თვე: აგვისტო 2024

რუსეთის საგარეო საქმეთა მინისტრის განცხადებით, დასავლეთს ესკალაციის თავიდან აცილება არ სურს და უსიამოვნებებს ეძებს. როგორც სერგეი ლავროვმა აღნიშნა, ცნობების იმის შესახებ, რომ კიევი მოსკოვსა და სანქტ-პეტერბურგზე დარტყმებისთვის დასავლეთისგან ნებართვას ითხოვს, „შანტაჟია“. „ცდილობენ მოგვაჩვენონ, რომ დასავლეთს ესკალაციის თავიდან არიდება სურს, თუმცა სინამდვილეში ეს ეშმაკობაა. დასავლეთს არ სურს ესკალაციის თავიდან არიდება, დასავლეთი უსიამოვნებებს ეძებს. ჩემი აზრით, ეს ყველასთვის ცხადია“, – განაცხადა ლავროვმა. მან დასავლეთის ბირთვულ სახელმწიფოებს შეახსენა, რომ რუსეთი საკუთარი ბირთვული დოქტრინის კორექტირებას ახდენს და მოუწოდა, ცეცხლს არ ეთამაშონ.

მექსიკამ შეერთებული შტატებისა და კანადის საელჩოებთან ურთიერთობა შეაჩერა. Reuters-ის ცნობით, შესაბამისი განცხადება ქვეყნის პრეზიდენტმა ანდრეს მანუელ ლოპეს ობრადორმა გააკეთა. მიზეზი ამერიკის ელჩისა და კანადის დიპლომატიური მისიის მიერ მექსიკის სასამართლო რეფორმის გაკრიტიკება გახდა. მექსიკის პრეზიდენტმა ვაშინგტონი და ოტავა ქვეყნის შიდა საქმეებში ჩარევასა და მექსიკის სუვერენიტეტის უპატივცემულობაში დაადანაშაულა.

აშშ-ის ყოფილი პრეზიდენტი, რესპუბლიკური პარტიის პრეზიდენტობის კანდიდატი დონალდ ტრამპი 2020 წლის არჩევნების შედეგების შეცვლის მცდელობის საქმეზე მის მიმართ ხელახლა წარდგენილ ბრალდებას სოციალურ ქსელში ეხმაურება და არჩევნებში ჩარევის მცდელობად აფასებს. „უკანონოდ დანიშნულმა „სპეციალურმა მრჩეველმა“, შეშლილმა ჯეკ სმიტმა, სასაცილო ახალი ბრალდება წამოაყენა ჩემ წინააღმდეგ, რომელსაც აქვს ყველა ის პრობლემა, რაც ძველ საბრალდებო დასკვნას ჰქონდა, ამიტომ დაუყოვნებლივ უნდა მოიხსნას. ეს არის არჩევნებში ჩარევის და ამერიკელი ხალხის ყურადღების გადატანის მცდელობა იმ კატასტროფებისგან, რომლებიც კამალა ჰარისმა მოუტანა ჩვენს ერს, როგორიცაა მიგრანტთა დანაშაული, ყოვლისმომცველი ინფლაცია, მესამე მსოფლიო ომის საფრთხე და სხვა“, – წერს ტრამპი.

აშშ-ის ყოფილ პრეზიდენტს და რესპუბლიკური პარტიის პრეზიდენტობის კანდიდატს, დონალდ ტრამპს 2020 წლის არჩევნების შედეგების შეცვლის მცდელობის საქმეზე ხელახლა შემუშავებული საბრალდებო დასკვნა წარუდგინეს. სპეციალური პროკურორის, ჯეკ სმიტის მიერ ტრამპისთვის წაყენებული განახლებული ბრალდება შეიცავს წინა დასკვნით გათვალისწინებულ სისხლის სამართლის ოთხივე ბრალდებას, თუმცა ამსუბუქებს მათ ნაწილს, უზენაესი სასამართლოს გადაწყვეტილების შემდეგ, რომლის მიხედვითაც ყოფილ პრეზიდენტებს იმუნიტეტი აქვთ. „როიტერის“ ცნობით, ახალი ბრალდებიდან ამოღებულია საქმის ის ნაწილი, რომელიც იუსტიციის დეპარტამენტთან ტრამპის ურთიერთობას შეეხება. ეს ნაწილი უზენაესმა სასამართლომ სისხლის სამართლებრივი დევნისგან იმუნიტეტით დაცულად მიიჩნია.  

ნატოს გენერალური მდივანი, იენს სტოლტენბერგი უკრაინის მოთხოვნით ოთხშაბათს ნატო-უკრაინის საბჭოს სხდომას მოიწვევს. როგორც ალიანსის ოფიციალურმა წარმომადგენელმა განაცხადა, შეხვედრა ელჩების დონეზე გაიმართება. უკრაინის თავდაცვის მინისტრი, რუსტემ უმეროვი მოკავშირეებს ონლაინ რეჟიმში ინფორმაციას მიაწვდის ბრძოლის ველზე არსებულ ვითარებისა და პრიორიტეტული საჭიროებების შესახებ.

