გენერალური პროკურორის ვაკანტურ პოზიციაზე გამოცხადებულ კონკურსთან დაკავშირებით, საპროკურორო საბჭო დღეს პირველად შეიკრიბება და სხდომას გამართავს. როგორც „მედიაცენტრ მთავარს“ მთავარი პროკურატურიდან აცნობეს, პროკურორობის 17-ვე კანდიდატის დოკუმენტაციას შეისწავლიან და შერჩევის წესსაც განიხილავენ.
„საპროკურორო საბჭო, შეამოწმებს საქართველოს გენერალური პროკურორობის კანდიდატებად წარმოდგენილი 17 პირის შესაბამისობას “პროკურატურის შესახებ“ საქართველოს ორგანული კანონის მე-16 მუხლის პირველი პუნქტით დადგენილ კრიტერიუმებთან. ასევე, წარმოდგენილი განკარგულების სისრულეს. სხდომაზე ასევე, იმსჯელებენ გენერალური პროკურორობის კანდიდატის შერჩევის წესზე და მასთან დაკავშირებულ საკითხებზე“ – აცხადებენ პროკურატურაში.
შეგახსენებთ , რომ საპროკურორო საბჭოს პირველი სხდომა 13:00 საათზე გაიმართება. ასევე, ერთ-ერთი კანდიდატი, დღეს, „მედიაცენტრ მთავარში“ განცხადებას გააკეთებს და საკუთარ კანდიდატურას მოხსნის.