დღე: აგვისტო 18, 2024

აშშ-ის სახელმწიფო მდივანი ენტონი ბლინკენი თელ ავივში ჩავიდა. ინფორმაციას „როიტერი“ ავრცელებს. როგორც გამოცემა წერს, ვიზიტის მიზანია ისრაელზე დიპლომატიური ზეწოლის გაძლიერება, რათა მიაღწიონ ცეცხლის შეწყვეტის შეთანხმებას. ხვალ აშშ-ის სახელმწიფო მდივანი ისრაელელ მაღალჩინოსნებთან გამართავს შეხვედრას, მათ შორის ისრაელის პრემიერ-მინისტრთან, ბენიამინ ნეთანიაჰუსთან.

“რადიკალი გიჟი, სოციალისტი კამალა ჰარისი უფრო ადვილი დასამარცხებელია, ვიდრე ჯო ბაიდენი” – ეს განცხადება ამერიკის შეერთებული შტატების პრეზიდენტობის კანდიდატმა, დონალდ ტრამპმა გააკეთა. ტრამპი ამბობს, რომ ქვეყნის ეკონომიკას პრობლემები აქვს მაგრამ კამალა ჰარისის პრეზიდენტად არჩევის შემთხვევაში, ვითარება უფრო გაუარესდება. “გუშინდელ გამოსვლაში კამალა გახდა სრული კომუნისტი. მოუსმინეთ? მას ჩვენი ქვეყნის განადგურება სურს. კატასტროფული ინფლაციის გამოწვევის შემდეგ, კამალამ გამოაცხადა, რომ სურს სოციალისტური ფასების კონტროლის დაწესება, რასაც აქამდე არასდროს უმუშავია. ჩვენ ვერ დავუშვებთ ამ გიჟ სოციალისტს. ის ჩვენი ქვეყნის ისედაც დანგრეული ეკონომიკის განადგურებას აპირებს” – განაცხადა ტრამპმა.

აზერბაიჯანმა საერთაშორისო მთავრობათაშორის ორგანიზაცია „ბრიქსში“ გაწევრიანების სურვილი გამოთქვა. ამის შესახებ რუსეთში აზერბაიჯანის ელჩმა, ფოლად ბულბულოღლიმ განაცხადა. „ბრიქსში“ გაწევრიანების მსურველთა დიდი რიგია. აზერბაიჯანმა ასეთი სურვილი მართლაც გამოთქვა. ჩვენ ვილაპარაკეთ ამაზე ჩვენს რუს კოლეგებთან, მაგრამ ესეც პროცესი და სამუშაო საკითხია“ – აღნიშნა აზერბაიჯანელმა დიპლომატმა კითხვაზე პასუხად, აქვს თუ არა ბაქოს ასოციაციაში გაწევრიანების შესახებ ოფიციალურად წარდგენილი განცხადება. აღსანიშნავია, რომ დღეს რუსეთის პრეზიდენტი, ვლადიმერ პუტინი აზერბაიჯანში ჩავა და ქვეყნის პრეზიდენტ ილჰამ ალიევთან გამართავს მოლაპარაკებებს.

ისრაელის პრემიერ-მინისტრის, ბენიამინ ნეთანიაჰუს განცხადებით, ისრაელი მტკიცედ ინარჩუნებს პოზიციას ღაზაში ცეცხლის შეწყვეტისა და მძევლების გათავისუფლების შესახებ მიმდინარე მოლაპარაკებებში. „ვაწარმოებთ ძალიან რთულ მოლაპარაკებებს, ვინაიდან, მეორე მხარეს დგას მკვლელი, თავაწყვეტილი და ჯიუტი ტერორისტული ორგანიზაცია. არის სფეროები, სადაც ჩვენ შეგვიძლია გამოვავლინოთ მოქნილობა, და არის სფეროები, სადაც მოქნილობას ვერ ვავლენთ და მტკიცედ ვდგავართ. ჩვენ საკმაოდ კარგად ვიცით, როგორ განვასხვაოთ ეს ორი“- აღნიშნა ნეთანიაჰუმ. მისი განმარტებით, იმ დიდი ძალისხმევის პარალელურად, რომელსაც ისრაელი გატაცებული მოქალაქეების დასაბრუნებლად ახორციელებს, ის მტკიცედ იცავს მის მიერ დამკვიდრებულ პრინციპებს, რომელიც აუცილებელია ისრაელის უსაფრთხოებისთვის.      

