დღე: დეკემბერი 2, 2023

ესტონეთის პრემიერი, კაია კალასი, მხარს უჭერს ქვეყნიდან იმ პირების დეპორტაციას, ვინც რუსეთის მოქალაქეობას მიიღებს. ამ თემაზე საჯარო დისკუსია ესტონეთში ნოემბრის დასაწყისიდან დაიწყო. ქვეყნის შს მინისტრმა ლაურა ლიაენემეცმა განაცხადა, რომ ის ეძებს ამისთვის სამართლებრივ მექანიზმებს. ამის შემდეგ ცენტრისტმა დეპუტატმა ალექსანდრე ჩაპლიგინმა ეჭვქვეშ დააყენა მსგავსი იდეების კანონიერება და იკითხა, იყო თუ არა შსს-ს ხელმძღვანელის პოზიცია მთლიანად ხელისუფლების პოზიცია. ქვეყნის პრემიერმა კი დაადასტურა, რომ ლაენემეცის განცხადება ესტონეთის მთავრობის ოფიციალურ პოზიციას შეესაბამება. „თუკი ადამიანი, რომელიც ესტონეთში ცხოვრობდა, გადაწყვეტს რუსეთის მოქალაქეობის მიღებას ახლა, როცა რუსეთი აწარმოებს ომს უკრაინის სახელმწიფოსა და ხალხის წინააღმდეგ, ეს იმის მტკიცებულებაა,…

უკრაინის პრეზიდენტი Associated Press-თან ინტერვიუში აცხადებს, რომ ომში გარდამტეხი მომენტი, შესაძლოა, მარტში დადგეს. ,,ჩვენ გვესმის, რომ რუსეთში არჩევნები არადემოკრატიულია. ყველამ იცის, რა შედეგი იქნება. ეს, შესაძლოა, არალეგიტიმური არჩევნები იყოს, რომელსაც არ ცნობს მსოფლიო. “თამაში” უკვე ცივილიზებული სამყაროს ლიდერების მხარეზე იქნება, აღიარებენ თუ არა. სხვათა შორის, შესაძლოა, გარდამტეხი მომენტი დადგეს, პრეზიდენტ პუტინის ლეგიტიმურობა”, – ამბობს ზელენსკი. ცნობისთვის, რუსეთში საპრეზიდენტო არჩევნები 2024 წლის მარტში ჩატარდება. ჯერჯერობით პუტინს ოფიციალურად არ უთქვამს, აპირებს თუ არა მეხუთე ვადით კენჭისყრას.

ბელარუსს “წითელი ჯვრის” ორგანიზაციის წევრობა შეუჩერდა. გადაწყვეტილება “წითელი ჯვრისა” და “წითელი ნახევარმთვარის” საერთაშორისო ფედერაციამ მიიღო. ინფორმაციას “რადიო თავისუფლების” რუსულენოვანი ბიურო ავრცელებს. არსებული ინფორმაციით, მიზეზი წითელი ჯვრის საერთაშორისო ფედერაციის მოთხოვნის შეუსრულებლობა გახდა. ორგანიზაციამ ადგილობრივი ოფისის გენერალური მდივნის, დმიტრი შევცოვის თანამდებობიდან გათავისუფლება მოითხოვა ბირთვულ იარაღთან და უკრაინელი ბავშვების დეპორტაციასთან დაკავშირებით გაკეთებული განცხადებების გამო, ასევე ოკუპირებულ დონბასში ვიზიტების გამო. შევცოვი მხარს უჭერდა რუსეთის აგრესიას უკრაინის წინააღმდეგ.

ისრაელი აცხადებს, რომ ზავის აღდგენის მოლაპარაკებები ჩიხში შევიდა, რის გამოც კატარიდან დელეგაცია უკან გაიწვია. მოლაპარაკებებზე ისრაელის სადაზვერვო სააგენტოს წარმომადგენლები იმყოფებოდნენ, თუმცა ხელმძღვანელისგან, დევიდ ბარნეასგან მათ უკან დაბრუნების ბრძანება მიიღეს. „ჰამასის ტერორისტულმა ორგანიზაციამ არ შეასრულა შეთანხმება, რომელიც მოიცავდა მძევლად მყოფი ყველა ქალისა და ბავშვის გათავისუფლებას გაგზავნილი და მათ მიერ დამტკიცებული სიის შესაბამისად“, – ნათქვამია პრემიერი ნეთანიაჰუს ოფისის განცხადებაში. პარალელურად, ცნობილი ხდება, რომ ცეცხლის შეწყვეტის შუამავლობისთვის, კატარში ჩასვლას გეგმავს საფრანგეთის პრეზიდენტი ემანუელ მაკრონი.

