტილებით, წალენჯიხის მერიამ მდინარე მაგანას მიმდებარედ მცხოვრები მოსახლეობა გააფრთხილა, რათა საშიშროების თავიდან აცილების მიზნით მდინარის სიახლოვეს მცხოვრებლები საცხოვრებელ სახლებს გაერიდონ.

შიდასახელმწიფოებრივი მნიშვნელობის ჟინვალი-ბარისახო-შატილის საავტომობილო გზის 90-ე კმ-ზე, ღამის წვიმების შედეგად, მიწის მასა ჩამოიშალა. არსებულ ინფორმაციას საავტომობილო გზების დეპარტამენტი ავრცელებს. აღნიშნულ მონაკვეთზე გაწმენდითი სამუშაოების ჩატარებამდე აკრძალულია ყველა სახის ავტოტრანსპორტის მოძრაობა.