გერმანიაში უკრაინის ელჩი ოლექსი მაკეევი გერმანიის მთავრობას მოუწოდებს, არ შეამციროს კიევისთვის სამხედრო დახმარება. უკრაინელი დიპლომატი ამბობს, რომ ევროპის უსაფრთხოება დამოკიდებულია გერმანიის პოლიტიკურ ნებაზე, გააგრძელოს უკრაინის მხარდაჭერაში მოწინავე როლის შესრულება. „ვიმედოვნებთ, რომ გერმანიის მთავრობა იპოვის ამ წელს უსაფრთხოების სფეროში ჩვენი საერთო საჭიროებების დაფინანსების გზებს და ბუნდესტაგი მტკიცედ, მკაფიოდ იტყვის თავის სიტყვას 2025 წლის ბიუჯეტთან დაკავშირებით“ – განაცხადა ალექსი მაკეევმა გერმანულ გამოცემა „ბილდს“. უკრაინის საგარეო საქმეთა სამინისტროს განცხადებით,  გერმანიის მიერ უკრაინისთვის სამხედრო დახმარების გამოყოფის შეწყვეტის შესახებ მედიაში გავრცელებულ ინფორმაცია არაკორექტულია და მანიპულაციას წარმოადგენს

ვლადიმერ პუტინი და ილჰამ ალიევი ბაქოში აზერბაიჯანსა და სომხეთს შორის ურთიერთობების დარეგულირების საკითხს განიხილავენ. რუსული მედია ვიზიტთან დაკავშირებულ მასალებზე დაყრდნობით წერს, რომ პრეზიდენტები განიხილავენ მოსაზრებებს რეგიონული და საერთაშორისო პოლიტიკის აქტუალურ საკითხებზე. „მთავარ ამოცანად რჩება სამშვიდობო ხელშეკრულების ხელმოწერა, აზერბაიჯან-სომხეთის საზღვრის დელიმიტაციისა და დემარკაციის პროცესის ხელშეწყობა, რეგიონში სატრანსპორტო, ლოგისტიკური და ეკონომიკური კავშირების განბლოკვა 2020-2022 წლების უმაღლეს დონეზე სამმხრივ შეთანხმებებზე დაყრდნობით. რუსული მხარე მზად არის, გააგრძელოს ყველა შესაძლო დახმარება აზერბაიჯანსა და სომხეთს შორის ურთიერთობების ნორმალიზებისთვის“- აღნიშნულია მასალებში.  

ისრაელის დაბომბვას ღაზის სექტორში ერთი ოჯახის რვა წევრი ემსხვერპლა. „ალ-ჯაზირას“ ინფორმაციით, ისრაელმა საცხოვრებელი სახლი დერ ელ-ბალაჰში დილით ადრე დაბომბა. გავრცელებული ცნობებით, ოთხი ადამიანი ემსხვერპლა ისრაელის ავიაიერიშს ხან იუნისში. მსხვერპლი მოჰყვა საცხოვრებელი სახლების დაბომბვას ჯაბალიას დევნილთა ბანაკშიც. ისრაელის არმია აგრძელებს ოპერაციას ეგვიპტის საზღვართან მდებარე რაფაჰშიც. გასული დღის განმავლობაში ისრაელის სამხედრო ოპერაციის შედეგად არაბულ ანკლავში 25 ადამიანი დაიღუპა, 72 კი დაშავდა. 7 ოქტომბრის შემდეგ ღაზის სექტორში დაღუპულთა რაოდენობა 40 ათასს აჭარბებს, თუმცა პალესტინის სამოქალაქო თავდაცვის ორგანიზაციაში აცხადებენ, რომ მსხვერპლის რიცხვი გაცილებით დიდია, რადგან, სულ მცირე, 10 ათასი ადამიანი დაბომბვისგან განადგურებული შენობების ნანგრევებშია მოყოლილი.  

აშშ-ის ყოფილი პრეზიდენტისა და ნოემბრის საპრეზიდენტო არჩევნებში „რესპუბლიკური პარტიის“ კანდიდატის, დონალდ ტრამპის განცხადებით, ის „დემოკრატების“ კანდიდატ კამალა ჰარისზე უკეთ გამოიყურება. “არასოდეს უწოდო ქალს ლამაზი, რადგან ეს შენი პოლიტიკური კარიერის დასასრული იქნება, მაგრამ მე ვამბობ, რომ მე ბევრად უკეთ გამოვიყურები, ვიდრე კამალა. ამბობენ, მისი ყველაზე დიდი უპირატესობა ის არის, რომ ლამაზი ქალია. ამაზე არასდროს მიფიქრია. მე მასზე უკეთ გამოვიყურები“, – აღნიშნა ტრამპმა.    

