დღე: აპრილი 19, 2023

სამხრეთ კორეა უკრაინისთვის შეიარაღების გადაცემის შესაძლებლობას განიხილავს. ამის შესახებ სამხრეთ კორეის პრეზიდენტმა, იუნ სუკ იოლმა „როიტერთან“ ინტერვიუში განაცხადა. მისი თქმით, სამხრეთ კორეის მთავრობა იკვლევს, როგორ დაეხმაროს უკრაინის დაცვასა და აღდგენას. „თუ შეიქმნა სიტუაცია, რომელსაც საერთაშორისო საზოგადოება ვერ დაუშვებს, როგორიცაა ნებისმიერი ფართომასშტაბიანი თავდასხმა მშვიდობიანი მოსახლეობაზე, ხოცვა-ჟლეტა ან ომის კანონების სერიოზული დარღვევა, შეიძლება, გაგვიჭირდეს მხოლოდ ჰუმანიტარულ ან ფინანსურ მხარდაჭერაზე შეჩერება“, – განაცხადა იუნ სუკ იოლმა. ცნობისთვის, ეს არის პირველი შემთხვევა, როდესაც სეულმა გამოთქვა მზადყოფნა უკრაინას მიაწოდოს იარაღი.

პოლონეთი დათანხმდა უკრაინული მარცვლეულისა და საკვები პროდუქტების ტრანზიტის განბლოკვას. ამის შესახებ ინფორმაციას „როიტერი“ ავრცელებს. მედიის ცნობით, მხარეებმა შეთანხმებას  ვარშავაში ორდღიანი მოლაპარაკებების შედეგად მიაღწიეს. „მოვახერხეთ ისეთი მექანიზმის შემუშავება, რომელიც უზრუნველყოფს, რომ პოლონეთში არცერთი ტონა მარცვლეული არ დარჩება და ტვირთების გადაზიდვა პოლონეთის ტერიტორიის გავლით მოხდება. ასევე მნიშვნელოვანია ახალი მექანიზმის – gps-ისა და ელექტრონული სისტემების გამოყენება, რომლებიც ზუსტად აკონტროლებენ ტრანსპორტს“, – განაცხადა პოლონეთის სოფლის მეურნეობის მინისტრმა, რობერტ ტელუსმა. ცნობისთვის, პოლონეთმა და უნგრეთმა 15 აპრილს გამოაცხადეს დროებითი აკრძალვა უკრაინული მარცვლეულის იმპორტზე. ტრანზიტისთვის განკუთვნილი უკრაინული მარცვლეული ქვეყნების ტერიტორიაზე რჩებოდა, რამაც ადგილობრივი წარმოების პროდუქციის გაიაფება გამოიწვია…

რუსეთის სრულმასშტაბიანი სამხედრო აგრესიის 420-ე დღე – უკრაინის შეიარაღებული ძალების გენერალური შტაბის ინფორმაციით, ბოლო ერთ დღეში უკრაინელებმა მტრის 60-ზე მეტი შეტევა მოიგერიეს. ,,უკრაინის მთელ ტერიტორიაზე შემდგომი სარაკეტო და საჰაერო დარტყმების საფრთხე კვლავ მაღალია. მტრის ძირითადი ძალისხმევა კონცენტრირებულია შეტევითი ოპერაციების ჩატარებაზე ლიმანის, ბახმუტის, ავდიივკასა და მარინკას რაიონებში,”- აცხადებენ გენშტაბში. უწყების ინფორმაციით, მძიმე ბრძოლები გრძელდება ქალაქ ბახმუტისთვის. მათივე ცნობით, რუსულმა ძალებმა 4 სარაკეტო და 60 საჰაერო დარტყმა განახორციელეს. ამასთან, გენშტაბი აღნიშნავს, რომ უკრაინის მასშტაბით მტრის საჰაერო და სარაკეტო დარტყმების საფრთხე რჩება.

