დღე: დეკემბერი 3, 2023

ინდონეზიაში, მერაპის მთაზე, აქტიური ვულკანი ამოიფრქვა. ,,დაფიქსირდა ნაცრისფერი ფერფლის მძლავრი სვეტი, რომელიც აღმოსავლეთისკენ იყო გადახრილი. ამოფრქვევა ჯერ კიდევ გრძელდება”, – ამბობს ინდონეზიური ვულკანოლოგიისა და გეოლოგიური რისკის შემცირების ცენტრის ხელმძღვანელის ჰენდრა გუნავანი. ცნობისთვის, ვულკანის სიმაღლე 2 891 მეტრია.

დროებით ოკუპირებული ყირიმის ქალაქ სიმფეროპოლში დივერსანტმა ქალებმა 35 რუსი ჯარისკაცი მოწამლეს, მათგან 24 დაიღუპა, საავადმყოფოშია 11. უკრაინული მედიის ცნობით, ორი ქალი რუს სამხედროებს საკვებსა და არყით გაუმასპინძლდა, რომელშიც დარიშხანი და სტრიქნინი იყო გარეული. ქალები ადგილიდან მიიმალნენ.

ნიუ-იორკში, ქუინსის სამხრეთ ნაწილში, ხანძრის შედეგად 4 ადამიანი დაიღუპა, 5 კი დაშავდა. პოლიციამ დაადასტურა, რომ სახლს ცეცხლი განზრახ წაუკიდეს. მათივე ცნობით, 911-ში ახალგაზრდა ქალმა დარეკა, რომელმაც თქვა, რომ “მისი ბიძაშვილი ოჯახის წევრებს კლავდა”. მეხანძრეების ინფორმაციით, სიცოცხლისთვის საშიში დაზიანებებით საავადმყოფოში ორი პოლიციელი გადაიყვანეს, ისინი ეჭვმიტანილმა კაცმა დაჭრა.

რუსმა ოკუპანტებმა ხერსონში მრავალსართულიანი კორპუსი დაბომბეს. იერიშის შედეგად დაიღუპა ერთი და დაშავდა 5 მშვიდობიანი მოქალაქე. არსებული ინფორმაციით, რუსებმა შენობაზე იერიში არტილერიით მიიტანეს. სხვა დეტალები ჯერჯერობით უცნობია. ცნობისთვის, დღეს რუსებმა ხერსონში ორი საავადმყოფო დაბომბეს.

სამხრეთ ფილიპინებში, ქალაქ მარავში, მინდანაოს სახელმწიფო უნივერსიტეტში აფეთქების შედეგად 4 ადამიანი დაიღუპა. BBC წერს, რომ შემთხვევის შედეგად არიან დაჭრილებიც, რომლებიც ახლომდებარე საავადმყოფოში ძირითადად მცირე ჭრილობებისა და სისხლჩაქცევების გამო გადაიყვანეს. პრეზიდენტმა ფერდინანდ მარკოს უმცროსმა დაგმო აფეთქება და თქვა, რომ ეს იყო “უაზრო და ყველაზე ამაზრზენი” აქტი, რომელიც “ჩაიდენილია უცხოელი ტერორისტების მიერ”. პრეზიდენტმა მოსახლეობას სიმშვიდისკენ მოუწოდა. უნივერსიტეტმა მომხდართან დაკავშირებით განცხადება გაავრცელა და მწუხარება გამოთქვა. “ცივილიზებულ საზოგადოებაში ძალადობის ადგილი არ არის. ის განსაკუთრებით საზიზღარია უმაღლეს სასწავლებლებში, როგორიცაა MSU. ჩვენ სოლიდარობას ვუცხადებთ ჩვენს ქრისტიანულ საზოგადოებას და ყველა იმ ადამიანს, ვინც დაზარალდა ამ ტრაგედიით”, –…

NATO-ს გენერალურმა მდივანმა, იენს სტოლტენბერგმა განაცხადა, რომ მოკავშირეებმა უკრაინის მხარდაჭერა უნდა გააგრძელონ. ,,აუცილებელია გვესმოდეს, რომ პრეზიდენტ პუტინის გამარჯვების შემთხვევაში უკრაინას ტრაგედია ელის. მაგრამ ეს ჩვენთვისაც სახიფათო იქნება. ამიტომ, ჩვენივე ინტერესებშია, რომ უკრაინამ გაუძლოს,” – თქვა სტოლტენბერგმა. მან ასევე აღნიშნა, რომ აუცილებელია ისინი მზად იყვნენ “ცუდი ამბებისთვის” რადგან, მისი თქმით, ომი ცვალებადი პროცესია და უკრაინის დახმარებაზე უარი არ უნდა თქვან.

