დღე: სექტემბერი 16, 2023

ამერიკის შეერთებულმა შტატებმა 5 თურქული კომპანიის წინააღმდეგ სანქციები დააწესა. არსებული ინფორმაციით, სანქციები კომპანიებს იმიტომ შეეხოთ, რომ ისინი რუსეთს ადრე დაწესებული სანქციებისთვის გვერდის ავლაში ეხმარებოდნენ. სანქციები შეეხო საზღვაო კომპანიებს, რომლებიც ეხმარებოდნენ რუსეთის თავდაცვის სამინისტროს კუთვნილი გემების გარემონტებაში და რუსეთს „ორმაგი დანიშნულების“ საქონელს აწვდიდნენ.

ბულგარეთის და რუმინეთის ანტიკორუფციული და სამართლებრივი მონიტორინგის მექანიზმი დაიხურა. ამის შესახებ ინფორმაციას ევროკომისიის ვიცე-პრეზიდენტი ვერა იუროვა ავრცელებს. ,,ბულგარეთმა და რუმინეთმა დააკმაყოფილეს კრიტერიუმები და ჩვენ ოფიციალურად ვხურავთ ანტიკორუფციული და სამართლებრივი მონიტორინგის მექანიზმს. გილოცავთ! ეს კარგი დღეა არა მხოლოდ ბულგარეთისა და რუმინეთისთვის, არამედ მთლიანად ევროკავშირისთვის. მოუთმენლად ველი ჩვენს თანამშრომლობას საერთო ევროპული ინტერესის კიდევ ბევრ სხვა საკითხთან დაკავშირებით“, – განაცხადა ვერა იუროვამ.

,,მარცვლეულის შეთანხმების” დატოვების შემდეგ, რუსეთი უკრაინის პორტებს 118-ჯერ დაესხა თავს. ამის შესახებ ინფორმაციას უკრაინის ვიცე-პრემიერი ალექსანდრ კუბრაკოვი ავრცელებს. მისივე თქმით, უკრაინის პორტის ინფრასტრუქტურის დაახლოებით მესამედი განადგურებულია. შეგახსენებთ, რომ რუსეთმა 2023 წლის 18 ივლისიდან დატოვა გაეროს და თურქეთის შუამავლობით, 2022 წლის ივლისში, სტამბოლში მიღწეული ,,მარცვლეულის შეთანხმება”, რომლის საფუძველზეც, შავი ზღვით ხორციელდებოდა უკრაინული ხორბლის და სოფლის მეურნეობის სხვა პროდუქტების ექსპორტი, მათ შორის აფრიკის და აზიის ღარიბ ქვეყნებში.

ხარკოვის ოლქის დღევანდელი დაბომბვის შედეგად ორი ადამიანი დაიღუპა. არსებული ინფორმაციით, კაცი და ქალი, რომლებიც თავდასხმის დროს მანქანაში იმყოფებოდნენ, ადგილზე დაიღუპნენ. ხარკოვის ოლქის სამხედრო ადმინისტრაციის ხელმძღვანელის, ოლეგ სინეგუბოვის ცნობით, რუსულმა ჯარებმა ქალაქს S-300 რაკეტებით შეუტიეს. ხუთმა ადამიანმა სხვადასხვა სიმძიმის ტრავმები მიიღო, თუმცა მათ სიცოცხლეს საფრთხე არ ემუქრება.

გერმანული კომპანია Quantum Systems უკრაინას 100 დრონს გადასცემს. ,,გერმანული კომპანია Quantum Systems კიევს ახალი თაობის 100 ტაქტიკურ დრონს გადასცემს, რომელიც უკრაინაში უკვე გამოცადეს”, – ამბობს კიევის მერი, ვიტალი კლიჩკო. მისივე თქმით, შესაბამისი შეთანხმება ინვესტორთან და კომპანიის ხელმძღვანელობასთან გერმანიაში გამართულ ერთ-ერთ სამიტზე იქნა მიღწეული.

რუსებმა ბერისლავში საცხოვრებელი კორპუსი დაბომბეს. ადგილობრივი მედიის ცნობით, დაშავდა 63 წლის ქალი. დაშავებულის მდგომარეობა საშუალო სიმძიმისაა, ის საავადმყოფოში გადაიყვანეს. სხვა დამატებითი დეტალები ჯერჯერობით უცნობია.