გერმანიის მთავრობამ უკრაინას სამხედრო დახმარების ახალი პაკეტი გაუგზავნა. ინფორმაცია გერმანიის მთავრობა ავრცელებს. დახმარების პაკეტი მოიცავს სამხედრო სატვირთო მანქანებს, ჭურვებს, სნაიპერულ იარაღსა და სხვადასხვა აღჭურვილობას. პაკეტში შედის: 4 HX81 ტრაქტორი და 4 ნახევრადმისაბმელი; 8 Zetros სატვირთო; 3 მანქანა; 2 სასაზღვრო სამსახურის მანქანა; 15 შორეული HLR 338 სნაიპერული შაშხანა და 60 ათასი ვაზნა; 25 ლაზერული დიაპაზონი; 155 მმ კალიბრის 3840 საარტილერიო ჭურვი; 250 კომპლექტი იარაღები ფეთქებადი მასალით.

შოტლანდიაში, გლაზგოს საერთაშორისო აეროპორტმა, დიდთოვლობის გამო ფრენები შეაჩერა. გაუქმდა ზოგიერთი სარკინიგზო რეისიც. საზოგადოებრივი ჯანდაცვის უსაფრთხოების სააგენტომ ნარინჯისფერი განგაში გამოაცხადა. დიდთოვლობის გამო, ფრენები შეაჩერა მიუნხენის აეროპორტმაც.

ჟურნალისტთა დაცვის კომიტეტის (CPJ) მონაცემების მიხედვით, ისრაელი-“ჰამასის” ომის შედეგად, სულ მცირე, 61 ჟურნალისტი დაიღუპა. მათ შორის, 54 პალესტინელი, 4 ისრაელელი და 3 ლიბანელი იყო. არსებული ინფორმაციით, დაშავებულია 11 ჟურნალისტი, 3 დაკარგულად მიიჩნევა, 19 კი დაკავებულია. ,,CPJ ხაზს უსვამს, რომ ჟურნალისტები მშვიდობიანი მოქალაქეები არიან, რომლებიც კრიზისის დროს მნიშვნელოვან საქმეს ასრულებენ და სამიზნე არ უნდა გახდნენ,” – განაცხადა შერიფ მანსურმა, CPJ-ის ახლო აღმოსავლეთისა და ჩრდილოეთ აფრიკის პროგრამის კოორდინატორმა.

იტალიის კუნძულ სიცილიაზე ვულკანი ეტნა ამოიფრქვა. გეოფიზიკისა და ვულკანოლოგიის ეროვნულმა ინსტიტუტმა (INGV) ეტნას ვულკანურ აქტივობას ,,ნორმალური” უწოდა. არსებული ინფორმაციით, ამოფრქვევას კატანიის ახლომდებარე აეროპორტის მუშაობაზე გავლენა არ მოუხდენია.

უკრაინის მთელ ტერიტორიაზე საჰაერო განგაში გამოცხადდა. ინფორმაციას უკრაინული მედია ავრცელებს და წერს, რომ განგაში MiG-31K-ის აფრენას უკავშირდება. ამ დროისთვის სხვა დამატებითი დეტალები უცნობია.

ლას-ვეგასში, აშშ-ის გზატკეცილის 95-ე გზაჯვარედინზე, სროლის შედეგად 2 ადამიანი დაიღუპა და 3 დაშავდა. დაშავებულები საავადმყოფოში გადაიყვანეს და მათი მდგომარეობა სტაბილურია. არსებული ინფორმაციით, სროლა 1 დეკემებრს, 17:30 საათზე დაფიქსირდა. პოლიციის ცნობით, დაშავებულები და დაღუპულები უსახლკაროები არიან. აღნიშნულ ფაქტზე მიმდინარეობს გამოძიება.

მქონდა პატივი, სიტყვით გამოვსულიყავი დუბაიში კლიმატის ცვლილებებთან გამკლავების თემაზე გაერთიანებული ერების ორგანიზაციის მიერ გამართული 28-ე კონფერენციაზე, – ამის შესახებ საქართველოს პრემიერ-მინისტრი ირაკლი ღარიბაშვილი სოციალურ ქსელ „ ტვიტერში“ წერს. როგორც მთავრობის მეთაური აღნიშნავს, განახლებადი ენერგორესურსების განვითარების, ენერგიის დამზოგავი პროექტების განხორციელებითა და ეკომეგობრული ინიციატივებით საქართველო გააგრძელებს გლობალურ ძალისხმევაში საკუთარი წვლილის შეტანას. „ჩვენ პრიორიტეტად მივიჩნევთ კლიმატის ცვლილებებისადმი ადაპტაციის საკითხს, განახლებადი ენერგორესურსების განვითარების, ენერგიის დამზოგავი პროექტების განხორციელებითა და ეკომეგობრული ინიციატივებით საქართველო გააგრძელებს გლობალურ ძალისხმევაში საკუთარი წვლილის შეტანას, რათა უზრუნველყოფილი იყოს კლიმატის ცვლილებებისადმი მედეგობა და მდგრად განვითარებაზე ორიენტირებული მომავალი”, – აღნიშნავს პრემიერი.