ამსტერდამის სხიპჰოლის აეროპორტმა დაახლოებით 150 შიდა და გარე ფრენა დიდთოვლობის გამო გააუქმა. ჰოლანდიურმა ავიაკომპანიამ KLM, რომელიც აეროპორტის მთავარი მომხმარებელია, ჰოლანდიურ საინფორმაციო სააგენტო ANP-ს განუცხადა, რომ შუადღისას და საღამოს 65 ევროპული ფრენაა გაუქმებული. შეგახსენებთ, რომ ევროპის კიდევ რამდენიმე ქვეყანაში დიდთოვლობის გამო შეჩერებულია ფრენები და სარკინიგზო მიმოსვლა.

ჩრდილოეთ კაროლინამ ჰოლოდომორი უკრაინელი ხალხის გენოციდად აღიარა. ინფორმაციას Twitter-ზე აშშ-ში უკრაინის ელჩი, ოქსანა მარკაროვა ავრცელებს. ,,ჩვენ მადლობელი ვართ ჩრდილოეთ კაროლინას შტატსა და გუბერნატორის როი კუპერის, რომელმაც უკრაინის ჰოლოდომორის 90 წლისთავზე ხელახლა აღიარა გენოციდად”, – წერს მარკაროვა.

დიდთოვლობის გამო ფრენები და სარკინიგზო მიმოსვლა ჩეხეთსა და ავსტრიაშიც შეჩერდა. გერმანიის მეტეოროლოგიური სამსახურის შეფასებით, მოსალოდნელია, რომ დიდთოვლობა და უამინდობა კიდევ გაგრძელდება. მოყინულ გზებზე ავტოსაგზაო შემთხვევები და საცობებიც დაფიქსირდა.

რუსული აგრესიის შედეგად უკრაინაში 511 ბავშვი დაიღუპა, დაშავდა 1 152-ზე მეტი არასრულწლოვანი. ინფორმაციას უკრაინის გენერალური პროკურატურა ავრცელებს. უწყების ცნობით, ყველაზე მეტი ბავშვი დაშავდა: დონეცკის რეგიონში – 496, ხარკოვის ოლქში – 304, კიევის ოლქში – 139, ჩერნიგოვის ოლქში – 71, ლუგანსკის ოლქში – 67, ნიკოლაევის ოლქში – 97, ხერსონის ოლქში – 132, ზაპოროჟიეს ოლქში – 99, დნეპროპეტროვსკის ოლქი – 777, ლუგანსკის ოლქში – 67. აღნიშნული მონაცემები საბოლოო არ არის, რადგან აქტიური საომარი მოქმედებების გამო, დაღუპულთა და დაშავებულთა ზუსტი რაოდენობის დადგენა გართულებულია.

ჩრდილოეთ პაკისტანში, ქალაქ ჩილასთან, ავტობუსს შეიარაღებული პირები დაესხნენ თავს. თავდასხმის შედეგად 8 მგზავრი დაიღუპა, 20-მდე კი დაშავდა. რეგიონული მთავრობის სპიკერმა მუჰამედ ალი ჯოჰარმა განაცხადა, რომ ბოევიკებმა ავტობუსს ცეცხლი გაუხსნეს, დაჭრილები საავადმყოფოში გადაიყვანეს. თავდასხმაზე პასუხისმგებლობა არცერთ დაჯგუფებას არ აუღია. სროლის მოტივი ჯერჯერობით უცნობია.

პარიზში, ეიფელის კოშკთან შეიარაღებული პირი ტურისტებს თავს დაესხა, რის შედეგადაც დაიღუპა ერთი და დაშავდა ორი ადამიანი. შემთხვევა 2 დეკემბერს, ადგილობრივი დროით დაახლოებით 19:00 საათზე მოხდა. პოლიციის ინფორმაციით, დაღუპული გერმანიის მოქალაქეა. აღნიშნულ ფაქტზე დაწყებულია გამოძიება. როგორც Reuters აღნიშნავს, პოლიციამ 26 წლის კაცი დააკავა, რომელიც საფრანგეთის მოქალაქეა. ეჭვმიტანილი 2016 წელს თავდასხმის დაგეგმვისთვის იყო ნასამართლევი. მან პოლიციას განუცხადა, რომ შეწუხებული იყო ამდენი მუსლიმის სიკვდილით პალესტინაში და აღელვებული ღაზის სექტორში მიმდინარე მოვლენებით. ,,თავდამსხმელის შესახებ ვიცით ის, რომ არის ფრანგი, დაბადებულია საფრანგეთში, 1997 წელს. შემთხვევის დროს პოლიციის კამერები ჩართული იყო და ყველაფერი გადაღებულია. ის იყო…

