დღე: ივნისი 14, 2021

საქართველოს ხელშეწყობით, აზერბაიჯანის მიერ სომეხი ტყვეების გათავისუფლებასა და სანაცვლოდ, სტრატეგიული მნიშვნელობის ინფორმაციის მიღებას მიესალმებიან ევროკავშირის წარმომადგენლები. საგარეო საკითხებში ​ევროკავშირის უმაღლესი წარმომადგენლის, ჟოზეფ ბორელის განცხადებით, ეს ნაბიჯები ევროკავშირმა და სხვა საერთაშორისო აქტორებმა წაახალისეს. ბორელი სომხეთსა და აზერბაიჯანს ეუთო-ს მინსკის ჯგუფის თანათავმჯდომარეების ეგიდით მოლაპარაკებების განახლებისკენ მოუწოდებს. შუამდგომლობისთვის საქართველოს მადლობას უხდის ევროპარლამენტარი მარინა კალიურანდი. ჟოზეფ ბორელის მსგავსად მხარეებს ისიც თანამშრომლობისკენ მოუწოდებს.

საქართველოს ოფიციალური ვიზიტით დღეს ეწვევა ევროპის უსაფრთხოებისა და თანამშრომლობის ორგანიზაციის (ეუთო) გენერალური მდივანი ჰელგა მარია შმიდი. საქართველოს საგარეო საქმეთა სამინისტროს პრესსამსახურის ინფორმაციით, ორდღიანი ვიზიტის ფარგლებში, ეუთო-ს გენერალური მდივანი შეხვედრებს გამართავს საქართველოს პრეზიდენტ სალომე ზურაბიშვილთან, პრემიერ-მინისტრ ირაკლი ღარიბაშვილთან, პარლამენტის თავმჯდომარე კახა კუჭავასთან, ვიცე-პრემიერთან, საგარეო საქმეთა მინისტრ დავით ზალკალიანთან და შერიგებისა და სამოქალაქო თანასწორობის საკითხებში საქართველოს სახელმწიფო მინისტრ თეა ახვლედიანთან. საქართველოში ყოფნისას ჰელგა შმიდი ეწვევა საოკუპაციო ხაზის მახლობლად მდებარე სოფელ ერგნეთს და მონაწილეობას მიიღებს ინციდენტების პრევენციისა და მათზე რეაგირების მექანიზმის (IPRM) შეხვედრაში. იგი ასევე მონაწილეობას მიიღებს საოკუპაციო ხაზის მახლობლად მდებარე სოფელ ციცაგიანთკარში წყალმომარაგების პროექტის ინაუგურაციის ღონისძიებაში.

ჩრდილო-ატლანტიკური ალიანსის წევრი ქვეყნის ლიდერები დღეს ბრიუსელში, NATO-ს შტაბ-ბინაში იკრიბებიან. სამიტზე აქცენტი რუსეთისა და ჩინეთის მხრიდან კანონზე დაფუძნებულ საერთაშორისო წესრიგზე ზეწოლაზე, ტერორიზმის საფრთხესა და კიბერთავდასხმებზე გაკეთდება. საქართველოს საგარეო საქმეთა სამინისტროს ინფორმაციით, სამიტის დღის წესრიგში არის საქართველოს საკითხიც – საუბარია ღონისძიების იმ ნაწილზე, რომელიც წესებზე დაფუძნებული საერთაშორისო წესრიგის მხარდაჭერას ეხება. სამიტამდე, რამდენიმე დღით ადრე, გამართულ ბრიფინგზე ალიანსის გენმდივანმა განაცხადა, რომ სამიტზე კიდევ ერთხელ დაფიქსირდება NATO-ს მყარი მხარდაჭერა “ღირებული პარტნიორებისადმი” – საქართველოსა და უკრაინის მიმართ, რომ ალიანსი გააგრძელებს ქვეყნების მხარდაჭერას რეფორმების დანერგვის კუთხით.