გადაუღებელმა წვიმებმა ინდონეზიის კუნძულ სუმატრაზე მეწყერი და წყალდიდობა გამოიწვია. სტიქიის შედეგად დაკარგულად მიიჩნევა, სულ მცირე, 12 ადამიანი, რომელთაც მაშველები ამ დრომდე ეძებენ. 50-მდე ოჯახი კი დროებით სამთავრობო თავშესაფარში გადაიყვანეს. ზარალისა და შესაძლო მსხვერპლის შესახებ ინფორმაციას ინდონეზიის ხელისუფლება აზუსტებს. არსებული ინფორმაციით, ყველაზე მეტად დაზარალდა სიმანგულამპე, სოფელი პოპულარული ტობის ტბის მახლობლად, ჩრდილოეთ სუმატრას პროვინციაში, სადაც რამდენიმე ტონა ტალახის ქვეშ დამარხულია სახლები, დაზიანებულია ეკლესია, სკოლა და სასტუმრო.

ირანი, რუსეთი და ჩინეთი 2024 წელს სპარსეთის ყურეში ერთობლივ სამხედრო-საზღვაო წვრთნებს ჩაატარებენ. ამის შესახებ ირანის სამხედრო-საზღვაო ძალების მეთაურმა, კონტრ-ადმირალმა შაჰრან ირანიმ განაცხადა. „დამკვირვებლების სტატუსით წვრთნებზე მოწვეულები არიან პაკისტანი, ბრაზილია, ომანი, ინდოეთი და სამხრეთ აფრიკა“, – აღნიშნა შაჰრან ირანიმ. მისივე თქმით, წვრთნების უდიდესი ნაწილი ჯასკის რაიონში გაიმართება, წლის ბოლომდე კი ამ რაიონში ირანის მაღალი სიმძლავრის მქონე ქვედანაყოფებს განათავსებს.

როგორ ახერხებს რუსეთი სამხედრო ტექნიკისა და აღჭურვილობისთვის ისეთი დეტალების მოპოვებას, რომელსაც თავად არ აწარმოებს? უკრაინის სამხედრო უწყების საგამოძიებო ჯგუფის წარმომადგენელმა რუსებისთვის ჩამორთმეული ტექნიკა დეტალურად განიხილა ტელეკომპანია BBC-სთან. როგორც დგინდება, ოკუპანტი სახელმწიფო სანქციების პირობებში შეიარაღების მარაგის შესავსებად და მიკრო ჩიპების მოსაპოვებლად მაცივრებსა და სარეცხ მანქანებს შლის.

რუსმა ოკუპანტებმა ხერსონისა და დონეცკის ოლქები დაბომბეს, რის შედეგადაც 2 ადამიანი დაიღუპა და 3 დაშავდა. რუსეთის სამიზნეს დასახლებული უბნები, საცხოვრებელი კვარტლები და საგანმანათლებლო დაწესებულება წარმოადგენდა. ,,გასული დღის განმავლობაში მტერმა ხერსონის რეგიონი 82-ჯერ დაბომბა. ნაღმმტყორცნებიდან, არტილერიიდან, ტანკებიდან და დრონებიდან მან 338 ჭურვი გაისროლა,” – ნათქვამია ხერსონის ოლქის სამხედრო ადმინისტრაციის მიერ გავრცელებულ განცხადებაში.

უკრაინის საჰაერო ძალები აცხადებენ, რომ გასულ ღამეს რუსეთის მიერ გაშვებული 11 “შაჰიდის” ტიპის დრონიდან 10 გაანადგურეს და ასევე, ერთი რაკეტა. ,,2023 წლის 2 დეკემბრის ღამეს, მტერმა შეუტია 11 “შაჰიდის” ტიპის უპილოტო საფრენი აპარატით კონცხ ჩაუდიდან (ყირიმი) და მართვადი საჰაერო რაკეტით ოკუპირებული ზაპოროჟიეს რეგიონის საჰაერო სივრციდან,” – ნათქვამია განცხადებაში.