საქართველოს პრემიერ-მინისტრი ირაკლი ღარიბაშვილი ამერიკის შეერთებული შტატების სახელმწიფო მდივნის მოადგილის თანაშემწეს ერიკა ოლსონს შეხვდა. მთავრობის ადმინისტრაციაში გამართულ შეხვედრაზე ორ ქვეყანას შორის არსებული სტრატეგიული პარტნიორობა განიხილეს. ხაზი გაესვა სხვადასხვა სფეროში თანამშრომლობის განმტკიცების მნიშვნელობას. ირაკლი ღარიბაშვილმა და ერიკა ოლსონმა ასევე მიმოიხილეს რეგიონსა და მსოფლიოში არსებული უსაფრთხოების გარემო. ამ მიმართულებით ხაზი გაესვა პრემიერ-მინისტრის მიერ ინიციირებული სამხრეთ კავკასიის სამშვიდობო-სამეზობლო ინიციატივის მნიშვნელობას. საუბარი ასევე შეეხო ევროინტეგრაციის გზაზე საქართველოს მიერ მიღწეულ ხელშესახებ პროგრესს. შეხვედრას ესწრებოდნენ საქართველოში ამერიკის შეერთებული შტატების მისიის ხელმძღვანელის მოადგილე რაიან ჰარისი, საქართველოს საგარეო საქმეთა მინისტრი ილია დარჩიაშვილი და მთავრობის ადმინისტრაციის უფროსი რევაზ ჯაველიძე.

უკრაინის შეიარაღებული ძალების გენერალური შტაბის ინფორმაციით, რუსეთმა ომის დაწყებიდან დღემდე, დაახლოებით 183 750 ჯარისკაცი დაკარგა. გენშტაბის ცნობით, რუსეთის სამხედრო დანაკარგი ასეთია:​ ჯარისკაცი – დაახლოებით 183 750; ​ტანკი – 3 665; ჯავშანტექნიკა – 7 110; საარტილერიო სისტემა – 2 819; სარაკეტო სისტემა – 538; საზენიტო საბრძოლო სისტემა – 285; თვითმფრინავები – 308; ვერტმფრენი – 293; ოპერატიულ-ტაქტიკური უპილოტო საფრენი აპარატი – 2 376; საკრუიზო რაკეტები – 911; საავტომობილო ტექნიკა და საწვავის ავზები – 5 692; გემი/ნავი/კატარღა – 18;​ სპეციალური აღჭურვილობა – 330.

უკრაინის საგარეო საქმეთა სამინისტრომ მინსკიდან კონსულტაციისთვის ბელარუსში უკრაინის ელჩი იჰორ კიზიმი გამოიძახა. როგორც უკრაინის საგარეო საქმეთა სამინისტრო განცხადებაშია აღნიშნული, გმობენ  ალექსანდრე ლუკაშენკოსა და დონეცკში რუსეთის მიერ დანიშნული ე.წ. სახალო რესპუბლიკის მეთაურის მოვალეობის შემსრულებელ, დენის პუშილინთან შეხვედრას. უკრაინული მხარე აცხადებს, რომ დენის პუშილინი ეჭვმიტანილია მძიმე დანაშაულებებში და მის წინააღმდეგ საერთაშორისო სანქციები მოქმედებს. უწყების განცხადებით, მინსკმა თავი უნდა შეიკავოს ასეთი დესტრუქციული ნაბიჯებისგან და შეწყვიტოს რუსეთის აგრესიული ომის მხარდაჭერა უკრაინის წინააღმდეგ.

19 აპრილის ღამეს რუსებმა დრონებით შეუტიეს ოდესის რეგიონს. თავდაცვის ძალებმა 12 კამიკაძე „შაჰედი“-დან 10 გაანადგურეს. რუსეთის ძალები ქალაქს თავს ირანული „შაჰედ-136“ კამიკაძე დრონებით დაესხნენ. ოდესის რეგიონული ადმინისტრაციის ინფორმაციით, საჰაერო იერიშს მსხვერპლი არ მოჰყოლია.