დღე: ნოემბერი 22, 2023

ევროპარლამენტი უკრაინის მთავრობის მაღალჩინოსნების მოთხოვნის შემდეგ, დათანხმდა კიევში ოფისის გახსნას, უკრაინის პარლამენტის მხარდაჭერის გასაძლიერებლად.  ამის შესახებ ინფორმაციას Euroactive ევროპარლამენტის ბიუროს დოკუმენტზე დაყრდნობით ავრცელებს. გადაწყვეტილება მიზნად ისახავს ხელი შეუწყოს უკრაინის პარლამენტთან ურთიერთობებს, კერძოდ, დააკავშიროს იგი ევროპარლამენტის „შესაბამის კომიტეტებთან“ და ხელი შეუწყოს ადმინისტრაციულ მუშაობას. ბიურო არის ევროპარლამენტის ორგანო, რომელიც პასუხისმგებელია დაწესებულების შიდა ფუნქციონირების შესახებ ადმინისტრაციულ გადაწყვეტილებებზე. ევროპარლამენტს აქვს სამეკავშირეო ოფისი თითოეულ წევრ სახელმწიფოში, რომელიც ეხმარება პარლამენტს მათთან კომუნიკაციაში, მაგალითად, დაინტერესებულ მხარეებთან კომუნიკაციით, ღონისძიებების ორგანიზებით და ადგილობრივ მედიასთან კავშირით. დოკუმენტის მიხედვით, არაწევრ ქვეყნებში ევროპარლამენტის მხოლოდ რამდენიმე ოფისი ფუნქციონირებს, კერძოდ ნიუ-იორკში, ადის აბებასა და ჯაკარტაში.

აშშ-ის სახელმწიფო მდივანის, ენტონი ბლინკენის განცხადებით, ისრაელსა და „ჰამასს“ შორის მძევლების გათავისუფლებაზე მიღწეული შეთანხმება მნიშვნელოვანი პროგრესია. „დღევანდელი შედეგი არის დაუღალავი დიპლომატიისა და დაუნდობელი ძალისხმევის შედეგი“, – განაცხადა ბლინკენმა. ენტონი ბლინკენმა მადლობა გადაუხადა ეგვიპტესა და კატარს, დისკუსიებში მათი როლისთვის. „ჩემთვის პრიორიტეტია საზღვარგარეთ მყოფი ამერიკელების უსაფრთხოება და დაცვა. ჩვენ გავაგრძელებთ ჩვენს ძალისხმევას, რათა უზრუნველვყოთ ყველა მძევლის გათავისუფლება და მათი სწრაფი დაბრუნება ოჯახებთან“, – აღნიშნა ბლინკენმა.

აშშ-ს პრეზიდენტი ჯო ბაიდენი აცხადებს, რომ ისრაელსა და „ჰამასს“ შორის მძევლების გათავისუფლებაზე მიღწეული შეთანხმებით კმაყოფილია. მისი თქმით, კმაყოფილია იმით, რომ ზოგიერთი მძევალი, რომელმაც ენით აღუწერელი განსაცდელი გაიარა, შეთანხმების განხორციელებისთანავე ოჯახებს დაუბრუნდება. ,,ეს შეამსუბუქებს ღაზაში უდანაშაულო პალესტინელი ოჯახების ტანჯვას“, – ამბობს ბაიდენი. მისი განცხადებით, მნიშვნელოვანია, ამ შეთანხმების ყველა ასპექტის სრულად განხორციელება.  

„ბიბისი“ ამერიკელ მაღალჩინოსნებზე დაყრდნობით წერს, რომ ისრაელსა და „ჰამასს“ შორის მძევლების შესახებ, სავარაუდოდ, შეთანხმება შედგა. „ბიბისისთან“ ანონიმური წყაროები აცხადებენ, რომ „ჰამასი“ 50 მძევალს, ძირითადად, ბავშვებსა და ქალებს 150 პალესტინელი პატიმრის სანაცვლოდ გაათავისუფლებს. „ბიბისის“ ცნობით, ისრაელის პრემიერ-მინისტრი ბენიამინ ნეთანიაჰუ ომის კაბინეტთან მართავს შეხვედრას, რის შემდეგაც შეხვდება უშიშროების საბჭოსა და სამთავრობო კაბინეტს.