2022 წელს მსოფლიოში სამსახურებრივი მოვალეობის შესრულებისას 57 ჟურნალისტი დაიღუპა, – ამის შესახებ ნათქვამია საერთაშორისო ორგანიზაციის „რეპორტიორები საზღვრებს გარეშე“ მიერ გამოქვეყნებულ 2022 წლის ანგარიშში.
ანგარიშის თანახმად, ჩინეთი და ირანი მედიის წარმომადგენლებისთვის ყველაზე სახიფათო ქვეყნებად სახელდება და აქ ქალები კიდევ უფრო მაღალი რისკის ქვეშ არიან.
„გასულ წელთან შედარებით, დაღუპულთა ოდენობა 20%-ით არის გაზრდილი. ამ მაჩვენებლების ზრდაში, რუსეთის მიერ უკრაინაში წამოწყებულმა ომმა მნიშვნელოვანი როლი შეასრულა. ომის დაწყებიდან რვა ჟურნალისტი დაიღუპა, რითაც უკრაინა მედიის წარმომადგენლებისთვის მსოფლიოში ნომერ მეორე საფრთხის მქონე ქვეყანა გახდა.
პირველ ადგილზე კი, მექსიკაა, სადაც წელს 11 ჟურნალისტი მოკლეს. ქვეყანა ბოლო ოთხი წელია, ყველაზე სახიფათო სიის სათავეშია. მკვლელობების უმეტესობა ჟურნალისტების მიერ წარმოებულ გამოძიებებს უკავშირდება, რომელსაც ისინი ორგანიზებული დანაშაულისა და ნარკოტიკული საშუალებების ტრეფიკინგთან დაკავშირებით აწარმოებდნენ.
28%-ით გაზრდილია დაპატიმრებულ ჟურნალისტთა ოდენობაც. ბოლო ერთ წელიწადში მედიის 533 წარმომადგენელი აღმოჩნდა გისოსებს მიღმა. მათი ნაწილი ჩინეთსა და ირანში, ასევე ბელარუსის ციხეშია“, – აღნიშნულია ანგარიშში.
