გამოკითხულთა უმეტესობა პრეზიდენტ სალომე ზურაბიშვილის საქმიანობით უკმაყოფილოა და მას უარყოფითადა აფასებს. აღნიშნულ ინფორმაციას „საერთაშორისო რესპუბლიკური ინსტიტუტი“ (IRI) კვლევის საფუძველზე ავრცელებს.
კვლევის მიხედვით, სალომე ზურაბიშვილის მიმართ უარყოფით განწყობას გამოკითხულთა 70% ამჟღავნებს. 23% კი პრეზიდენტს დადებითად აფასებს. გამოკითხულთა 7% ამბობს რომ არ იცის როგორ შეაფასოს პრეზიდენტი ან პასუხისგან თავს იკავებს.
კვლევა საქართველოს პრემიერ-მინისტრსაც ეხება, კერძოდ, გამოკითხულთა 39% მის მიმართ კეთილგანწყობილია, 49% კი – უარყოფით განწყობას გამოხატავს. 2% აცხადებს, რომ პრემიერის შესახებ არ სმენია, 10%-მა კი არ იცის, როგორ შეაფასოს.
რაც შეეხება პარლამენტის თავმჯდომარე არჩილ თალაკვაძეს, კვლევის მიხედვით, გამოკითხულთა უმეტესობა მას უარყოფით შეფასებას აძლევს. პარლამენტის თავმჯდომარე გამოკითხულთა 50%-ს არ მოსწონს, 25% კი მის მიმართ კეთილგანწყობილია. 10% ამბობს, რომ მის შესახებ არ სმენია, 15% შეფასებისგან თავს იკავებს.
კვლევას კოორდინაციას უწევდა კვლევითი კომპანიის „ბალტიის კვლევები/გელაპის ორგანიზაციის“ წარმომადგენელი, დოქტორი რასა ალისაუსკიენე, საერთაშორისო რესპუბლიკური ინსტიტუტის კვლევების ცენტრის დაკვეთით. კვლევა განხორციელდა პირისპირ ინტერვიუს მეთოდის გამოყენებით რესპოდენტების საცხოვრებელ სახლებში.
