რუსეთის ოპოზიციის ლიდერის ალექსეი ნავალნის ადგილსამყოფელი უცნობია. ბოლო რამდენიმე დღეა, ის ადვოკატებთან კავშირზე არ გასულა. ინფორმაციას CNN ავრცელებს.
სპიკერმა კირა იარმიშმა X-ზე დაწერა, რომ ადვოკატებმა რამდენჯერმე სცადეს წვდომა ორ სასჯელაღსრულების კოლონიაში, სადაც ნავალნი ბოლო დროს იმყოფებოდა, თუმცა ის არც IK-6 და არც IK-7 დაწესებულებაში არ ყოფილა. მათი თქმით, ოპოზიციის ლიდერს ჯანმრთელობის სერიოზული პრობლემები ჰქონდა.
ცნობისთვის, ნავალნი 2021 წელს, გერმანიიდან რუსეთში დაბრუნების შემდეგ დააკავეს. იქამდე კი, 2020 წელს „ნოვიჩოკით“ მოწამლეს და სამკურნალოდ გერმანიაში იმყოფებოდა. მას 2023 წლის აგვისტოს დასაწყისში 19-წლიანი პატიმრობა მიუსაჯეს, მას შემდეგ რაც დამნაშავედ ცნეს ექსტრემისტული საზოგადოების შექმნაში, ექსტრემისტული აქტივობების დაფინანსებასა და მრავალ სხვა დანაშაულში.
