დღე: ივლისი 12, 2023

რუსეთმა კიევს  ირანული წარმოების “შაჰიდის” დრონებით შეუტია. უკრაინის საჰაერო თავდაცვამ 15 დრონიდან 11 ჩამოაგდო. თავდასხმის შედეგად ცენტრალურ ჩერკასის რეგიონში, ორმა ადამიანმა მიიღო დამწვრობა. ამასთან, დაზიანდა არასაცხოვრებელი ინფრასტრუქტურა. ,,მტერმა დედაქალაქზე მორიგი საჰაერო თავდასხმა განახორციელა. წინასწარი ინფორმაციით, კვლავ Shahed-ის ტიპის საბრძოლო მასალა გამოიყენეს. მტერი ორი დღეა ზედიზედ უშვებს კიევისკენ ირანულ უპილოტო საფრენ აპარატებს. საჰაერო იერიში 2 საათზე მეტხანს გაგრძელდა. ჩვენი საჰაერო თავდაცვის ძალებმა და საშუალებებმა კიევის ირგვლივ საჰაერო სივრცეში მტრის ყველა სამიზნე აღმოაჩინეს და გაანადგურეს,” – აცხადებენ კიევის სამხედრო ადმინისტრაციაში.

ამერიკელების მიერ კიევისთვის კასეტური საბრძოლო მასალის მიწოდება უკრაინაში კონფლიქტს გაახანგრძლივებს – ამის შესახებ რუსეთის თავდაცვის მინისტრმა სერგეი შოიგუმ განაცხადა. მისი თქმით, აშშ უკრაინას კასეტურ ბომბებს მიაწვდის, მოსკოვი “იძულებული იქნება” იგივე იარაღი გამოიყენოს. „თუ შეერთებული შტატები უკრაინას კასეტური საბრძოლო მასალით მიაწოდებს, რუსეთის შეიარაღებული ძალები იძულებულნი იქნებიან საპასუხოდ გამოიყენონ მსგავსი იარაღი უკრაინის შეიარაღებული ძალების წინააღმდეგ. უნდა აღინიშნოს, რომ რუსეთს აქვს კასეტური საბრძოლო მასალები, ასე ვთქვათ, ყველასთვის. ამავდროულად, ისინი ბევრად უფრო ეფექტურია, ვიდრე ამერიკული, მათი ნომენკლატურა უფრო ფართო და მრავალფეროვანია“, – აღნიშნა შოიგუმ.

 შეგვიძლია, შევიტანოთ მნიშვნელოვანი წვლილი უკრაინის სურვილში, იყოს არა მხოლოდ ევროკავშირის წევრი, არამედ გახდეს ნატო-ს წევრი, – ამის შესახებ ევროკომისიის პრეზიდენტმა, ურსულა ფონ დერ ლაიენმა  ვილნიუსში განაცხადა. მისი თქმით, უკრაინის გვერდით დგანან ომის დაწყების დღიდან და უცხადებენ ფინანსურს მხარდაჭერას. „ომის დაწყების დღიდან ჩვენ უკრაინის გვერდით ვართ და ვუცხადებთ ფინანსურ მხარდაჭერას, ვთავაზობთ თავშესაფრებს. ჩვენ შეგვიძლია, შევიტანოთ მნიშვნელოვანი წვლილი უკრაინის სურვილში, იყოს არა მხოლოდ ევროკავშირის წევრი, არამედ გახდეს ნატო-ს წევრი. ამისთვის ვატარებთ რეფორმებს, ვაძლიერებთ ინსტიტუტებს, მაგალითად, ვიბრძვით კორუფციის წინააღმდეგ. ევროკავშირი უკრაინასთან ერთად მუშაობს ამ რეფორმების გასატარებლად. შესანიშნავია იმის ყურება, თუ რა სისწრაფით ახორციელებს უკრაინა…

ჩრდილოეთ კორეამ კონტინენტთაშორისი ბალისტიკური რაკეტა (ICBM) გაუშვა. ამის შესახებ იაპონელი და სამხრეთ კორეის ოფიციალური პირები იტყობინებიან. ფხენიანმა კონტინენტთაშორისი ბალისტიკური რაკეტა მას შემდეგ გაუშვა, რაც ის შურისძიებით დაემუქრა,  მათი თქმით, აშშ-ის ჯაშუშური თვითმფრინავები ჩრდილოეთ კორეის ტერიტორიაზე შეიჭრნენ. ვაშინგტონმა უარყო ბრალდებები და განაცხადა, რომ მისი სამხედრო პატრული შეესაბამება საერთაშორისო სამართალს. 2022 წელს ჩრდილოეთ კორეამ რაკეტების რეკორდული რაოდენობა გამოცადა, მათ შორისაა ისეთები, რომლებსაც აშშ-ის ტერიტორიამდე მიღწევა შეუძლიათ. ამის საპასუხოდ აშშ-მა და სამხრეთ კორეამ ერთობლივი წვრთნები გააძლიერეს.

აშშ-ს ყოფილი ვიცე-პრეზიდენტისმ მაიკ პენსის განცხადებით, უკრაინა ნატო-ში გაწევრიანებას ომის მოგების შემდეგ უნდა ელოდოს. მისი თქმით,  უკრაინის ნატო-ში გაწევრიანება არ უნდა განიხილებოდეს „ომის დროს“. „გულწრფელად მჯერა, რომ როგორც თავისუფალი სამყაროს ლიდერმა და დემოკრატიის არსენალმა, მნიშვნელოვანია, რომ ამერიკამ უკრაინელებს მიაწოდოს ის, რაც მათ სჭირდებათ ბრძოლისა და გამარჯვებისთვის და მოიგერიონ ეს არაპროვოცირებული რუსული შეჭრა, მაგრამ ნატო-ს წევრობის საკითხზე  მე ვილაპარაკე ვოლოდიმირ ზელენსკისთან – ვფიქრობ, ყველა უნდა დაველოდოთ ომის მოგებას“, -განაცხადა პენსმა.