მთიან ყარაბაღში, ჰადრუტის რაიონის, ხცაბერდის საბრძოლო პოზიციებზე ტყვედ ჩავარდნილი სომეხი სამხედრო მოსამსახურეების ახლობლებმა საქართველოს საზღვრისკენ მიმავალი გიუმრი-ბავრის სახელმწიფოთაშორისი მაგისტრალი გადაკეტეს.
აქციის ერთ-ერთმა მონაწილემ, არკადი ხოჰანისიანმა სომხურ NEWS.am-ს განუცხადა, რომ ისინი ტყვედ ჩავარდნილი ჯარისკაცების დაბრუნებას ითხოვენ.
„ჩვენს საკითხში პროგრესი არ არის. ამ ხნის განმავლობაში ჩვენ არ მიგვიღო არც ერთმა დეპარტამენტმა, მათ შორის საგარეო საქმეთა სამინისტრომ და პრემიერ-მინისტრმა“, – განაცხადა აქციის მონაწილემ.
როგორც სომხური მედია იტყობინება, 2020 წლის 13 დეკემბერს სოფელ ხცაბერდში შირაქის რეგიონიდან 62 სამხედრო მოსამსახურე ტყვედ ჩავარდა, ზოგიერთი მათგანი მოგვიანებით სამშობლოში დააბრუნეს. კიდევ 26 სამხედრო მოსამსახურე უკვე 2 წელი და 4 თვეა ტყვეობაში იმყოფება.
