ჩვენ სენატორს, რომელსაც აქვს განსაკუთრებული როლი სენატში (ის არის საგარეო კომიტეტის თავმჯდომარე) დიდ პატივს ვცემთ, თუმცა აუცილებელია აღინიშნოს, რომ მისი განცხადება ერთმნიშვნელოვნად ეფუძნება არასწორ ინფორმაციას, – ამის შესახებ „ქართული ოცნების“ აღმასრულებელმა მდივანმა ირაკლი კობახიძემ განაცხადა.
კობახიძე თვლის, რომ ამერიკის სენატამდე ინფორმაციები არასწორად მიდის.
„ჩვენ გვაქვს ინფორმაცია იმის თაობაზეც, თუ როგორ და რა ხაზებით მიდის ასეთი ცნობები კონკრეტულ თანამდებობის პირებთან ამერიკის შეერთებულ შტატებში. სინამდვილეში, საქართველოში არ არიან პოლიტპატიმრები და ეს ძალიან კარგად იცის ქართულმა საზოგადოებამ,“ – განაცხადა ირაკლი კობახიძემ.
„ქართული ოცნების“ ლიდრის თქმით, ოპოზიცია 2012 წელსაც ახერხებდა დეზინფორმაციის მიწოდებას სენატორ რიშისა და მისი კოლეგებისთვის.
მისი თქმით, მაშინდელი წერილი ეხებოდა საკაშვილის, მერაბიშვილის, ადეიშვილის, ახალაიას შერჩევით პოლიტიკურ დევნას. მისივე ინფორმაციით, წერილის ადრესატებმა გაარკვიეს, რომ ამ პირების მიმართ არ ხდებოდა შერჩევითი დევნა და ისინი იყვნენ კრიმინალები, რომელთა მიმართ კონკრეტული საქმეების საფუძველზე მხოლოდ სისხლისსამართლებრივი დევნა ხორციელდებოდა.
„როდესაც 2012 წელს ამ წერილის შინაარსი არ შეესაბამებოდა სინამდვილეს, ბუნებრივია, მან შედეგი ვერ გამოიღო. დღესაც იგივეა. ჩვენ ვიცით, რომ საქართველოში არ არიან პოლიტპატიმრები. შესაბამისად, მაქსიმალურად უნდა ვეცადოთ სწორი, სათანადო ინფორმაცია მივაწოდოთ ჩვენს საერთაშორისო პარტნიორებს“, – განაცხადა ირაკლი კობახიძემ.
