დღე: დეკემბერი 11, 2023

,,მხარს ვუჭერთ საქართველოს ევროკავშირში გაწევრიანებას,”- ამის შესახებ ჩეხეთის საგარეო საქმეთა მინისტრმა, იან ლიპავსკიმ ბრიუსელში, აღმოსავლეთ პარტნიორობის მინისტერიალზე განაცხადა. მისი თქმმით, არსებობს სია, სადაც ჩამოთვლილია გარკვეული სამუშაოების პირობები, რომლებიც უნდა დაკმაყოფილდეს. ,,რა თქმა უნდა, ჩვენ მხარს ვუჭერთ საქართველოს ევროკავშირში გაწევრიანებას. არსებობს სია, სადაც ჩამოთვლილია გარკვეული სამუშაოების პირობები, რომლებიც უნდა დაკმაყოფილდეს და შესაბამისობაში იყოს. რამდენადაც მე ვიცი, არის დადებითი მიმოხილვა. დიახ, ჩვენ მხარს ვუჭერთ საქართველოს. ჩვენ მხარს ვუჭერთ დასავლეთ ბალკანეთს და ასევე, დასავლურ პარტნიორობას. ვფიქრობ, დროული იქნება, თუ პროგრესი ამ მხრივაც იქნება,”- განაცხადა იან ლიპავსკიმ.

ბრიტანეთის დაზვერვის განცხადებით, უკრაინელები ავდეევკას მახლობლად წარმატებულ კონტრშეტევას ახორციელებენ. ,,უკრაინულმა ქვედანაყოფებმა, სავარაუდოდ, წარმატებით განახორციელეს ადგილობრივი კონტრშეტევები, რითაც რუსულ ჯარების სოფელ სტეპნოეზე სრული კონტროლი ჩამოართვეს. დონეცკის ოლქის ქალაქი ავდეევკა ახლა ფრონტზე ყველაზე ინტენსიური ბრძოლების ადგილად რჩება”, – ნათქვამია განცხადებაში.

რუსეთის ფედერაციის ცენტრალურმა საარჩევნო კომისიამ მიიღო გადაწყვეტილება, რომ რუსეთის პრეზიდენტის არჩევნები 2024 წელს რუსეთის მიერ ოკუპირებულ უკრაინის ტერიტორიებზეც გაიმართება. რუსეთის ცენტრალური საარჩევნო კომისიის გადაწყვეტილება დონეცკის, ლუგანსკის, ხერსონისა და ზაპოროჟიეს ოლქებს ეხება. არჩევნები იმ ტერიტორიაზეც გაიმართება, სადაც „საომარი მდგომარეობის რეჟიმი მოქმედებს“.

ისრაელის პრემიერ-მინისტრის, ბენიამინ ნეთანიაჰუს განცხადებით, ომი აქტიურ ფაზაშია. მისი თქმით, ეს ჰამასის დასასრულის დასაწყისია. ,,ბოლო დღეებში ჰამასის ათობით ტერორისტი ჩვენს სამხედროებს ჩაბარდა. ისინი ყრიან იარაღს და ბარდებიან ჩვენს მამაც მებრძლებს. კიდევ გარკვეული დროა საჭირო. ომი აქტიურ ფაზაშია, თუმცა ეს ჰამასის დასასრულის დასაწყისია. მივმართავ ჰამასის ტერორისტებს, ნუ გაწირავთ თავს, დაგვნებდით ახლა”, – განაცხადა ნეთანიაჰუმ.

გერმანიის საგარეო საქმეთა მინისტრის, ანალენა ბერბოკის განცხადებით, გერმანია უკრაინაში ომის „გაყინვის“ წინააღმდეგია. მისი თქმით, „კონფლიქტის გაყინვა გამოიწვევს უკრაინის მიერ სუვერენიტეტის დაკარგვას და ევროპის უსაფრთხოების წინაშე არსებული საფრთხეების შენარჩუნებას“. ანალენა ბერბოკის განცხადებით,  პუტინის მიუთითებს, რომ რუსეთი არა მხოლოდ უკრაინის აღმოსავლეთ ნაწილის, არამედ მთელი უკრაინისა და მისი ხალხის დაქვემდებარებას ცდილობს. „ამიტომ კონფლიქტის გაყინვა იქნებოდა  უკრაინის მხრიდან უარის თქმა არა მხოლოდ ოკუპირებულ ტერიტორიებსა და იქ მცხოვრებ ადამიანებზე, არამედ რუსეთის მხრიდან ძალადობის მთელი ქვეყნის ტერიტორიაზე გავრცელებას გამოიწვევდა“, – აცხადებს ბერბოკი.

ფინეთის საგარეო საქმეთა მინისტრის, ელინა ვალტონენის განცხადებით, პოზიტიურად არიან განწყობილი საქართველოში რეფორმების გატარებაში პროგრესის გამო. მისი თქმით, ევროკავშირის გაფართოება დამსახურებაზე დაფუძნებული პროცესია. „ფინეთი ევროკავშირის გაფართოების მხარდამჭერია. ეს პროცესი დამსახურებაზეა დაფუძნებული. ჩვენ გვქონდა ძალიან კარგი დისკუსია საქართველოსთან და პოზიტიურად ვართ განწყობილი ბევრი რეფორმის გატარებაში პროგრესის ნიშნების მიმართ. დარწმუნებული ვარ, ჩვენ ვიპოვით კარგ პასუხს საქართველოსთვის“, – განაცხადა ელინა ვალტონენმა.

უკრაინის პრეზიდენტი, ვოლოდიმირ ზელენსკი ტელეფონით ევროკომისიის პრეზიდენტ ურსულა ფონ დერ ლაიენს ესაუბრა. ზელენსკის განცხადებით, ევროპამ გაბედულად უნდა დაიცვას საკუთარი ღირებულებები და ერთიანობა. „დღევანდელი საუბრისას, ევროკავშირის სამიტის წინ, პოზიციების კოორდინირება მოვახდინეთ. მე კიდევ ერთხელ გამოვხატე მადლიერება უკრაინის მიერ ევროკომისიის ყველა რეკომენდაციის შესრულების დადებითი შეფასებისთვის. იმედი გვაქვს, რომ სამიტზე იქნება მიღებული დადებითი გადაწყვეტილება უკრაინის ფინანსურის მხარდაჭერისა და უკრაინის ევროკავშირში გაწევრიანების შესახებ მოლაპარაკებების დაწყების შესახებ“, – წერს ვოლოდიმირ ზელენსკი.