გარდაცვლილი პროგრამისტის, თამარ ბაჩალიაშვილის ადვოკატები პროკურატურას საქმის ხელახალი გამოძიების მოთხოვნით მიმართავენ. მიზეზი კი ის ინფორმაციაა, რომელზეც საქმის ყოფილმა გამომძიებლმა ”ფორმულასთან” ისაუბრა.
,,თავდაყირა დადგება ყველაფერი, ჩემი შვილი შეეწირა სამსახურს”, – განუცხადა ბაჩალიაშვილის მამამ ”მთავარ არხს”.
ცნობისთვის, 2020 წელს გარდაცვლილი თამარ ბაჩალიაშვილის საქმის ყოფილი გამომძიებელი, სერგო შუბითიძე ამბობს, რომ მას არ სჯერა ბაჩალიაშვილის თვითმკვლელობის ვერსიის. შუბითიძემ “შაბათის ფორმულასთან” აქამდე უცნობ დეტალებზე ისაუბრა.
„გვამი იყო გასიებული და სხეულის არც ერთი ნაწილი არ იყო ცარიელი. თვალებიდანაც კი მატლები ამოდიოდა. ვერ მოხდა ისე დათვალიერება, როგოროც საჭირო იყო, რადგან გვამი ლპობაში იყო წასული. იყო საუბრები, რომ მანქანაში ბუზი შეფრინდა… მაგრამ მანქანის საქარე მინები ხომ აწეული იყო და რამდენი ბუზი უნდა შეფრენილიყო? შესაძლოა ბუზებისგან წარმოქმნილიყო ეს მატლები, მაგრამ განა რამდენი?“, – განაცხადა სერგო შუბითიძემ „შაბათის ფორმულასთან“ ინტერვიუში.