დღე: დეკემბერი 22, 2023

21 დეკემბერის ღამეს რუსეთმა უკრაინის დედაქალაქ კიევს შეუტია. საქალაქო ადმინისტრაციის განცხადებით,  საჰაერო თავდაცვის სისტემა მოქმედებდა. კიევის მერის, ვიტალი კლიჩოს განცხადებით,  უპილოტო საფრენი აპარატის ნამსხვრევები ორ რაიონში ჩავარდა. სოლომენსკის რაიონში მდებარე საცხოვრებელი კორპუსის ზედა სართულებზე ხანძარი გაჩნდა. ამასთან, დაზიანდა საცხოვრებელი სახლი  დარნიცკის რაიონში. რამდენიმე ბინაში კედლები ნაწილობრივ ჩამოინგრა, ზოგან კი, მინები ჩაიმსხვრა. დაშავებულია, სულ მცირე, ორი ადამიანი. მსხვერპლი არ ყოფილა. ხელისუფლება მოქალაქეებს თავშესაფრებში დარჩენისკენ მოუწოდებს.

უნგრეთის პრემიერ-მინისტრის ვიქტორ ორბანის განცხადებით,  უკრაინის პრეზიდენტ ვოლოდიმირ ზელენსკის მიწვევა ორმხრივი შეხვედრის გასამართად მიიღო. მისი თქმით, ზელენსკიმ შეხვედრა და მოლაპარაკება მიმდინარე თვის დასაწყისში შესთავაზა. „მე ვუთხარი, რომ მის განკარგულებაში ვიქნებოდი. მხოლოდ ერთი კითხვა უნდა დავაზუსტოთ: რაზე?“, – განაცხადა ორბანმა.    

ღაზაში ომი არ შეჩერდება, ვიდრე ისრაელი არ მიაღწევს თავის ყველა მიზანს, – ამის შესახებ ისრაელის პრემიერ-მინისტრმა, ბენიამინ ნეთანიაჰუმ განაცხადა. „არჩევანი, რომელსაც მე ვთავაზობ „ჰამასს“, ძალიან მარტივია: დანებდი ან მოკვდი. მათ არ აქვთ და არც ექნებათ სხვა არჩევანი. მას შემდეგ, რაც ჩვენ გავანადგურებთ „ჰამასს“, მე გამოვიყენებ მთელ ჩემს ძალას, რათა ღაზა აღარასოდეს დაემუქროს ისრაელს“, – განაცხადა ნეთანიაჰუმ.