აშშ-ს პრეზიდენტმა ჯო ბაიდენმა სამედიცინო შემოწმება უოლტერ რიდის სამხედრო სამედიცინო ცენტრში გაიარა. პრესკონფერენციაზე ჟურნალისტებმა კითხვა დაუსვეს, თუ როგორ ჩაიარა სამედიცინო შემოწმებამ და როგორ აფასებენ ექიმები პრეზიდენტის ჯანმრთელობის მდგომარეობას.
,,ექიმებმა შემამოწმეს, შიშობენ, რომ ზედმეტად ახალგაზრდა ვარ”, – იხუმრა პრეზიდენტმა ჟურნალისტებთან.
ექიმების დასკვნით, აშშ-ს 81 წლის პრეზიდენტი ჯანმრთელი და ენერგიულია. ბაიდენის თქმით, წინა წლის სამედიცინო შემოწმების შემდეგ არაფერი შეცვლილა.
იმის ფონზე, რომ ჯო ბაიდენი 2024 წლის საპრეზიდენტო არჩევნებში მონაწილეობას გეგმავს, საზოგადოებაში გაზრდილია კითხვები მისი ჯანმრთელობის მდგომარეობის და მეხსიერების შესახებ.