,,პუტინთან დღეს არა მხოლოდ კომპრომისებს, არამედ დიალოგსაც არ აქვს აზრი”, – ამის შესახებ უკრაინის პრეზიდენტი ვოლოდიმირ ზელენსკი კონფერენციაზე, სახელწოდებით: ,,უკრაინა 2024 – დამოუკიდებლობა” ისაუბრა. ,,პუტინთან დღეს არა მხოლოდ კომპრომისებს, არამედ დიალოგსაც არ აქვს აზრი. მას ომის დიპლომატიური გზით დასრულება არ სურს. ის დიპლომატიისთვის თითქოს მზადაა, ამავდროულად, ჩვენი ტერიტორიის 30% უნდა დავუთმოთ. ვფიქრობ, რომ ჩვენ მას ამ თამაშში ვერ ავყვებით”, – თქვა ზელენსკიმ.

,,ევროკავშირი აფრთხილებს საქართველოს, არ აკრძალოს ოპოზიციური პარტიები”, – ამ სათაურით აქვეყნებს სტატიას გამოცემა Politico და ,,ოცნების” გეგმას კიდევ ერთხელ ეხმაურება. სტატიაში ნათქვამია, რომ თუ საქართველოს ხელისუფლება ამას მაინც გააკეთებს, ,,ყველა ვარიანტი მაგიდაზეა”. Politico ციტირებს ევროკომისიის სპიკერ პიტერ სტანოს, რომელიც ამბობს, რომ ,,ბრიუსელი ,,ოცნებისეული” ოპოზიციური პარტიების აკრძალვის გეგმით შეშფოთებულია”. „ოპოზიციური პარტიები, აქტიური სამოქალაქო საზოგადოება და დამოუკიდებელი მედია აუცილებელია მთავრობების ანგარიშვალდებულებისა და დემოკრატიული ღირებულებების დაცვის უზრუნველსაყოფად“, – თქვა სტანომ და თქვა, რომ პლურალიზმი “ევროკავშირში გაწევრიანების პროცესის ცენტრალური საყრდენია”.

,,კურსკის ატომურ ელექტროსადგურზე ბირთვული ინციდენტის საფრთხე არსებობს”, – ამის შესახებ ატომური ენერგიის საერთაშორისო სააგენტოს ხელმძღვანელი, რაფაელ გროსი ელექტროსადგურის მონახულების შემდეგ საუბრობს და ამბობს იმასაც, რომ ვითარება სერიოზულია. ,,გაჩნდა ბირთვული ინციდენტის საფრთხე”, – ამბობს გროსი.

უკრაინული მხარის ინფორმაციით, კრამატორსკის მიმართულებით კიდევ ერთი რუსული ,,სუ-25″ ჩამოაგდეს. სახმელეთო ჯარების მეთაური ალექსანდრე პავლიუკი Telegram-ზე წერს, რომ თვითმფრინავი სამედროებმა საზენიტო სარაკეტო სისტემიდან ზუსტი გასროლით ჩამოაგდეს. ,,დღეიდან, რუსეთის შემტევ ავიაციაში ერთი თვითმფრინავით ნაკლებია. მისი ნამსხვრევები დონეცკის პეიზაჟებს ამშვენებს”, – წერს ჯარების ოპერატიულ-სტრატეგიული დაჯგუფება ,,ხორტიცა”.

,,ირანის მხრიდან ისრაელზე თავდასხმის შემთხვევაში, აშშ ისრაელის დასაცავად მზადაა”, – ამის შესახებ ეროვნული უსაფრთხოების საკითხებში თეთრი სახლის პრესსპიკერმა, ჯონ კირბიმ ისრაელის ტელევიზიასთან ინტერვიუში განაცხადა. მისი თქმით, თავდასხმის ალბათობის პროგნოზირება რთულია, თუმცა თეთრი სახლი ირანის რიტორიკას სერიოზულად აღიქვამს: ,,ვფიქრობთ, რომ ისინი კვლავ მზად არიან, თავდასხმა განახორციელონ, თუ ამის გაკეთება ენდომებათ, ამიტომ რეგიონში გაძლიერებული სამხედრო მზადყოფნა გვაქვს”. კირბი ამბობს, რომ შეერთებული შტატების გზავნილები ირანის მიმართ თანმიმდევრულია და ეს მომავალშიც ასე გაგრძელდება. ,,პირველი გზავნილია: ნუ გააკეთებთ ამას. ესკალაციის მიზეზი არ არსებობს. არ არსებობს მიზეზი, რომ პოტენციურად დაიწყოს რეგიონული ომი. მეორე: ჩვენ მზად ვიქნებით,…