დღე: ივნისი 28, 2023

უკრაინის ძალების გენერალური შტაბის ინფორმაციით,  რუსეთმა ომის დაწყებიდან დღემდე, დაახლოებით  227 100 ჯარისკაცი დაკარგა. გენშტაბის ცნობით, რუსეთის სამხედრო დანაკარგი ასეთია:​  ჯარისკაცი დაახლოებით – 227 100; ​ტანკი – 4 036; ჯავშანტექნიკა – 7 847; საარტილერიო სისტემა – 4 089; სარაკეტო სისტემა – 627; საზენიტო საბრძოლო სისტემა – 387; თვითმფრინავები – 314; ვერტმფრენი – 308; ოპერატიულ-ტაქტიკური უპილოტო საფრენი აპარატი – 3 499; ფრთოსანი რაკეტები – 1 261; საავტომობილო ტექნიკა და საწვავის ავზები – 6 774; გემი/ნავი/კატარღა – 18;  სპეციალური აღჭურვილობა – 563.

უკრაინის პრეზიდენტმა, ვოლოდიმირ ზელენსკიმ სახელმწიფო თავდაცვითი-სამრეწველო კონცერნის, „უკრობორონპრომის“ ხელმძღვანელი იური გუსევი, თანამდებობიდან გაათავისუფლა. ამის შესახებ პრეზიდენტის 27 ივნისის No357/2023 განკარგულებაშია ნათქვამი.  „უკრაინსკაია პრავდას“ ცნობით, გუსევის თანამდებობიდან გათავისუფლების მიზეზი კონცერნის ცუდი მუშაობა გახდა. მედიის ცნობით, გუსევმა სარაკეტო პროგრამა ჩაიშალა. კონცერნის ახალ ხელმძღვანელად 31 წლის  გერმან სმეტანინი დაინიშნა.

ლიეტუვის პრეზიდენტი გიტანას ნაუსედა კიევში ჩავიდა. უკრაინული მედიის ინფორმაციით, ნაუსედა შეხვდება უკრაინის პრეზიდენტს ვოლოდიმირ ზელენსკის და მიიღებს მონაწილეობას უკრაინის კონსტიტუციის მიღებიდან 27 წლის იუბილეს აღსანიშნავ ღონისძიებებში. გავრცელებული ინფორმაციით, ლიეტუვის  პრეზიდენტი უკრაინის პრეზიდენტთან ერთად განიხილავს ივლისში ვილნიუსში ნატოს სამიტის დღის წესრიგს, ასევე უკრაინის ევროკავშირში გაწევრიანებაზე მოლაპარაკებების საკითხებს, ლიეტუვის და ევროკავშირის დახმარებას უკრაინისადმი. ნაუსედა ჰააგიდან ჩავიდა კიევში, სადაც გუშინ 7 სახელმწიფოს მეთაურების შეხვედრაზე განიხილა უკრაინის შემდგომი მხარდაჭერა.

უკრაინა ლიეტუვისგან NASAMS-ის ტიპის ორ საზენიტო-სარაკეტო სისტემას მიიღებს. ამის შესახებ ლიეტუვის პრეზიდენტი გიტანას ნაუსედა „ტვიტერზე“ ავრცელებს. „ლიეტუვამ შეიძინა NASAMS-ის ტიპის ორი საზენიტო-სარაკეტო სისტემა, რომლებიც გადაეცემა უკრაინას. საზენიტო თავდაცვა არის მთავარი უკრაინის აგრესორის წინააღმდეგ ბრძოლაში“, – წერს ნაუსედა.    

პარიზის გარეუბანში პოლიციასა და დემონსტრანტების შორის შეტაკებების დროს 20 ადამიანი დააკავეს.  ნანტერში არეულობა  პოლიციის მიერ ცეცხლსასროლი იარაღით სროლის შედეგად 17 წლის მოზარდის გარდაცვალებას მოჰყვა. მოზარდმა სავარაუდოდ მანქანის გაჩერებაზე უარი თქვა მას შემდეგ, რაც პოლიციამ გაჩერებისკენ მოუწოდა. პოლიციელი მკვლელობის ბრალდებით უკვე დაკავებულია. მედიის ინფორმაციით, აღნიშნულ შემთხვევას ნანტერში  არეულობა მოჰყვა.    

ბელარუსის პრეზიდენტის, ალექსანდრ ლუკაშენკოს განცხადებით, მან დაარწმუნა ვლადიმერ პუტინი, არ გაენადგურებინა “ვაგნერის” ჯგუფი და მისი ხელმძღვანელი, ევგენი პრიგოჟინი. მისი თქმით, მოახერხა პრიგოჟინის ხელში ჩაგდება და გააფრთხილა, რომ “ბუზივით გაანადგურებდნენ”, თუ “ვაგნერის” ჯარები გააგრძელებდნენ წინსვლას მოსკოვისკენ. ,,ყველაზე საშიში, როგორც მე მესმის, არ არის ის, თუ როგორი იყო სიტუაცია, არამედ ის, თუ როგორ შეიძლება ის განვითარდეს და მისი შედეგები. მე ასევე მივხვდი, რომ მიღებულ იქნა მკაცრი გადაწყვეტილება – განადგურება. პუტინს ვთავაზობდი არ აჩქარებულიყო. მოდით ვისაუბროთ პრიგოჟინთან, მის მეთაურებთან”,- განაცხადა ლუკაშენკომ.