,,ახლა გადამწყვეტი ათწლეულია, რომელიც ევროპასა და მთლიანად მსოფლიოში უსაფრთხოების მომავალს განსაზღვრავს”. ამის შესახებ აშშ-ის თავდაცვის მდივანმა ლოიდ ოსტინმა განაცხადა. ,,ახლა, როგორც პრეზიდენტმა ბაიდენმა თქვა, “გადამწყვეტ ათწლეულში” ვცხოვრობთ და შემდეგი რამდენიმე წელიწადი ჩინეთის სახალხო რესპუბლიკასთან ჩვენი კონკურენციის პირობებს განსაზღვრავს, ევროპაში უსაფრთხოების მომავალს განსაზღვრავს, განსაზღვრავს, ჩვენი შვილები და შვილიშვილები მემკვიდრეობით მიიღებენ წესებისა და უფლებების ღია მსოფლიოს თუ შთაგონებულ ავტოკრატებთან შეჯახება მოუწევთ, რომლებიც ძალისა და შიშის გამოყენებით ცდილობენ დომინირებას… “ჰამასს” ან პუტინს გამარჯვების საშუალებას არ მივცემთ. ჩვენს მტრებს ჩვენი დაყოფისა და დასუსტების საშუალებას არ მივცემთ. ამიტომ მაშინ, როდესაც ისრაელის დახმარებას ვზრდით, ჩვენ ფოკუსირებული…

ისრაელის თავდაცვის მინისტრმა, იოავ გალანტმა განაცხადა, რომ მას შემდეგ, რაც “ჰამასმა” ცეცხლის შეწყვეტის შეთანხმება დაარღვია, ისრაელის სამხედროები “სრული ძალით” დაუბრუნდნენ ბრძოლას. ,,ჩვენ ვაგრძელებთ ბრძოლას ზუსტად იქიდან, სადაც შევჩერდით… ათასობით ტერორისტი ლიკვიდირებულია, ათობით შტაბზე შეტევა განხორციელდა, ასობით ტერორისტი ავიყვანეთ და ამჟამად ისრაელში არიან. 110 მძევლის დაბრუნება მიღწევაა. მსოფლიოში არცერთ ჯარს არ მიუღწევია ასეთი შედეგისთვის ტერორისტული ორგანიზაციის წინააღმდეგ. ჩვენ ამას მივაღწიეთ ისრაელის თავდაცვის ძალების სიძლიერის გამო”, – ამბობს გალანტი.

უკრაინის საჰაერო ძალები აცხადებენ, რომ გასულ ღამეს მათ რუსეთის მიერ გაშვებული 12 “შაჰიდის” ტიპის დრონიდან 10 ჩამოაგდეს. ,,უპილოტო საფრენი აპარატები თავს დაგვესხნენ რამდენიმე ტალღად და მიკოლაევის ოლქში ოკუპირებული ხერსონის გავლით შევიდნენ. მიკოლაევში, სამხრეთ საჰაერო სარდლობის პასუხისმგებლობის ზონაში, “შაჰიდების” უმეტესობა საჰაეო თავდაცვამ ჩამოაგდო, დანარჩენი დრონები კი ჩრდილო-დასავლეთის მიმართულებით მიემართებოდნენ და ხმელნიცკის ოლქში ჩამოვაგდეთ,” – ნათქვამია განცხადებაში.

გასულ დღეს რუსმა ოკუპანტებმა სუმის ოლქი დაბომბეს. ნგრევის, მსხვერპლის და დაშავებულების შესახებ ინფორმაცია ჯერჯერობით არ გავრცელებულა. ,,გასული დღის განმავლობაში რუსებმა სუმის ოლქის სასაზღვრო ტერიტორიები და დასახლებები 22-ჯერ დაბომბეს. დაფიქსირდა 149 აფეთქება. ცეცხლის ქვეშ მოექცა იუნაკოვსკი, ხოტინსკი, ბილოპოლსკი, კრასნოპილსკი, ველიკოფისარივსკი, ესმანსკი და სერედინო-ბუდსკი,” – ნათქვამია სუმის რეგიონული სამხედრო ადმინისტრაციის განცხადებაში.