დღე: ნოემბერი 17, 2023

ნორვეგიის იუსტიციის მინისტრის ემილი ენგერის განცხადებით,  ოსლო მზად არის, საჭიროების შემთხვევაში დაუყოვნებლივ ჩაკეტოს საზღვარი რუსეთთან. მისი თქმით, რუსეთთან ერთადერთ სახმელეთო სასაზღვრო პუნქტში, სტურსკუგში, ამჟამად მიგრანტთა გაზრდილი აქტივობა არ შეინიშნება. „ჩვენ ყურადღებით ვადევნებთ თვალს სიტუაციას და შესაძლოა, მიზანშეწონილი იყოს საზღვრის დაუყოვნებლივ დახურვა, საჭიროების შემთხვევაში“, – განაცხადა მინისტრმა. ფინეთი რუსეთის საზღვართან ოთხ გამშვებ პუნქტს ხურავს  

ისრაელის თავდაცვის ძალების განცხადებით,  ღაზის სექტორში, ალ-შიფას საავადმყოფოს შენობაში „ჰამასის“ ოპერაციული გვირაბის შახტი აღმოაჩინეს. მათივე ცნობით, აღმოაჩინეს მანქანა, რომელშიც დიდი რაოდენობით იარაღი და საბრძოლო მასალა იყო. მოძრაობა „ჰამასი“ ისრაელის მიერ გავრცელებულ ინფორმაციას სრულ სიცრუეს უწოდებს.

ისრაელის თავდაცვის მინისტრის იოვ გალანტის განცხადებით, ქალაქ ღაზის დასავლეთი  სრულად დაიკავეს. მისი თქმით, თავდაცვის ძალები სახმელეთო ოპერაციის შემდეგ ფაზაზე გადავიდა. “ოპერაცია გრძელდება და ძალიან მკაფიოდ, შერჩევითად და მიზანდასახულად გრძელდება. თავდაცვის ძალებმა ქალაქ ღაზის დასავლეთის ნაწილი დაიკავა, გაწმინდა ტერორისტებისგან და ჰამასის ობიექტებისგან. სახმელეთო ოპერაციის მომდევნო ეტაპი დაწყებულია”, – განაცხადა გალანტმა.

მედიის ინფორმაციით, ფინეთი რუსეთის საზღვართან ოთხ გამშვებ პუნქტს ხურავს. მედიის ცნობით, გადაწყვეტილების მიზეზი მესამე ქვეყნებიდან მიგრანტების შედინებაა. 18 ნოემბრიდან დაიხურება იმატრას, ნიირალას, ნუიიამასაა და ვალიიმაას სასზვღვრო გამშვები პუნქტები და ეს შეზღუდვა 2024 წლის 18 თებერვლამდე დარჩება ძალაში. ფინეთსა და რუსეთს შორის სახმელეთო საზღვარზე სულ ცხრა გამშვები პუნქტი ფუნქციონირებს, დარჩენილი საგუშაგოები ჩვეულ რეჟიმში გააგრძელებენ მუშაობას. ფინეთის სასაზღვრო დაცვის მეთაურის მოადგილემ, ლეიტენანტ-პოლკოვნიკმა ჯუკა ლუკარიმ ფინურ მედიას განუმარტა, რომ პუნქტები დაიხურება საზღვრის კვეთის მკვეთრად გაზრდილი რაოდენობის გამო.

რუსეთში მუსიკოსს, რომელმაც სუპერმარკეტში პროდუქტებს ფასების ეტიკეტები მოაშორა და ანტისაომარი შეტყობინებებით ჩაანაცვლა, 7-წლიანი თავისუფლების აღკვეთა მიესაჯა. სანქტ-პეტერბურგის სასამართლომ 33 წლის საშა სკოჩილენკოს ბრალი მცდარი ინფორმაციის გავრცელებისთვის დასდო. ,,მე არ მეშინია და შეიძლება სწორედ ამიტომ ეშინია ჩემს მთავრობას ჩემი,” – განაცხადა სკოჩილენკომ. “რუს წვევამდელებს უკრაინაში აგზავნიან. ჩვენი ბავშვების სიცოცხლე ამ ომის ფასია,” – ნათქვამია ერთ-ერთ შეტყობინებაში, რომელსაც მუსიკოსმა პროდუქტს ფასის ეტიკეტის ნაცვლად დააკრა