დღე: დეკემბერი 27, 2023

ხაშურში 15 წლის მოზარდმა იმშობიარა. ამის შესახებ ინფორმაციას რეგიონული გამოცემა “მოზაიკა” ავრცელებს. გამოცემის ინფორმაციით, გოგო არაოფიციალურად იყო დაოჯახებული.

რუსთავში, ერთი ოჯახის ხუთი წევრი, მათ შორის არასრულწლოვანი, ბუნებრივი აირით მოიწამლა. ამის შესახებ ინფორმაციას “ინფო რუსთავი” ავრცელებს. გავრცელებული ინფორმაციით, საცხოვრებელ სახლში ნახშიროჟანგის დაგროვება გაუმართავმა წყლის გამაცხელებელმა გამოიწვია. ხუთივე მათგანს შესაბამისი სამედიცინო დახმარება გაეწიათ და მათ სიცოცხლეს საფრთხე არ ემუქრება.

ძაღლი, რომელსაც ბაღდადში ბლაგვი საგნით დაზიანება თავის არეში მიაყენეს, მოკვდა.  ამის შესახებ ინფორმაციას ცხოველთა უფლებადამცველი მიხეილ კაჭკაჭიშვილი ავრცელებს. ცნობისთვის, 24 დეკემბერს სოციალურ ქსელში გავრცელდა კადრები, სადაც ჩანდა, რომ მიუსაფარ ძაღლს ბლაგვი საგნით თავის არეში ჰქონდა დაზიანებები მიყენებული. ძაღლს ოპერაციაც ჩაუტარდა, თუმცა მისი გადარჩენა ვერ მოხერხდა. შინაგან საქმეთა სამინისტრომ მომხდარზე გამოძიება სისხლის სამართლის კოდექსის 259-ე მუხლით დაიწყო, რაც ცხოველის წამებას ან სასტიკ მოპყრობას გულისხმობს.

მკვლელობა მოხდა გვიან ღამით  თბილისში. გავრცელებული ინფორმაციით, მოკლული კაცი, სავარაუდოდ, სამხედროა. კაცს ცეცხლსასროლი იარაღიდან ესროლეს და ადგილზე დაიღუპა. სავარაუდო დამნაშავე სამართალდამცავებმა ცხელ კვლაზე დააკავეს. დამატებითი დეტალები ამ ეტაპზე უცნობია.