„ქართული ოცნების“ თავმჯდომარე მამუკა მდინარაძე 26 მაისის ღონისძიებისთვის გაფორმებული პარლამენტის შენობის, გარშემო არსებულ კრიტიკას პასუხობს. მისი თქმით, გუშინ, თავისუფლების თემატიკაზე აგებული ქართული დეკორაციის ანტიევროპულად გასაღება სცადეს.
,,გუშინ თავისუფლების თემატიკაზე აგებული ქართული დეკორაციის ანტიევროპულად გასაღება სცადეს. დღეს კი ხალხმა, რომლებსაც საქართველო, მისი დამოუკიდებლობა და შესაბამისი სიმბოლიკა აღიზიანებთ, რეგიონებშიც ჩაშალეს დავალება, დამოუკიდებლობის დღე ევროკავშირის დროშაზე მძაფრი სპეკულაციებით გადაფარონ. ანუ ევროკავშირის სიმბოლიკა ჩართონ საქართველოს წინააღმდეგ მორიგ მავნებლურ და მდაბიო კამპანიაში.
ფაშიზმი დემოკრატიის სახელით, საქართველოს დაზიანება ევროპელობის სახელით, ღალატი პატრიოტიზმის სახელით – არ გამოვა ჩვენს ქვეყანაში მსგავსი მიდგომების, ტრენდების თუ ცრუ ნარატივების დამკვიდრება!
საქართველო აუცილებლად გახდება ევროპული ოჯახის სრულფასოვანი წევრი ქართული კულტურისა და ტრადიციების, ეროვნული იდენტობის შენარჩუნების და დამოუკიდებლობის კიდევ უფრო განმტკიცებით და არა მის გარეშე! – წერს მდინარაძე.
ცნობისთვის, კრიტიკა, 26 მაისის ღონისძიებისთვის გაფორმებულმა პარლამენტის შენობამ დაიმსახურა, სადაც ევროკავშირის დროშა, წინა წლისგან განსხვავებით არ იყო გადმოფენილი.