უკრაინის რამდენიმე რეგიონში, მათ შორის, კიევში საჰაერო განგაში გამოცხადდა. ადგილობრივი მედიის ინფორმაციით, ბალისტიკური იარაღის საფრთხეა კიევის, ჩერნიგოვის, ჩერკასის, პოლტავას, ხარკოვის, დნეპროპეტროვსკის, ნიკოლაივის და ზაპოროჟიეს რეგიონებში. ცოტა ხნის წინ კი ხარკოვის რეგიონული სამხედრო ადმინისტარციის ხელმძღვანელმა, ოლეგ სინებუგოვმა განაცხადა, რომ რუსებმა ხარკოვი 4-ჯერ დაბომბეს.

ბელარუსის პრეზიდენტმა ალექსანდრე ლუკაშენკომ რუსეთის პრეზიდენტს, ვლადიმერ პუტინს მოსკოვს, მინსკსა და ფხენიანს შორის სამმხრივი თანამშრომლობა შესთავაზა. შეხვედრა პრეზიდენტებს შორის სოჭში გაიმართა, სადაც მხარეებმა ორი ქვეყნის ურთიერთობაზე და უკრაინაში არსებულ სიტუაციაზე ისაუბრეს. პუტინმა ლუკაშენკოს კიმ ჩენ ინთან გამართულ შეხვედრაზეც მიაწოდა ინფორმაცია, რაზეც ლუკაშენკომ უპასუხა “ჩვენ შეგვიძლია ვიფიქროთ სამმხრივ თანამშრომლობაზე”. ,,მგონია, რომ იქ ბელარუსისთვისაც შეიძლება მოიძებნოს საქმე”, – უთხრა ლუკაშენკომ პუტინს. შეგახსენებთ, რომ ჩრდილო კორეის ლიდერი, კიმ ჩენ იანი რუსეთში ოფიციალური ვიზიტით 12 სექტემბერს ჩავიდა.

ბელგია F-16 გამანადგურებლების სამართავად უკრაინელ მფრინავებს მოამზადებს, როგორც ,,საავიაციო კოალიციის” ნაწილი. ინფორმაციას ამის შესახებ, ბელგიის თავდაცვის მინისტრი ავრცელებს. ბელგიის მთავრობის გადაწყვეტილებით, ექვსი უკრაინელი ინსტრუქტორი და ოთხი მისიის დამგეგმავი ბელგიაში გაივლიან ტრენინგს, რათა შემდგომში მომზადდეს უკრაინელი მფრინავები და სხვა პერსონალი. ასევე, უახლოეს კვირებში ბელგიის თავდაცვის სამინისტრო დანიაში უკრაინელი F-16 მფრინავების სასწავლო ცენტრში სამ სამხედრო მოსამსახურე ჯგუფს გაგზავნის. ცნობისთვის, უკრაინას მოიერიშე F-16 ტიპის თვითმფრინავები, რამდენიმე ქვეყანამ უკვე გადასცა. ხოლო დანიაში უკრაინელი პილოტები გადამზადებას გადიან.

აშშ-ის პრეზიდენტის მრჩეველმა ეროვნული უსაფრთხოების საკითხებში, ჯეიკ სალივანმა დაადასტურა, რომ ჯო ბაიდენი და უკრაინის პრეზიდენტი, ვოლოდიმირ ზელენსკი თეთრ სახლში ხუთშაბათს, 21 სექტემბერს ერთმანეთს შეხვდებიან. ,,ეს იქნება მათი მესამე შეხვედრა თეთრ სახლში. ეს ხდება ძალიან მნიშვნელოვან მომენტში, როდესაც რუსეთი უიმედოდ ეძებს დახმარებას ისეთი ქვეყნებისგან, როგორიც არის ჩრდილოეთ კორეა, უკრაინაში მისი სასტიკი ომისთვის”, – განაცხადა სალივანმა. მისივე თქმით, რამშტეინის ფორმატის მორიგი შემდეგი მომავალი კვირის დასაწყისში გაიმართება. The Washington Post-ის ცნობით, ზელენსკი ასევე ეწვევა აშშ-ს კონგრესს, რათა კანონმდებლებმა დაამტკიცონ დამატებითი დახმარება უკრაინისთვის 24 მილიარდი დოლარის ოდენობით.

