დღე: ნოემბერი 6, 2023

იორდანიის დედოფალის, რანიას  განცხადებით,  ისრაელს ღაზის არა „ჰამასისგან“ გათავისუფლება, არამედ მისი ოკუპაცია სურს. „ჩვენ თუ არ დავასახელებთ ამ ძირეულ მიზეზებს, მაშინ თქვენ შეგიძლიათ, მოკლათ მებრძოლები, მაგრამ ვერ მოკლავთ მიზეზს. ამ დანგრეული შენობების ნანგრევების ქვეშ აღმოჩნდება კიდევ ერთი ჯგუფი, რომელიც უფრო მტკიცე და მოტივირებული იქნება, გააკეთოს ის, რაც „ჰამასმა“ გააკეთა“, – განაცხადა იორდანიის დედოფალმა. მისი თქმით, არ ეთანხმება ისრაელის განცხადებას, რომ ის არ უმიზნებს მშვიდობიან მოსახლეობას. „დაღუპულია 10 000-ზე მეტი ადამიანი, რომელთაგან 70% ქალი და ბავშვია. ისრაელელების მტკიცება, რომ ისინი მშვიდობიანი მოქალაქეების დაცვას ცდილობენ, დაზვერვის შეურაცხყოფაა“, – განაცხადა იორდანიის დედოფალმა.  

აშშ-ის განცხადებით,  მართვადი სარაკეტო წყალქვეშა ნავი ახლო აღმოსავლეთში ჩავიდა. განცხადებასთან ერთად გავრცელდა ფოტოც. აშშ-ის ცენტრალურმა სარდლობამ კვირას სოციალურ მედიაში განაცხადა, რომ ოჰაიოს კლასის წყალქვეშა ნავი შედიოდა მის პასუხისმგებლობის ზონაში.  

ისრაელის თავდაცვის ძალების განცხადებით, ქალაქი ღაზა სრულად მოაქციეს ალყაში. თავდაცვის ძალების სპიკერის, დანიელ ჰაგარის თქმით, ამიერიდან იქნება ორი ზოლი, “სამხრეთი და ჩრდილოეთი ღაზა”. მან ამას ჰამასის წინააღმდეგ ისრაელის ომში “მნიშვნელოვანი ეტაპი” უწოდა, თუმცა დამატებით დეტალებზე არ უსაუბრია. უცხოური მედიის ინფორმაციით, სამხედროების ქალაქში შესვლა შემდეგი 48 საათის განმავლობაში იგეგმება.

აშშ-ის სახელმწიფო მდივანი, ენტონი ბლინკენი თურქეთში  ჩავიდა. ბლინკენი თურქ ოფიციალურ პირებს შეხვდება ისრაელ-ჰამასის ომის განსახილველად. ცნობისთვის, თურქეთის პრეზიდენტი, რეჯეფ თაიფ ერდოღანი ისრაელის შეტევას ღაზაში აკრტიკიტებს და  ქმედებებს “კაცობრიობის წინააღმდეგ ჩადენილ დანაშაულს” უწოდებს. მისი თქმით, წყვეტს კომუნიკაციას ისრაელის პრემიერმინისტრთან, ბენიამინ ნეთანიაჰუსთან. ბლინკენი ისრაელში, იორდანიაში, დასავლეთ სანაპიროზე, კვიპროსსა და ერაყში იმყოფებოდა.

ოდესაში რუსეთის მიერ განხორციელებული სარაკეტო იერიშის შედეგად ხელოვნების ეროვნული მუზეუმის შენობა დაზიანდა. შეტევის შედეგად დაშავდა, სულ მცირე, 5 ადამიანი. ოდესის სამხედრო ადმინისტრაციის ხელმძღვანელის, ოლეგ კიპერის ინფორმაციით, დაზიანებულია შენობის კედლები, ჩამსხვრეულია რამდენიმე მინა. სამხრეთ უკრაინის თავდაცვის ძალების ცნობით, ოდესის რეგიონში რუსულმა ჯარებმა Kh-31P ტიპის რაკეტა ისროლეს. შედეგად დაზიანდა ადმინისტრაციული შენობები და დაშავდა სამი თანამშრომელი. მათივე ინფორმაციით, აფეთქების ტალღამ მიმდებარე შენობებიც დააზიანა.