საპარლამენტო უმრავლესობის წევრი ალუდა ღუდუშაური რუსეთის მიერ საქართველოს მოქალაქეებისთვის სავიზო რეჟიმის გაუქმებას და რუსული ავიაკომპანიებისთვის საქართველოში ფრენების აკრძალვის მოხსნას ეხმაურება.
მისი თქმით, საქართველოს მოქალაქეებს რუსეთის ფედერაციის მხრიდან ცალმხრივად დადებული სანქცია მოეხნათ.
„პუტინის გადაწყვეტილების დროსა და მის ზრახვებთან დაკავშირებით ვერ ვისუაბრებ. ფაქტია, რომ ჩვენი ხელისუფლება აკეთებს იმას, რაც ჩვენი ხალხისთვის და ქვეყნისთვის პრიორიტეტია. რაც შეეხება ოპოზიციას და აჟიოტაჟს, ოპოზიციას უნდა ჰკითხოთ, რა პრიზმიდან უყურებენ გადაწყვეტილებას, რომელიც მიიღო რუსეთის ფედერაციამ და პირადად ვლადიმერ პუტინმა. მე თუ მეკითხებით, არც წასვლას, არც ამ ფრენებით სარგებლობას ვაპირებ, ვისაც ეს ეხება, მათი გადასაწყვეტია. ფაქტია, რომ საქართველოს მოქალაქეებს რუსეთის ფედერაციის მხრიდან რაც სანქციის სახით, ცალმხრივად ჰქონდა დადებული, ახლა არის მოხსნილი. შესაბამისად, გაუგებარია, ახლა რა შეუძლია საქართველოს, საქართველოს მოქალაქეებს დაადოს დამატებით სანქცია და აუკრძალოს, თუ ვინმეს სურვილი აქვს, ამ შეზღუდვის არქონით ისარგებლოს? ეს ძნელად წარმომიდგენია. ეთნიკურად ჩვენი თანამემამულეები, რომლებიც რაიმე ფორმით დაკავშირებული იყვნენ რუსეთის ფედერაციასთან, ალბათ აქამდეც ახერხებდნენ მიმოსვლას. რაღაც დოზით გაუადვილდებათ მიმოსვლა ადამიანებს, ვინც ამას მესამე ქვეყნის გავლით ახერხებდა, მაგრამ ძნელად წარმომიდგენია ადამიანი, რომელმაც გაიგო, თურმე ვიზა არ სჭირდება, ადგეს და ახლა მოინახულოს რუსეთის რომელიმე ოლქი, თუ რაიონი, ტურისტულად იმოგზაუროს“, – განაცხადა ალუდა ღუდუშაურმა.