რუსი ოპოზიციონერის, ალექსეი ნავალნის ინფორმაციით, მას ახალი ბრალი წაუყენეს, ამჯერად 214-ე, ვანდალიზმის მუხლით. ,,წარმოდგენა არ მაქვს, რა არის 214-ე მუხლი, არსად იძებნება. ისინი ახალ სისხლის სამართლის საქმეს ღძრავენ ჩემს წინააღმდეგ ყოველ სამ თვეში ერთხელ”,- ნათქვამია ნავალნის განცხადებაში. ნავალნი უკვე იხდის სასჯელს და ჯამში თითქმის 30 წლიანი პატიმრობა აქვს მისჯილი “ექსტრემიზმისა” და “თაღლითობის” საქმეებზე. ოქტომბერში კი რუსეთის პოლიციამ ოპოზიციონერის სამი ადვოკატიც დააკავა და მათ სახლებში ჩხრეკა ჩაატარა. პროკურატურა უფლებადამცველებს “ექსტრემისტული გაერთიანების” წევრობას ედავება. ნავალნი 2021 წელს, გერმანიიდან რუსეთში დაბრუნების შემდეგ დააკავეს. იქამდე კი, 2020 წელს „ნოვიჩოკით“ მოწამლეს და სამკურნალოდ გერმანიაში იმყოფებოდა.

რუსეთში, ბურიატიაში, ბაიკალ-ამურის სარკინიგზო მაგისტრალის მონაკვეთზე ერთ დღეში მეორე სატვირთო მატარებელი ააფეთქეს. აფეთქება სევერომუის გვირაბის შემოვლით გზაზე მოხდა. იქამდე კი რუსების საწვავით დატვირთული ეშელონი გვირაბში ააფეთქეს. არსებული ინფორმაციით, აფეთქდა საწვავის ავზები, რომლებიც მატარებლით გადაჰქონდათ. უკრაინული მასმედია უშიშროების ძალებიდან წყაროზე დაყრდნობით იუწყება, რომ მეორე მატარებელი შემოვლით ხიდზე ააფეთქეს.

ისრაელის შეიარაღებული ძალები, 7 ოქტომბერს „ჰამასის“ თავდასხმისას გატაცებული კიდევ ხუთი მძევლის დაღუპვას ადასტურებს. მათივე ცნობით, დაღუპულთა ოჯახის წევრები უკვე ინფორმირებული არიან. არსებული ინფორმაციით, ოთხი დაღუპული კიბუც ნირ ოზის მცხოვრებია, ერთ-ერთი მათგანი 75 წლის ელიახ მარგალიტია, რომლის შვილიც ტყვეობიდან გუშინ გაათავისუფლეს. დაღუპულთა შორისაა 26 წლის მუსიკოსიც, რომელიც ფესტივალიდან გაიტაცეს.

რუსეთის შეიარაღებულ ძალებში სამხედრო მოსამსახურეთა რაოდენობა 1 320 000 ადამიანამდე გაიზარდა. პუტინმა წინა ბრძანებულება, რომელიც 2022 წლის 25 აგვისტოთი თარიღდება და ჯარის შემადგენლობას 1 150 628 სამხედრო მოსამსახურემდე ადგენდა, გააუქმა. ახალი განკარგულება ხელმოწერის დღიდან, 2023 წლის 1-ელი დეკემბრიდან ამოქმედდა.

აშშ-ის წარმომადგენელთა პალატამ რესპუბლიკელი დეპუტატი ჯორჯ სანტოსი კონგრესიდან გარიცხა. მის გარიცხვას მხარი 311-მა კონგრესმენმა დაუჭირა, წინააღმდეგ 114 წავიდა. სანტოსს 2023 წლის მაისში ბრალი წარუდგინეს თაღლითობაში, ფულის გათეთრებასა და საჯარო სახსრების მითვისებაში. მას ადანაშაულებენ წარმომადგენელთა პალატაში ცრუ განცხადებების გაკეთებაშიც. “კონგრესმენი ცდილობდა თაღლითურად გამოეყენებინა თავისი პალატის კანდიდატურის ყველა ასპექტი საკუთარი თავისთვის. პირადი ფინანსური მოგებისთვის”, – ნათქვამია პალატის ეთიკის კომიტეტის ანგარიშში. ცნობისთვის, ნიუ-იორკელი დეპუტატი მეექვსე ადამიანია კონგრესის ისტორიაში, რომელიც წარმომადგენელთა პალატიდან გარიცხეს. 34 წლის ჯორჯ სანტოსი კონგრესში 2022 წლის ნოემბრის შუალედური არჩევნების შედეგად აირჩიეს.