უკრაინამ რუსეთის როსტოვის ოლქში ქარხანა „კავკაზის“ ტერიტორია დაბომბა, სადაც ნავთობი და ნავთობპროდუქტები ინახებოდა. ქვეყნის არმიის გენშტაბში აცხადებენ, რომ  ნავთობპროდუქტები მიეწოდებოდა რუსეთის ფედერაციის საოკუპაციო არმიას. ობიექტის ტერიტორიაზე, სულ მცირე, ორი ხანძარი გაჩნდა. როსტოვის ოლქის გუბერნატორის, ვასილი გოლუბევის განცხადებით, საჰაერო თავდაცვის სისტემამ უპილოტო თვითმფრინავების შეტევა მოიგერია, სამრეწველო საწყობების ტერიტორიაზე ნამსხვრევების ჩამოვარდნის შედეგად კი დიზელის საწვავს ხანძარი გაუჩნდა.  

ატომური ენერგიის საერთაშორისო სააგენტოს გენერალური დირექტორი რაფაელ მარიანო გროსი აცხადებს, რომ უკრაინის ზაპოროჟიეს ბირთვულ ელექტროსადგურზე უსაფრთხოების მდგომარეობა უარესდება. ზაპოროჟიეს ელექტროსადგური, რომელსაც რუსეთის ძალები 2022 წლიდან აკონტროლებენ, ევროპის უმსხვილესი ბირთვული სადგურია. „ჩვენ კვლავ ვხედავთ ბირთვული უსაფრთხოების ესკალაციას და საფრთხეებს, რომელთა წინაშეც ელექტროსადგური დგას. მე უკიდურესად შეშფოთებული ვრჩები და კიდევ ერთხელ მოვუწოდებ ყველა მხარეს, მაქსიმალური თავშეკავებისკენ და სადგურის დასაცავად შედგენილი ხუთი კონკრეტული პრინციპის მკაცრი დაცვისკენ“ – განაცხადა გროსიმ. მანამდე ზაპოროჟიეს ბირთვული სადგურის რუსულმა ადმინისტრაციამ განაცხადა, რომ უკრაინამ დრონით იერიში განახორციელა გზაზე, რომელსაც ბირთვული ობიექტის პერსონალი იყენებს.

ამერიკის შეერთებული შტატების სახელმწიფო მდივანი, ენტონი ბლინკენი დღეს ისრაელში ჩავა. ინფორმაციას Reuters-ი ავრცელებს. გამოცემის ცნობით, ისრაელში ბლინკენი პრემიერ-მინისტრ ბენიამინ ნეთანიაჰუსა და სხვა მაღალჩინოსნებს შეხვდება. ბლინკენის ვიზიტი იმ ფონზე მოხდება, როდესაც კატარში, აშშ-ს, კატარისა და აგვიპტეს შუამავლობით, ცეცხლის შეწყვეტის შესახებ მოლაპარაკებები განახლდა. პრემიერ-მინისტრ ბენიამინ ნეთანიაჰუს ოფისის განცხადებაში აღნიშნულია, რომ ისრაელის მოლაპარაკებების ჯგუფმა გამოთქვა    

რუსულმა ძალებმა დღეს დილით კიევს ბალისტიკური რაკეტებით და დრონებით შეუტიეს. ინფორმაციას უკრაინული მედია საქალაქო-სამხედრო ადმინისტრაციაზე დაყრდნობით ავრცელებს. ამავე ცნობით, ეს მიმდინარე თვეში დედაქალაქზე განხორციელებული მესამე ბალისტიკური შეტევაა. „რუსებმა, ზედიზედ მესამედ, დიდი ალბათობით, KN-23 ტიპის ჩრდილოეთ კორეული ბალისტიკური რაკეტები გამოიყენეს და ისევ, ჩვენი საჰაერო თავდაცვის ძალებმა და საშუალებებმა არ მისცეს მტერს მიზნის მიღწევისა და კიევზე დარტყმის საშუალება. წინასწარი მონაცემებით, ბალისტიკური რაკეტები დედაქალაქთან მიახლოებისას განადგურდა“, – აღნიშნავენ დედაქალაქის ადმინისტრაციაში.