საქართველოს საპატრიარქო მეუფე ნიკოლოზის მოსკოვში ვიზიტთან დაკავშირებით განცხადებას ავრცელებს. როგორც საპატრიარქოში განმარტავენ, მიტროპოლიტი რუსეთში ოფიციალური ვიზიტით არ წასულა.
„მედიასა და ინტერნეტსივრცეში გავრცელდა ინფორმაცია, რომლის მიხედვით, თითქოს ახალქალაქის, კუმურდოსა და კარის მიტროპოლიტი ნიკოლოზი (ფაჩუაშვილი) მოსკოვში რუსეთის პატრიარქ კირილეს ანგელოზის დღის მისალოცად საქართველოს საპატრიარქომ გაგზავნა.
აღნიშნულთან დაკავშირებით განვმარტავთ:
საქართველოს საპატრიარქოს არ ჰქონდა ინფორმაცია იმის შესახებ, რომ მიტროპოლიტი ნიკოლოზი ამ დღეს ღვთისმსახურებას ესწრებოდა, ვიდრე ინტერნეტში არ გავრცელდა შესაბამისი ფაქტის ამსახველი ფოტომასალა.
გარდა ამისა, გარკვევით აღვნიშნავთ, რომ ეს არ ყოფილა მიტროპოლიტ ნიკოლოზის ოფიციალური ვიზიტი. უკანასკნელ პერიოდში იგი არაერთხელ სწვევია მოსკოვს კერძო და პირადი საჭიროებიდან გამომდინარე, რადგან მას რუსეთის დედაქალაქში ჰყავს ოჯახის წევრები და სხვა ახლობლები”, – აღნიშნულია განცხადებაში.
შეგახსენებთ, რომ მეუფე ნიკოლოზმა მოსკოვის მაცხოვრის ტაძარში საღმრთო ლიტურგიაში მიიღო მონაწილეობა.
