ევროპარლამენტარმა მარკეტა გრეგოროვამ, რომელიც უკვე საქართველოშია, გვიან ღამით, მედიასთან აეროპორტში გაკეთებული განცხადებებისას ასევე ხაზგასმით აღნიშნა, რომ 2 ოქტომბრის – თვითმმართველობის არჩევნები საპარლამენტო არჩევნების დონისაა, ვინაიდან საქართველოს პოლიტიკური მიმართულება, სწორედ ამ არჩევნებზეა დამოკიდებული.
“ეს არ არის მხოლოდ ადგილობრივი არჩევნები, ეს საპარლამენტო არჩევნების დონისაა, რადგან აჩვენებს მიდის თუ არა საქართველო ევროპული მიმართულებით და რა თქმა უნდა ჩვენ აქ ვართ, რათა დავაკვირდეთ და შევამოწმოთ, რომ არ განმეორდება ბოლოს მომხდარი მანიპულაციები ან თაღლითური ქცევა.
მჯერა, რომ საქართველოში მიხეილ სააკაშვილის დაბრუნებას დიდი გართულებები მოჰყვება. არ ვფიქრობ, რომ ეს ძირითადად პოზიტიური იქნება, რადგან ამ არჩევნებს სტაბილურობა სჭირდება, ეს კი ისაა, რაც მას არ მოაქვს. მე არ ვსაუბრობ მის პირად პოლიტიკაზე, მე მხოლოდ სიგნალებს და სიმბოლოებს ვგულისხმობ. ვიმედოვნებ, რომ თუ კი ის ჩამოვა, დაბრუნდება უფრო ჩუმად და არა 2 ოქტომბერს, როდესაც ამას ყველა ელოდება,” – ამბობს მარკეტა გრეგოროვა.