ევროკომისიამ უკრაინიდან მარცვლეულის იმპორტზე დაწესებული ემბარგო აღარ გაახანგრძლივა. აკრძალვა 15 სექტემბერს იწურებოდა. აღნიშნული ზომები 4 კატეგორიის პროდუქციაზე 2023 წლის მაისიდან მოქმედებდა. პოლონეთმა, სლოვაკეთმა და უნგრეთმა განაცხადეს, რომ დააწესებდნენ საკუთარ ეროვნულ აკრძალვებს ცალმხრივ საფუძველზე. ,,ჩვენ გავაგრძელებთ ამ აკრძალვას მათი უთანხმოების მიუხედავად, მიუხედავად ევროკომისიის უთანხმოებისა”, – თქვა პოლონეთის პრემიერმინისტრმა და დასცინა “ჩვენ ამას გავაკეთებთ, რადგან ეს არის პოლონელი ფერმერის ინტერესებში”. ცოტა ხნის შემდეგ ეკონომიკური განვითარების მინისტრმა, განაცხადა, რომ მან ხელი მოაწერა ახალ “ეროვნულ რეგულაციას” სავაჭრო ემბარგოს შესანარჩუნებლად. სლოვაკეთი წლის ბოლომდე უკრაინული ხორბლის, სიმინდის, რაფსის და მზესუმზირის იმპორტს აკრძალავს. ,,ჩვენ უნდა ავიცილოთ ზედმეტი…

საქართველოს პრემიერ-მინისტრი ირაკლი ღარიბაშვილი დელეგაციასთან ერთად ამერიკის შეერთებულ შტატებში გაემგზავრა. მთავრობის მეთაური ნიუ-იორკში, ვიზიტის ფარგლებში, გაეროს გენერალური ასამბლეის 78-ე სესიის გენერალური დებატების მონაწილეებს სიტყვით მიმართავს. სიტყვით გამოსვლამდე პრემიერ-მინისტრი გაეროს გენერალური ასამბლეის 78-ე სესიის გახსნის ცერემონიას დაესწრება. ვიზიტის ფარგლებში, ირაკლი ღარიბაშვილი ორმხრივ, მაღალი დონის შეხვედრებს გამართავს.

​უკრაინის გენერალური შტაბი რუსი ოკუპანტების სამხედრო დანაკარგების შესახებ ინფორმაციას ავრცელებს. მონაცემები 2022 წლის 24 თებერვლიდან დღემდე, 16 სექტემბრამდე, არსებულ ინფორმაციას მოიცავს. მათი ცნობით, მხოლოდ ბოლო 24 საათის განმავლობაში, თავდაცვის ძალებმა გაანადგურეს დაახლოებით 350 სამხედრო, 4 ტანკი და 16 საარტილერიო სისტემა. რუსეთის შეიარაღებული ძალების საერთო დანაკარგები კი ასეთია: ჯარისკაცი – დაახლოებით 271 790; ტანკი – 4 616; ჯავშანტექნიკა – 8 824; საარტილერიო სისტემა – 5 988; სარაკეტო სისტემა – 774; საზენიტო საბრძოლო სისტემა – 521; თვითმფრინავები – 315; ვერტმფრენი – 316; ოპერატიულ-ტაქტიკური უპილოტო საფრენი აპარატი – 4 738; საკრუიზო რაკეტები – 1 455;…

უკრაინის გენშტაბის ინფორმაციით, მათი შეიარაღებული ძალები აგრძელებენ შეტევას მელიტოპოლისა და ბახმუტის მიმართულებით, სადაც ნაწილობრივ წარმატებას მიაღწიეს. ,,ბახმუტის მიმართულებით მტერი წარუმატებლად ცდილობდა უკრაინის შეიარაღებული ძალების თავდაცვის გარღვევას დონეცკის ოლქის იაგიდნისა და ბოჰდანივკას რაიონებში. თავის მხრივ, თავდაცვის ძალებმა წარმატებით მიაღწიეს დონეცკის ოლქის კლიშჩიივკას რაიონში,” – ნათქვამია ანგარიშში. უწყების ცნობით, მელიტოპოლის მიმართულებით თავდაცვის ძალები საოკუპაციო ჯარებს მნიშვნელოვან დანაკარგებს აყენებენ და მტერს დაკავებული პოზიციების დატოვებას აიძულებენ. ,,შეტევითი მოქმედებების შედეგად, თავდაცვის ძალებმა ნაწილობრივი წარმატება მიაღწიეს ზაპოროჟიეს რეგიონის ვერბოვოისა და ნოვოპროკოპივკას ოლქებში, მათ განდევნეს მტერი დაკავებული პოზიციებიდან,” – იტყობინება გენერალური შტაბი.