წერეთლის გამზირის რეაბილიტაციის დასრულების შემდგომ, მარშალ გელოვანის და რობაქიძის ქუჩების მოდიფიცირება იგეგმება. თბილისის მერიამ გასცა დავალება დიდი დიღმის სარკინიგზო კავშირის მიზანშეწონილობის კვლევასთან დაკავშირებით. მიმდინარეობს დადიანის ქუჩის და თამარ მეფის გამზირის დამაკავშირებელი ხიდის კონცეფციაზე მუშაობაც.
,,როგორც იცით, “რამბოლის“ დოკუმენტში მითითებულია, რომ თითოეული ღონისძიების, მათ შორის, დიდი დიღმის სარკინიგზო კავშირის მიზანშეწონილობის კვლევა და გავლენების ანალიზია პირველ რიგში ჩასატარებელი. თბილისის მერიამ ასეთი დავალება უკვე გასცა. ამ და სხვა ღონისძიებების მიზანშეწონილობის კვლევა და გავლენების ანალიზი უნდა ჩატარდეს დროში გაწერილი გეგმის შესაბამისად და შემდგომში იქნება მიღებული გარკვეული გადაწყვეტილებები”, – განაცხადეს მერიაში.
მათივე თქმით, ძირითადი რეკომენდაციებიდან რამდენიმეზე უკვე მიმდინარეობს მუშაობა. მათ შორის, აზიის განვითარების ბანკის მიერ მხარდაჭერილი მეტროს შერჩეული სადგურების რეაბილიტაციის და მისაწვდომობის გაუმჯობესების (მათ შორის მეორე ამოსასვლელებისათვის საჭირო დოკუმენტაციის მომზადებით) პროექტზე.
,,საზოგადოებრივი ტრანსპორტის სატრანზიტო დერეფნებზე გადაადგილების გაუმჯობესების მიზნით, მსოფლიო ბანკის მხარდაჭერით, მიმდინარეობს დადიანის ქუჩის და თამარ მეფის გამზირის დამაკავშირებელი ხიდის კონცეფციაზე მუშაობა. პარალელურად, მიმდინარეა საავტობუსო ქსელის რესტრუქტურიზაცია და გამართვა, რომელიც დროში გაწერილი პროცესია და ბევრ ისეთ ფაქტორზეა დამოკიდებული როგორიცაა – საავტობუსო პარკის განახლება, 18-მეტრიანი ავტობუსების დამატება, შესაბამისი ინფრასტრუქტურის მოწყობა და ადამიანური რესურსები“, – აღნიშნავენ მერიაში.
